Israel xabakaamati Diossen yoia
41
Diossenra yoia iki:“Ja aniparo kexá itan nasinko maibotiibi ikábo,
ebebonmeax netékanwe.
Maibotiibi ikábo, jan reteanantibo bikanwe itan rakéyamakanwe.
Neri bekanwe, nato jawéki jaskara iti yoii noa yoyo ikanon;
yoyo ixon benxoati kopí tsinkínon akanwe.
2 ¿Tson imaa pikóxonki ja bari pikotaorikea apo Ciron jatíbiain jatoaresti iká iki?
¿Tsonki ja wetsa maibotiibi ikábo anon ixon jatoamaresti iki,
jatian apobo jawemabi jato imanon ixon,
jawen espadanin itan
jawen kanótininra jatíribi rawibo reteti iki,
jaskáaxonki xobi choshi akai keskáakin ja mawatabo wetsankobo janbisatima iki?
3 ¿Tson amaaki jato chibani boí, jaton
taén mai tii ayamai keskati jakonshamanres ishto bokanti ik?
4 ¿Natoki tson aká iki?
¿Tsonki, ja peokoonontianbi jaskara
jawéki ikábo itan rama inon ixon imaa iki?
Ea riki Ibo, eabicho Dios, itan
ja rekennainoa, itan ja senennainoa.
5 Aniparo nasibaon jabaonra oinkanti iki,
jatianra ikonbiresi rakékanti iki;
mai pasenenainoax wetsa pasenenaori
kamanra niwanti iki.
Moara ochóma iki, moara joai ikira iká iki”.
6 Ja rabiti akí mapokan teetaibora akinanankanti iki,
jainxonra jabé iká koshi shinan bimati iki.
7 Jawéki jisáai teetaitoninra ja
jan raoti metsá jawéki akí teetai
koshi shinan bimati iki;
martillon teetaitoninra ja yunqui yami
chakai teetai koshi shinan bimati iki,
ja min yami charáaxon tekíaara jakon iki akin ati iki,
ja joni jisáakin akára pakénake
clavonin koshiakin tasawe akinra ati iki.
8 Diossenra yoia iki: “Ninkakanwe, Israel, Jacobnin jonibo,
nokon yonotibo, en jato katotabo,
mato jonibora, ja ebé raenanai Abrahamman
chiní bakebo iki:
9 Mai pasenenainoara en mato tsekáa iki,
kikin ochó mato ikenbira ja mai
patsosainoa en mato katota iki,
jaskáaxonra en mato yoia iki:
‘Matora nokon yonotibo iki’, akin.
Enra mato katota iki, jaskáakinra
en mato omisama iki.
10 Rakéyamakanwe, eara mato betan iki;
eara maton Dios iki. Enra mato koshi
meniai, enra mato akinnai,
en amaara maton rawíbo maton jatoaresti iki,
nokon mekenman tewana keskára mato iti iki.
11 Jatíbi jan mato omisaibora
rabinax, namanbires
shinanmeekanti iki;
ja mato betan jakonmanani teetaibora
tsoabi texeyamai keyókanti iki.
12 Maton rawíbo benakinbira maton
nokotima iki;
mato betan reteanannaibora, moa tsoabi
yamaa keskáres ikanti iki.
13 Eara, maton Ibo Dios iki,
nokon mekemanra en mato yatanke;
enra mato yoia iki: ‘Rakéyamakanwe, enra mato akinnai’ ”, akin.
14 Ibon akonkin yoiara neskara iki:
“Israel, Jacobnin chiní bakebó,
ichamashoko ikaxbi itan yosmashoko
ikaxbi, rakéyamakanwe; enra mato akinnai.
Eara Israelnin Jakon Dios iki,
ea riki ja icha kopiaxon mato jan biai.
15 Ninkakanwe, bero jan xemeti keskára en mato imati iki,
bená jakon xetayabora mato en imati iki;
maton rawíbora maton jatoaresti iki,
mananbora xemeai keskáakin,
poto banénon kaman maton ati iki,
itan mai matobora bero xaka
keská itiakin maton ati iki.
