53
¿Ja non ninkataki tson ikonhati iki?¿Tsoaki Ibon jawen koshi oinmaa iki?
2 Ibora keenai jawen yonoti jiwi maxo mai chorish ikenbi jawen taponbo chichó boax ikai keskati anitinin.
Metsáma itan penémara iká iki,
jawen jisára jawebi jaon keentima iki;
3 jonibaonra iresabires aká iki,
itan jaonra keenyamakana iki.
Masá tenei ikonbiresi chexakatai joni riki,
masá tenei axea riki.
Tsonbi ointi keskáma joni riki,
nonra iresabires aká iki,
jaakinra non shinanyamaa iki.
4 Jaskara ikenbira nonkaya ati ikenbi non masá tenetibo jan noa masá tenexonti iki,
nonakaya ja chexakatibo ikenbira noa tenexonti iki.
Diossen isinhakin xatea riki ixonra non shinanti iki,
masá tenemaxon, shinan namanbires imaara non shinanti iki.
5 Noa yoitima kopí chachikantira iká iki,
non jakonmabo kopí masá tenematira iká iki;
jawen rawíbaon masá tenemaketian
noa jakon tantishaman itira iká iki,
ja xateyonkana kopíra jan benxoti non nokoti iki.
6 Jatíbi noabora carnerobo ikai keskati manotabo iki,
westíorabaonra jaton keena keskáres akai iki,
ikaxbira jatíbi non jakonmabo Ibon jáki tsamanti iki.
7 Jakomayonkanara iti iki, ikaxbira
jato amaresi jawemabi shinanmeeti iki,
jawebira yoyo itima iki,
jainxon carnero bake retetiain bokanai keskáakinra bokanti iki,
jara netéresti iki, jawebira yoyo itima iki,
carnero rani rapéstekana keská riki.
8 Jawe jakonma akenmabira bokanti iki,
jaonparanan ikaira tsoabi yamati iki;
jakonma winoti kaai kopíra tsoabi jawe iresaipanon iki ikantima iki.
Nato mainmeara mexakanti iki,
nokon jonibaon ocha kopíra retekanti iki.
9 Jakonma jonibo pataxa maiakanti iki,
onanxonbira jakonmabires shinanya jonibo betan miinkanti iki,
jawetianbi eséki ramíkin jakonma akáma ikenbira akanti iki,
jawetianbi jato paranni yoyo ikama ikenbira akanti iki.
10 Ibora keena iki, masá tenemaxon chexakaamatin.
Jatianra yoina akanai keskáakin jaton ocha kopi
retekanon ikax, janbix menikaati iki,
jawen jati netera basibires iti iki,
jatianra jawen chiní bakebo ointi iki;
ja ati shinannabora Ibon já meranxon aká jakon pikóti iki.
11 Ichabires masá tenea pekáora jatíbi jan senenhaa onanti iki,
jaskara ati onanaxa raroshaman iti iki;
Ibon yonoti senén joninra ichabires jato xabakaamati iki,
jaton jakonma aká kopíra masá teneti iki.
12 Ja kopíra kikin jonibo ikainribi inon ixon Diossen imati iki,
jatoaresai joni koshibo betanra iti iki,
retekanon ikax janbix menikaata kopí
itan jakonmabo xaran iká kopíra jaskara iti iki,
ichabaon ochabo jakibicho tsamata kopíra jaskara iti iki, ocharesbo ixonira iti iki.