Ibon yonoti
42
Ibonra yoia iki:Ninkakanwe, “Ja en akinnai nokon yonoti neno iketianra ea jaon raroai,
jara en katota iki.
Nokon shinanra en já meran ake,
jatíbi jonibora yoiti iki, jakon akábaonra masá tenetima iki,
jatíbi maibotiibi ikainra atikeskabiakin ati iki.
2 Jára saí itima iki, jara koshin yoyo itima iki,
callenxon joi yoiira koshinma yoyo iti iki,
3 tawa seketabora keyokin
moshatima iki,
nokatishokores ikenbira mecha tiritai nokaatima iki,
ja yosmashokobora jato nametima iki.
Akonshamankinra jato yoiti iki,
jakon akábaonra masá tenetima iki,
akonkinra atikeskabiakin jakon ati beti iki.
4 Tantiamaira shinan namántimaribi iki,
nato main atikeskabiakin akí kaai kaman.
Aniparonmea nasinko iká maibotiibi iká jonibora,
jato onanmaitian netékainxon
ninkátinin manatabo ikánti iki”, ikira iká iki.
5 Ibo, Diossiki, nai joniaxon jan ani
xabá imaa, mai axonra, jain xoxoai
jawékibo aká iki, ja main jaa jonibora
jiwénon ixon join menia iki,
jawen yonoti jonira yoia iki:
6 “Ea, Ibonra, mia katota iki,
jaskáaxonra en mia metsona iki,
já meranxon jato kishpinmatira en mia imaa iki;
jaskara itira en mia axea iki,
jonibo betan en jaskara senenhabekonti yoia joi
jaskáaxon onanti mia itinra, ea keenai,
maibotiibi iká jonibaon joé keskara mia iti iki.
7 Benchebo min oinmatinra ea keenai,
cárcel meran xepokaataboribi min
jato pikotininra ea keenai.
Jain xepokaakana yamé meran jabora min pikoti iki.
8 Ea riki ja Ibo, jara nokon jane iki,
ea rabikantira tsoabi en amatima iki,
ea atitianbi jatonbi aká ikonma diosbo
rabikanaitianra en jato amatima iki.
9 Ninkakanwe, jaskara iti moabi en
yoiabora moa senenna iki,
ramara jaskara bená jawéki itibo en yoiai;
jaskarabo peokootamatianbira en mato onanmai”.
Dios rabii jaki bewaa
10 Bená bewá Ibo bewaxonkanwe;
ja ochó iká mainkoxonbi rabikanwe,
ja aniparon ochó boaibaon rabikanwe,
ja jain iká yoinabaon rabikanwe,
ja aniparo kexá nasi iká maibotiibi
ikain jaa jonibaon rabikanwe.
11 Jain jawebi xoxoyamai mananbo betanbi,
jain iká jemabaon jaa jonibo rarobakanon,
ja carpa peotanin jakana Cedar jonibo rarokanwe.
Selá jonibo raroi bewabakanon;
manan maxkábotiibi ikainoax koshin bewakanwe.
12 Ibora jakon iki ikanwe,
aniparo kexá nasi iká maibotiibi ikábaon já rabikanwe.
13 Reteanannai koshi joni ja rabikanai keskára Ibo kati iki,
reteananai ikaxa rakéyamai reteananti iki,
koshinra saí iti iki, reteananni itinra saí iti iki,
jaskáxonra jawen rawibo jatoaresti iki.
14 Ibora neskata iki:
“Basira ea neteta iki, jawebi
yoiamaira ea yamabires iká iki,
sináti ixonbira en tenea iki;
ikaxbi ramara ainbo baken
chexaa ikai keskati ea sion ikai,
ishi iananra en koshin joinnai.
15 Manan itan mai matóbora en reoti iki,
itan jain iká niibora jatíbi en choshimati iki;
parobora jain jawebi xoxoyamai manan itiakin en imati iki,
jainxonra ianbo en tsosinmati iki.
16 Ja benchebora en boti iki, jaton onannama bai ikainkobo,
itan tsoabi jan kayosma baibaon.
Yamé ikenbira jato kaai bebon nete en imati iki,
jainxonra ja wean ikainbo mai
masenenbires en imati iki.
Nato jawékibora jawebi
maxkámayamakin en senenhati iki.
17 Jatonbi ja rabiti aká jawékiki koshiaibora,
jatonbi jawéki jisáakin axon
neskáakin yoiaibo iki:
‘Matora non diosbo ik’.
Jaskáakin akaibora rabinbaini eibakeax moa ochó bokanti iki”, ikira iká iki.
Israel jonibo benche keskabo
18 Diossenra yoia iki: “Mato Israel jonibo pabe keskábaon, ninkakanwe;
benche keskábaon, kikinhakin oinkanwe.
19 Nokon yonoti keská iorai benche,
iorai pabe en raanara tsoabi yamake,
nokon yonoti, en raana joni, nokon joi boai,
Ibon yonoti keská, iorai benche itan iorai pabera tsoabi yamake.
20 Icha jawéki ikaibora maton oinna iki,
ixonbira ja yoii ikai maton onanyamaa iki;
matonra ninkata iki, ixonbira maton jawebi onanyamaa iki.
21 Ja Ibora, akinmis Dios ikax,
jan axea joi ikonshaman, itan kikin koshi itin keena iki;
22 ikaxbira ja jonibo jaton rawíbaon jato yometsoakanai,
jainxonra jaton jawéki jatíbi jato bonankana iki,
jatíbira jain atinko xepokana iki,
jatora iboakana iki, jatianra jan jato
pikoti tsoabi yamaa iki,
jato yatanxon jonekanara, kopiaxon jan jato jakiribi biti tsoabi yamaa iki”, ikira iká iki.
23 ¿Ikaxbi tsoa matonki ja ikonhati iki?
¿Tsoaki nato rama jaskara itibo ninkákasai?
24 ¿Tsonki Israel, Jacobnin chiní bakebo,
jatoareskanon ixon jato amaresa iki,
itan jato kopi yokánoxon
yatanxon jato jonékanaitian amaresa iki?
¿Jaki ikonma iki, Ibonbi jato
amaaki iama iki?
Jabora jáki ochakana iki, jan jaskara
ati yoia keská atinra keenyamakana iki,
jawen esé akáshamaira yoitimakana iki.
25 Jaskara kopíra jatoki sináxon,
jato masá tenemaa iki,
ishtonbires reteanamaxonra
chii tiritai meran jato imaa iki;
jato jaskáabira jan yoia jawebi
onankashamakana iki.