Diosbicho riki akonkin senenhai
44
Ibonra yoia iki:“Israel, Jacobnin chiní bakebo, rama ea ninkakanwe,
nokon yonotibo, itan nokon katotabo ixon.
2 Ea riki Ibo, jan mato jonia,
mato pikotamatianbira jaskara
jisá iti en mato aká iki,
enra mato akinnai.
Rakéyamakanwe, Jesurún, Jacobnin chiní bakebó,
mato riki nokon yonotibo, en katotabo,
3 enra jain jawebi xoxoyamai mainkon jene bemati iki,
mai manxan ikainra weanbo en imati iki.
Maton chiní bakebora bená jati en meniti iki,
enra jato jakon shinanxonti iki.
4 Jatianra xobi jakonhakin onpax tachita ikai
keskati kaikanti iki,
paro kexa iká álamo jiwibo
ikai keskatira kaikanti iki.
5 Westíora jonira iti iki: ‘Ea riki Ibona’, iki,
wetsara iti iki, ea riki ja Jacobnin chiní bake, iki,
jatian wetsanra, jawen mekeain jane ati iki:
‘Ea riki Ibona’, iki iká.
Jatian jawen janebi tekiara iti iki Israel”, iki iká.
6 Ibo, apo, itan jan Israel kopiaxon jakiribi bia,
jatíbi atipana koshia Ibonra, yoia iki:
“Ea riki ja rekenainoa itan ja senentiainoa;
eibakeaxa wetsa dios yamake.
7 ¿Jakia tsoa ebé senen?
Yoyo ixon onantiakin ea yoibanon.
¿Tsonki peokootiainxonbi rama iti jawéki yoia iki?
8 Ikaxbi, ¡Koshiakin shinankanwe, rakéyamakanwe!
Nato jawékibo en mato yoiara moa basi iki,
jatian matora en aká oinxon ikon riki ixon ea jan yoixonaibo iki.
¿Ea Dios ikenbiki wetsa dios jaríba?
Onsá iketian jain jonétira wetsa yamake;
westíorabira en onanyamake”, akinra aká iki.
Ja rabiti jawékiabo itima
9 Jatíbi ja rabiti jawéki akai jonibora jawemabi iki, itan ja rabiti akana jawékibora, jaon ratékanabi jawemabi iki. Jan rabiaibora benche, itan onanmabo ikanai, jaskara kopíra jato osanreskanti iki.
10 Jaweratonki yami charaaxon ja rabiti jawéki jisá diossai janra yankabires nete yoyotai.
11 Jatíbi ja jawéki jisáakin axon rabiaibora rabinkanti iki. Jan rabiti jawéki akaibora jonires iki. Jatíbi jabo Diossen jaton akábo yoixonti iketianra namanbires shinanmeekeankanke, itan kikinni rakékeankanke.
12 Ja yamin teetai joninra akai: jawen cincel bixon, chiikan yami xanaaxon, martillonin matasbokin jawéki jisáakin akin. Jawen ponyan koshinra teetai. Ikaxbi piamaaxa, ja yamin teetai joni jawen koshi keyotai, jainoax onpax xeayamaaxa, paxkinnai.
13 Ja joni jisáakin jawéki ati onan joninra: jawen reglanin topo tsekai, jaskáaxonra jaskara ati lápiz betan compássen dibujanai jaskáa pekáora makan xatei teetai; westíora jawéki jisára akai, jonin metsá mawakinra akai, ja axonra jaton dios rabiti xobonko nichinai.
14 Jonin konxán banaara aniai, cipres jiwibo, robles jiwibora nii merannoabi oin rastonmai kaman koirannai, jatianra ja xatetibo jati iki.
15 Japekáora jonibaon jan chii ketéakanai; jan yoonoxonra pakexbo bokanai; jatíribi pakéxbora jan yoaa anoxon bokanai; jainxon wetsa pakéxbora joni jisá diosanoxon bokanai, ja akáxa ja rabii ja bebon beókanai.
