Ibon ja ati tee Ciro menia
45
Ibonra jashaman apo iti Ciro imaa iki,jaskáaxonra metsona iki,
maibotiibi ikanabo jatoarestaanan jato ikinti kopí, itan
ja apobo, reteanankin jawékibo jato bichinon ixon.
Ibon amaara, Ciro jikiresti kopí tsonbi xepotimaakin jema xepotibo kepenkanti iki.
Jatian ja Cirora neskaakin yoiai:
2 “Eara mii bebon kati iki, manan keyabora en reoti iki,
bronce xepótibora en ras ati iki,
ja yami chikebora en beshéati iki.
3 Enra kopí jawéki jonékanabo mia meniti iki,
jain benxohakana tsonbi onannama icha kopí
jawékibora en mia meniti iki,
eara Ibo iki ixon min onanti kopí,
ja Israelnin Dios, min janen jan mia kenaa.
4 Jaki shirokantima kopíra nokon yonoti Jacob,
Israel jonibo, en katota iki,
min janenra mia en kenaa iki,
jaskákinra min ea onannamatianbi,
ja min jakon jane en mia menia iki.
5 Wetsara yamake, eabicho riki Ibo;
ea Dios iketianra wetsa yamake,
min ea onannamatianbira,
jaskatax reteananti en mia onanmaa iki,
6 bari pikotaiorixon, itan bari jikiaiorixonra jatíxonbi onankanti iki,
ea moa jaketianra ea keska wetsa yamake.
Ea riki Ibo, wetsara yamake.
7 Joé itan yaméra en jonia iki,
enra jan jakonti akai itan jan jakonmatiribira en akai.
Ea, Ibonra, jatíbi nato jawékibo aká iki”.
Diossen ani atipana koshi
8 “Naikanmeara nokon ponté ati shinan en raanti iki,
naikanmea nibí, itan nai koin oi mannai keskáakin;
jatian jara main jakonhaxon biti iki,
jaskáara xoxoai keskati nato main kishpinti jati iki,
ja pataxa ja atikeskabiakin ati joa toeta keská iti iki”.
9 Westíora mapó kentira, wetsa kenti keskáribi ikáx,
jan aká ibo betan join iti atipanyamake.
Ja akí teetaira mapokan yoitima iki:
“¿Jaweki min akai?” akin
ja aká kentikanra jan aká yoitima iki:
“Minra teeti onanyamake”, akin.
10 Jaskaribiakinra nato netenxon jabaon jonia iketian,
baken jawen anibo notsinti atipanyamake.
11 Ja Ibo, Israelnin kikin jakon Diossenra,
jan jaskáakin aká ixon, yoiai:
“¿Jaskara ikenki, nokon bakebo
en jaskara akábo yoinon ixon maton ea yokáti iki,
iamaxon jaskáakin nokon jawéki
atibo maton ea onanmati iki?
12 Enra mai, itan jain jaa jonibo aká iki,
nokon mekenman nai xaba axonra,
jain iti en yoia jatíbi wishtinbo jishti pikota iki.
13 Enra Ciro imaa iki jatoaresai itiakin,
jatíbi jan akaibora en atibiresaxonti iki;
janra nokon jema jakiribi ati iki,
itan ja nokonabo wetsanko boxon
ináakanabora jato pikoti iki,
jawekopíbira jato yokákin teatima iki”.
Jatíbi atipana Ibora jaskati yoyo ike.
14 Ibonra Israel neskáakin yoiai:
“Ja wain teetai Egiptonkoniabo,
ja jawekinin maroai Etiopeainoabo,
itan Sabá jonibo,
ja ani keyá jonibora ikasimabi mato yoiti ixonkanti iki,
jaskataxa maton yonoti ikanti iki;
cadenanin nexeyabora mato pekáo bokanti iki,
mato bebonra chirankookanti iki,
jaskaxonra maton axonnon ixon mato yokákanti iki:
‘Ikonshaman riki Diossa mato betan iki,
ja bebon ikára yamake, wetsa diossa yamake’ ”.
15 Ikaxbi miara jishtima Dios iki,
jan Israel kishpinmai Dios.
16 Jan ja rabiti jawéki akaibora jatikaxbi rabinkanti iki,
namanbiresa shinanmeekanti iki,
itan osanreskanai iti iki.
17 Ikaxbi Ibonra Israel kishpinma iki,
ja kishpinmaara jatíbitian iti iki,
jaskara ikaxa jawetianbi rabintima iki,
jawetianbira naman shinanmeetima iki.
18 Jan nai jonia, ja Dios itan Ibo,
jan mai aká, itan jaskara jisá iti aká,
jain jawen itinkobiribi iti aká,
jawebioma itima, jonia ikax jain jonibo jati akátoninra, yoiai:
“Eara Ibo iki, itan wetsara yamake.
19 Eara joné yoyo iamai, ja mai yamé ikainoaxa ea yoyo iamai.
Enra Jacobnin chiní bakebo neskáakin yoiamai:
‘Jawebi yamainko ea benayamakanwe’.
Ea, Ibo yoyo ikara ikon iki,
en yoiara jaskara itikeskabi en yoia iki”, akin.
Ja rabikanai jawékibo betan Ibo tanaanana
20 “Ja jemabotiibi ikainoa jatíbi ja mawáinnoax texeabo,
tsinkitax neri bekanwe.
Matora onanmabiresbo ikax
jiwi akana ja rabitibo iaya mato boanhatanai,
jainxonra mato jan kishpinmati atipanyamaa dios maton oranai.
21 Yoyo ikanwe, itan jaskara riki ixon tanakanwe,
jaskátinin keenax wetsabo betan yokakanankanwe:
¿Tsonki neskara jawékibo iti,
ikámatianbi peokootianhinxonbi yoia iki?
¿Tsonki jaskara iti moatianbi yoia iki?
¿Jaskara ikaxki, ea Iboma iká iki jatíbi nato ikábo?
Ea Dios iketianra wetsa yamake.
Ea jatoaresai iketian itan kishpinmamis Dios iketianra wetsa yamake.
22 Ja mai pasenenainoa jonibo, eki bekanwe,
enra mato kishpinmati iki,
eara Dios iki, jaskara ikenra wetsa yamake.
23 Enbira yoia iki, enra ati iki ixon,
enra jatoaresti iki ixonra en yoia iki,
jaskara ikaxa en ati yoia senenti jake:
jatikaxbira ebebon chirankookanti iki,
Min yoiara jatikaxbi noa yoiti ikanti iki, akinra mia akanti iki,
24 jatianra neskákanti iki:
‘Ibo bichoresiki jan jatoaresti itan jara koshi iki’.
Jatíbi jan ea omisaibora osánkantires ikanti iki.
25 Irake ea, ea kopiresa, jatíbi Israel jonibaon jatoaresti iki,
jatianra eon rabíkanti iki”.