Jawebi washiamakin meniti ixon Ibon yoia
55
Ibonra yoia iki:“Jatíbi ja nomiaibo, onpax xeai bekanwe;
ja koríkiomabo, neri bekanwe,
jawe kopímabi trigo bixon pikanwe;
kopiáxonmabi uva xeati itan leche bikanwe.
2 ¿Jaweatiki jawékiatima jawéki bikin maton koriki meniti iki?
¿Jaweatiki ja akáx potótima kopí maton teexon bia koriki maton meniti iki?
Jakonshamaankin ea ninkakanwe, jatianra jakon
jawékiatibo maton piti iki,
noe jawékibora maton piti iki.
3 Eiba bekanwe, rama netékainxon ninkakanwe,
ea ninkakanwe jatianra mato jati iki.
Jatíbitianra ja senenhati joi en mato betan ati iki,
jaskáaxonra ja David noixon axonti yoinibo en senenhati iki.
4 Ninkakanwe, maibotiibi iká jonibó.
Ea onanna ixon jato yoitira en David imaa iki,
jemabaon koshi iti itan jato axeanon ixonra en imaa iki.
5 Ninkakanwe. Jemabo ikainoa min onanama jonibora min kenati iki;
jemabo ikainoa moabi mia onanama
jonibora miiba boi ishtokanti iki,
jaskara ikenra ea, min Ibo, ja Israelnin Jakon Diossen jaskáakin mia
rabikanti en mia imaa iki”, akinra aká iki.
6 “Ibo nokoti atikonpari iketian benakanwe,
ochómapari iketian kenakanwe.
7 Jakonma joninra jawen jakonma jeneti iki,
onanxonbi jakonmabires shinanai joninra
jawen jakonmabires shinanbo jeneti iki;
jakiribi Ibo rabii bekanwe,
jatianra jan mato noibati iki;
jakiribi non Dioski yoiti ikanwe,
akinmis ixonra jakonma aká ikenbi noa shinanxontima iki.
8 Nokon shinanra, matona keskáma iki,
jaskáakin en jawéki akaira maton akai keskáma iki.
9 Nai, mai mananhon iká keskatira,
nokon shinanbo itan jaskáakin
en jawéki akai jaskáribi iki,
jabora mato mananhonbires iki”.
Jara ikonkon iki, ikira Ibo iká iki.
10 “Oi betan nibíra naikanmeax maannai,
jaskataxa jainribi moa boyamai,
jaskáyamakinra mai mechaai,
jain banati jakonhaxonra, xoxomai,
jaskáxonra ja banati berobo joniai,
jatianra ja piti yoabo jaai,
11 nokon kexakameax joi pikotai keská riki,
jawe akámabira eiba jakiribi jotima iki,
ja atin ea kenaiparira ati iki,
ja ati yoiara senenhati iki.
12 Raroshamanra jainoax mato pikóti iki,
tantishaman shinanyara maton main jakiribi mato kati iki.
Mato oinnaxa, ani mananbo itan maxko mananbo raroi bewai senenbires saa ikanti iki,
jaskákanaitianra jatíbi xabain iká jiwibaon
jaton meken tash axonkanti iki.
13 Moxa jiwi zarzabo ititianbira pino jiwibo xoxoti iki,
moebo ititianbira, joa inin arrayanbo xoxoti iki;
jaskarabo ikenra Ibon jane rabikanti iki;
tsonbi ras atima, jatíbitianbires ja oinxon onantira iti iki”.