16 Ja jiwi pixtera chiiain axon tirímakanai, jan rakanhanan nami xoixon piaxa potókanai. Jainoaxibira jan yootax xanakanai, jaskatira ikanai: “¡Ja chii tiritai patax ikára jakonshaman iki; eara moa xanai!” iki.
17 Jatian ja jiwi texeara westiora dios jisáakin akáx, ja rabii já bebon beotai, jainoaxa ja yokati neskatai: “¡Miara nokon dios iki, ea kishpinmawe!” iki.
18 Ja jonibaonra onanyamake, ninkáyamarakanai; beroya ikaxbi benchebo ixonra ointi atipanyamakanke, jaton shinanbora kikinbires xepó iki, jaskákinra onanti atipanyamakanke.
19 Shinanyamarakanai, jaskáaxon jawéki atira onanyamakanke, itan jaskáaxon ninkátira jaton onan shinan yamake, jainoax neskati yoyo itira maxkákanke: “Jiwi pixtera en ketea tirita iki, janra en yoá aka iki, namira en xoia iki, itan en pia iki, ja jiwi pakex texeara en jakonmabires kerás jawéki aká iki, ¡Jaskáaxon en ja rabiaira westíora jiwi pakex iká iki!” iki iti.
20 Ikonshaman riki, jara chiimapo piti keska iki. Jara janso shinan paranmati jawéki iki. Ja jonibora kishpintima iki. Jaton mekenman ikára janso iki ixon onanti senenmara ikanai.
Jaton jakonma akábo Ibon Israelbo shinanxonyamaa
21 Diossenra yoia iki: “Israel, Jacobnin chiní bakebó,
shinankanwe matora nokon yonoti jonibo iki;
mato riki nokon yonotibo,
enra mato jonia iki.
Israel jonibó eon shinanbenoyamakanwe.
22 Maton jakonma akábo,
itan maton ocha akábora en keyoa iki,
nai koin keyotai keskáakin.
Jakiribi ea rabii beribakanwe, enra mato xabaa iki”, akinra jato aká iki.
23 ¡Ibon aká kopí raroi bewawe, naiká!
¡Mai kini kikin neminbo raroi saí ikanwe!
¡Mananbo itan niibo jatíbi jiwiboyabi
kikinbiresi raroi saí ikanwe,
Ibonra jawen ani koshi jishtia iki,
ja Israel jonibo jato xabaakin!
24 Neskarara Ibon yoiai, jan mia icha kopiaxon
biatonin,
mia pikotamatianbi jan mia joniatonin:
“Ea riki, Ibo, jan jatíbi jawéki jonia,
enra nai betan mai jaskarabiribi itiakin,
tson akinamabi en aká iki.
25 Jansokin ikamatianbi profetabaon
yoia joibora en senenmayamai;
en imaara shinanmares onannaibo moa shinanhoma
ikanai.
Onanbaon yoia, wetsan yoia wetsaresibi itibora en
imai,
itan jaton jan jawéki onanti shinanbora en iresabires
imai.
26 Ikaxbi nokon yonotibaon yoia joibora en
senenmai,
ja en jato raanabaon ja ati shinannabora jakon pikóti
iki.
Enra onantiakin yoiai Jerusalénhainra jakiribi jonibo
jati iki,
jainxonra Judá jemabo jakiribi akanti iki.
En amaara rawíbaon ras akabo jakiribi maton jemaati
iki.
27 En iti yoiara aniparo tsosinti iki,
itan jawen parobo taraxti iki.
28 Enra Ciro yoia iki:
‘Miara nokon jonibaon pastor keska iti iki,
jatíbi ea keenaira min ati iki’;
jatian ja Jerusalén jonibora en yoiai:
‘Jakiribira maton jemaati iki’
jatian ja Dios rabiti xobora en yoiai:
‘jaki min witabo tewanmeetira akanti iki’ ”, akin.