16 Maton rawíbo, maton jatoaresara,
niwen payanna boai keskati bokanti iki;
niweaba koshin jato moa boara janbiskanti iki.
Jatianra ea Iboki, mato raroti iki,
Israelnin Jakon Diossenra mato rabíti iki.
17 Koríkioma itan wetsa jawekioma
jonibaonra, onpax benakinbi nokotima iki.
Nomin akára jaton jana moa taraxkanti iki;
ikaxbi ea, Ibonra, jato akinti iki, ea, Israelnin
Diossenra, jato potatima iki.
18 Jain jawebi xoxoyamai manan ikainbora,
en paro imati iki, ja mai teshanpainbora
jainoax jene jokoni shoo ikaibo en imati iki;
jain jawebi xoxoyamai manan ikainra chawá
xantóbo en imati iki,
jatian ja mai manxan ikainra weanbo en imati iki.
19 Jainxon konxan, acacia, arrayan, olivo ja jiwibora,
jain jawebi xoxoyamai mananman en banati iki;
mai manxan ikainbora pino jiwibo en
xoxomati iki, abeto, cipres jiwibora
jabetan en xoxomati iki,
20 jatíbiainxon oinkanon ixon,
itan netékainxon ea Ibo onankanon ixonra, nokon
atipanatonin nato jawéki en aká iki,
ea, Israelnin Jakon Diossenra jatíbi
jawéki jonia iki”, ikira iká iki.
21 Ja Ibo, Jacobnin chiní bakebaon aponra, yoia iki:
“Mato dios jisábo, neri bekanwe,
jaki chipóti yoikanwe,
noara ikon iki ixon
maton akábo yoii bekanwe.
22 Rama iti jawékibo ikámatianbi noa yoii neri bekanwe,
ja moa winotabo onantiakin yoii bekanwe,
jatianra netékainxon non ninkáti iki;
itan rama jaskara ikí kaai jawékibo noa yoikanwe,
ja winoti kaai non oinnon;
23 japekáoki jawe jawéki winoti kaai noa yoikanwe,
ikonkon diosbo ixon jishtiakin noa oinmakanwe.
Maton atipana akanwe, jakon iamax jakonma,
noa jaki rakéti itan noa jan ratéti.
24 ¡Ikaxbira mato jawemabi iki,
jawebira maton atipanyamake!
Jan mato katotara omistibires iki”, ikira iká iki.
25 “En imaara bari pikotaiori westíora joni pikóti iki;
jawen janenra en kenati iki,
jara norteorikeax nokóti iki.
Jato ikinnai joni koshibora chawá
jamatai keskáakin jato ati iki;
mapó akaiton jawen taen mapó meinnai keskára ati iki.
26 ¿Tsonki aká iki, non onannon ixon nato
jaskara itibo, ja peokootiainxonbi, noa yoikin?
¿Ikon riki ixon non onanti kopí,
jaskara ikámatianbi moatianbi jan noa yoiaki tsoa iká iki?
Matonra westíoraxonbi yoiamaa iki,
maton yoiaitianra tsonbi westíoraxonbi joi ninkáyamakana iki.
27 Ninkakanwe, jaskara jawékibo iti peokootaitianbi jan Jerusalén yoiara, ea iká iki,
jatian westíora joni jan jato keshanti
Jerusalénhain, jan raanara ea iká iki,
jawen jonibo jakiribi moa
basima bekanaitian, yoitira iká iki.
28 En oinnara wetsa diosbo tsoabi jishtii pikóyamai;
jan jato esetira tsoabi yamake,
en yokatabo jan ea yoitira tsoabi yamake.
29 Ninkakanwe, ¡Jabora jawemabi iki!
Jawebira atipanyamakanke;
ja rabiti aká jawékiboresiki”, ikira iká iki.