46
Ja dios Belra tanxake, jainoax ja dios Nebora moa poxóke.Ja rabiti akana jawékibora yoinabaon perakanxon bokanai,
paxkina yoinabaon botira iwe iki.
2 Ja diosbora moa tanxáke itan moara poxóke,
jatonbinixa xabakaati atipanyamake,
jaskara ikenra wetsa mainkobo bokanai.
3 “Jacobnin chiní bakebo,
Israel jonibo ja mato texeabaon ea ninkakanwe:
mato pikotamatianbira en mato koirana iki;
ikoxonra en mato boá iki,
4 mato yosiai kamánbira mato betan ea jaskábires iti iki;
boxyonai kamánbira en mato koiranti iki;
Enra mato jonia iki, itan jaskákinra en mato bokín jeneyamai;
en tewanara mato koshi iti iki, itan enra mato xabaati iki.
5 ¿Tsobéki maton ea ja keskáribi riki ixon imati iki?
¿Tsoarin maton shinanna ea ja keskáribi iti?
6 Jonibora jake icha oro itan icha
plata balanzanin toponxon menimisbo;
beoxon ja rabiti jato dios axontira
jaskara ati onan menikanai,
7 Jara iaxon bokanai;
jain jabiribi iti akanainkora akanai,
jatianra jainbiribi ikai, jainoaxa jawetianbi koshiamai.
Akinnon ixon yokákin koshín saí akanabira jato axonyamai,
masá tenekanaitian jato akintira atipanyamake.
8 Nato shinankanwe, ocharesbó,
iresbireshamakanwe, akonkin shinankanwe;
9 moatian jaskara winotabo shinankanwe.
Ea riki Dios wetsara yamake;
eara Dios iki, tsoabira ebé senen yamake.
10 Senentiainbi jaskara ikí kaira
peokootiainxonbi en yoikin peoai;
basibires iti ikenbira ikámatianbi
rama jaskara iki kaai en yoiai.
Enra yoike: En jaskara ati shinannabora iti iki;
ja ati en yoiabora jatíbi en ati iki.
11 Bari pikotaiorikea westíora joni en kenaara,
pimis tetébo joai keskati ochokeaxbi joti iki,
janra en ati shinannabo senenhati iki.
Jaskatira ea yoyo ike, jaskarara en ati iki,
ja en ati shinannabora,
en senenhati iki.
12 Ea ninkakanwe, ja ati yoiabi ayosma jonibó,
maton shinan riki mato xabakaati kikin ochóbires:
13 Jato xabakaamatira ochómatani itiakin en akai;
en jato kishpinmatira moa basiamai,
moara ochóma iki.
Enra Jerusalén jonibo kishpinmati iki,
Israel jonibo meranoaxa ea jakon ninkakaati iki”.