Jerusalén xabakaati yoia
52
Jishtenwe, Jerusalén jonibó,jishtenwe, koshi shinan biwé;
Jerusalén, jakon jema,
kikin chopa sawewe,
ja ikon Dios ikonhayamaibora, shinan kerás jonibo iki,
ja jemanra moa jikiwetsakantima iki.
2 Weníwe, Jerusalén jonibó,
jan mato yakata mai poto peren awe,
joni koshibo ikai yakátinin yakákanwe,
Jerusalén jonibó, xepokana bakeranonbó,
mato teomakana jiwi moa potakanwe, moa mato xabakata onanti inon.
3 Ibonra yoia iki:
“Yanka yonoti mato bokanaitianra,
mato kopí jawe koríkibi en biama iki;
jaskara ikenra jakiribi mato bikin westíora koríkibi en menitima iki.
4 Moatianra nokon jonibo Egiptonko kaa iki,
wetsankonia joni ikaxbira jain jakana iki;
japekáora jawe akáma ikenbi, Asiriabaon jato masá tenemaa iki.
5 Jatian ramakan, ¿Ja en oinnaiki jawe iki?
Nokon jonibora yankabires Babiloniain bokana iki.
Jato yosmaax, rabiti saí ikanaitianra ea sinati jenéyamai.
6 Ikaxbi netera nokóti jake,
jan noa yoyo akara non Ibo iki ixon,
ja nokon jonibaon akonkin onankanti nete”, akinra aká iki.
7 ¡Kikin metsá riki mai mató maxkaten,
ja jakon joi bei joai joni,
ja jakonshamanres jati joi yoiai,
jan xabakaati joi yoiai joni non nokotai oinna,
jatianra Jerusalén yoii neskatai: “Min Diossa apo iki”!
8 ¡Ninkáwe! Jonibaon paranan ikin jato koiranti min imaa sontárobora koshin saí ikai,
moa kananax raroira jatianbi saí ikanai,
Jerusalénhain Ibo jakiribi joai jaton beronbi oinnaxa ikanai.
9 ¡Kananax raroi saí ikanwe, ja texea Jerusalén jonibo,
Ibonra jawen jonibo jato noibake,
Jerusalén jonibora jato xabánapo pikoke!
10 Jatíbi maibotiibi iká jonibora Ibon jawen koshi jato oinmaa iki.
Non Diossen noa xabaara nato mainmeabaon, jatíxonbi onankanti iki.
11 ¡Pikókanwe, Babiloniainoax moa pikókanwe,
jawe kerás jawékibi meeyamakanwe,
Babiloniainoax moa pikókanwe!
¡Ja Ibon jawéki boaibo kerásyamakanwe!
12 Ikaxbira ishtonbires mato katima iki,
ja pikotira mato jabátima iki,
jaskara ikenra ja Ibon, ja Israelnin Diossen jatíbioxon mato panati iki.
Ibon yonotinin masá tenea itan jatoaresa
13 Ibonra yoia iki: “Ninkakanwe.
Nokon yonotinin akára jatíbi jakon pikóti iki,
jara aniakin shinankanai iti iki,
jakonman rabikanaira iti iki, itan ani koshira iti iki.
14 Jaskara ikenra icha joni jaon ratékanti iki,
jawen bemanan itan jawen yora
oinkanara, kikin wetsaresibi iti iki,
jatíbira moa joni jisáma iti iki,
15 jaskáribiira ichabires wetsa maibotiibi iká jonibo ratékanti iki;
apobaonra, oinxonbi, jawe joibi yoikantima iki,
jaskara ikenra jawetianbi ninkáisma
jawéki oinxon oinkanti iki itan ninkákanti iki”, akinra aká iki.