Ibobicho riki noa jan xabaati
43
Israel, Jacobnin chiní bakebó,ramara jan mato jonia Ibon mato yoiai:
“Rakéyamakanwe, en pikoara mato xabakata iki;
maton janenbira en mato kenaa iki,
matora nokona iki.
2 Mato jenenko winotaira ea mato betan iti iki,
paro shitaitianra mato jenen retetima iki;
chii tiritai meran winotibira, mato menótima iki,
chii tirikan akára mato tiritima iki.
3 Eariki maton Ibo, jaskarainoa mato jan xabaati,
Israelnin Jakon Dios.
Enra mato bia iki;
Egipto, Etiopía, Sabá, jabora mato bikin
mato kopi en jato kopía iki,
4 jakonhakin mato noibai kopí,
matora kikin kopí iki,
jaskara iketianra en mato noike.
Mato nokona iti kopí, itan mato janon ixonra,
jonibo itan maibotiibi iká jemabo en menikaama iki”.
5 Rakéyamakanwe, eara mato betan iki.
Bari pikotaiorikea, itan bari
jikiaiorikeara, min jonibo
jakiribi jaton main bekin en jato tsinkiti iki.
6 Nortera en yoiti iki: Jainribi jato bewé, akin.
Surbiribira en yoiti iki: “Jatoya banéyamawe.
Nokon bake benbobo, itan nokon
bake ainbobo ochokeabi ea jato bexonwe,
7 jatíbi ja nokon janeyabo,
en jato joniabo, jaskara jisá iti en jato akábo,
jabaon ea rabiti en jato akábo, ea bexonwe”, akin.
8 “Enra nokon jonibo jato bemati iki,
beroya ikaxbi benchebora ikanai,
pabíki kiniabo ikaxbira pabebo ikanai.
9 Jatíbi jemameabora tsinkíkanti iki,
jatíbi maibotiibi ikábo jainbicho tsamakanwe.
¿Tsoa jato xaran ikátoninki nato
rama jaskara itibo moamabi yoia iki,
iamax moa jaskara winotabo yoia iki?
Jaskara iká oinnabo neri bebákanon
maton ikon yoinon, noara benotama iki ixon maton oinmanon,
ikon riki ixon maton yoiai non ninkánon”.
10 Ibonra ikon yoiai:
“Matoriki ea oinxon onannabo, itan nokon yonotibo,
enra mato kotota iki, ea onannax
mato eki koshinon ixon, itan
tsoarin ea ixon maton onanti kopí.
Japari iká diossa yamaa iki,
itan epekao itiribira yamake.
11 Eabicho riki ja Ibo;
enbichoresa jato kishpinmati atipanke”, iki ixon.
12 Ibonra yoia iki:
“Mato jaskáati yoia ixonra
en mato xabakaama iki;
tsonbi onannama diossenra mato akáma iki,
jaskara ikaxa mato iki jan ea oinxon onannabo.
13 Jatíbitianra ea Dios iki.
Tsonbira nokon atipana koshi
ea potamati atipanyamake.
Ja en akaira tsonbi ras ati atipanyamake”, ikira iká iki.
14 Ja Ibo, Israelnin Jakon Dios, jan mato xabain pikoara neskatai:
“Jan mato akinhanan xabaatira,
Asiria apo, jawen sontároboya,
Babiloniain en jato raanti iki,
jatíbi jawen chiké xepotibora en jato kepenmati iki,
jatianra babiloniobo jan raroai, moa jan chexakatires banéti iki.
15 Ea Ibonra, Israel jonia iki,
eara maton Jakon Dios itan maton apo iki”, ikira ikai.
16 Ibon aniparo napo jene chopeara westíora bai iká iki,
jene ani bechon napobira
westíora bai aká iki;
17 jatíbi koshi sontarobora jan jato bomaa iki,
jaton carroboyabi jaton kabayobo
ras akin jato keyonoxonra aká iki.
Jainoax jawetianbi jotimaakinra jato jene keyomaa iki,
jainoaxa moa weniamakana iki;
mecha tirí nokai keskatira keyokana iki.
18 Ramara Ibon jawen jonibo yoiai:
“Bakish iibatabo moa shinanyamakanwe,
moa winota jawékibo
jakiribi shinanyamakanwe.
19 Enra bená jawéki ati iki,
jaskara ikenra jishtii pikotai ramabi maton oinnai.
Jain joni jayamainkora en baiai,
jawebi xoxoyamai mainkora en parobo imai.
20 Nii yoinabaon, chacalbo itan peia yoina
avestruzbaonra, ea rabikanti iki,
jaskara iken jain jawebi xoxoyamai mainko onpax en jokonmaketian,
jawebi xoxoyamai mainko parobo en imaketian,
nokon katota jonibaon xeamati kopíra en ati iki,
21 ja en aká jonibaonra ea rabikanti iki.
22 Ikaxbi mato Israel, Jacobnin chiní bakebo,
en akinnon ixonra maton ea yokáyamaa iki,
jaskáyamaira maton eon paxkinkana iki.
23 Ea axonkinra carnerobo jatiobi keyokin maton menoyamaa iki,
ea rabikin yoina menotira maton ayama iki.
Ea jawéki meninon ixon
yokákinra en mato
paxkinhayamaa iki,
incienso ininti ea menoxonon ixon
yokákinribira en mato teaama iki.
24 Ja ea meniti benoxonra inin
tawa marotima mato iká iki,
ea menikin retea yoina
xenibaonbira maton ea raromayamaa iki.
Jaskáyamakinra maton ochan
maton ea paxkinmaa iki; itan
maton jakonmabaonra ea tsokásmaa iki.
25 Ikaxbi ea, maton Dios ikaxa
eséki ramiti mato ochaabaon ea moa shinanbenotai,
jaskáxonra maton ochabo en moa shinanyamai.
26 Jan mato eki jakonma imai jaketianra,
joi benxoaibo betan non benxoati iki.
Onantiakin yoikanwe,
maton jakonma akáma non oinnon.
27 Maton japari reken papa iníra ochaa iki,
jan maton axeaibora eki yoitimakana iki,
28 jan mato ikinnai joni koshibaonra,
nokon ani xobo mekeyamaa iki;
jaskara ikenra Israel,
Jacobnin chiní bakebo, en jenea iki,
abákanon jatíribibo jato keyoxon,
jato jakonmaakin yoikin ixon”, ikira iká iki.