Jerusalén jonibo masá shinanai Ibon jakon shinanmati
40
Non Diossenra yoiai:“Nokon jonibo wetsanko bokanabo, jakon shinanmakanwe,
nokon jonibo jakon shinan bimakanwe;
2 noibahanan Jerusalén jonibo yoyo akanwe,
mato yanka yonokantira moa keyóke akin jato akanwe,
maton jakonma akábora moa maton kopiáke akin jato akanwe,
jatíbi jaton ocha kopíra, rabé rabeakin nokon mekemanbi en jato masá tenemaa iki”.
3 Joi yoiira neskati saí iti iki:
“Jain jawebi xoxoyamai mananman Ibo baixonkanwe,
jawebi xoxoyamai mananhin ponté
jakon bai non Dios axonkanwe.
4 Jatíbi manan teshanpa taebo mai bochoakanwe,
mananyabi, mai matóbo xankenhoma itiakanwe,
mananman iká weanboyabi, manan
keyábo jakonma ikenbi, jatíbiain mai teshanpa masenenhakanwe.
5 Jatianra jawen koshi shinan Ibon jishtiakin pikoti iki,
jatianra jatíbi jonibaon jatíxonbi oinkanti iki.
Jan nato jaskara yoiara Ibobi iki”, ikibo.
6 Joi pikotaira neskata iki: “Saí iwe”, ikira iká.
Jatianra en yokata iki: “¿Jawe yoiiki ea saí iti iki?”
“Jatíbi jonira xobi keska iki,
¡Mainmea xobi joa keskáshamanribi riki!
7 Xobira choshiai, xobi joara tsorisai,
Ibon xoon aka niwe xana jato
mananhon winókin akára jaskatai.
Kikinshaman ikon riki, jonira xobi keska iki.
8 Xobira choshiai, joara tsorisai,
ikaxbi non Diossen joira jawe iamai
jatíbitian keyótima iki”, akin.
9 Jerusalén, manan maxkaten,
mapékanwe, jakon joi yoii koshin saí ikanwe.
Rakéyamakin ninkátiakin maton joi
koshin pikokanwe, Jerusalén, Judáin iká jonibo yoikanwe:
“¡Ninkakanwe, non Diossa neno iki, akin jato akanwe!”
10 Oinkanwe, jawen koshiabira moa Ibo nokotai,
jatíbi jawen poyan koshinra ja naman jato imai.
Oinkanwe, jakiribi xabánapo jato pikoa pekáora, jawen jonibo jato beai.
11 Jawen carnero tonbó jan koirannai pastor keskára joti iki,
jawen poyanman ikóxon, jawen
xochiki kataxonra carnero bakebo beai,
jainxonra bená pikotabo kikinhakin koirannai.
Israelnin kikin Dios
12 ¿Tsonki jawen meken napaxen
aniparo océano topona iki,
iamax naikan pextinki jawen metotinin topona iki?
¿Tsonki jatíbi mai poto iwe topona iki,
iamax mai matóbo itan manan keyábo
balanzanin jawen iwe topona iki?
13 ¿Tsonki, min akára jakonma iki akin Ibo aká iki,
iamax tsonki, jaskáakin ati onanmaa iki?
14 ¿Tsonki esea iki, itan tsonki jaskáaxon jawéki ati onan shinan menia iki?
¿Tsonki neskarara ponté iki ixon yoiti axea iki?
¿Tsonki jawéki jaskatax ikábora
ikon iki ixon onanmaa iki?
¿Tsonki jaskáaxon onan shinan biti shinan menia iki?
15 Diossen oinnara jain jonibo iká
maibo, onpax tosota keskáshoko iki,
westíora mai poto balanzanin topona keská riki;
aniparo nasimea maibaon kopíra westíora
harina potoshokon kopítii iki.
16 Ja keyokin menoti yoinabora
jatíbi Líbano niikan moa ichama iki,
ja chii ketéati karoribira moa ichama iki.
17 Jatíbi ja maibotiibi jonibo ikára, Dios bebon jawemabi iki;
jawenara jawekopímabi iki.
18 ¿Dios maton akáki tsoa jisá iti iki?
¿Ja Dioski jawe jawéki jisá maton ati iki?
19 Jawéki jisáakin akai joninra yami charaaxon akai,
jatianra ja yami pené jan raoti akai jonin oron rapoai,
jainxon plata cadenanin raoai.
20 Jawéki jisáakin akai joninra,
payóyamai jiwi katotai,
jaskáaxonra jawéki jisáakin ati
onan joni katóxon amai,
janra poxónaketian koshiakin nichinai.
21 ¿Matonki onannama iká iki?
¿Ja yoikanaiki maton ninkatama iká iki?
¿Ja peokoonontianbiki mato yoikanama iká iki?
¿Ja nato nete joninontianbi ikáki, maton onannama iká iki?
22 Mai mananhon iká jan rakoa nai xabakanra
Diossen ani yakáti iki,
jainxonbi jonibo oinnara chanpobo keská iki.
Janra jan otaati chopa ati
keskáakin nai peanna iki,
carpa xobo keskáakinra peanna iki.
23 Janra jonibo kikin ikábo jawemabi imai,
itan nato mainmea joni koshibo moa yamatiai.
24 Jiwi maxo ramabi banaa keskábora ikanai, itan
ramashokopari mai meran jawen tapon jokonai keskára ikanai.
Jato mananhon Diossen xoon aketianra,
moa tsorisai, jatianra pei choshi akai
keskáakin niweaba koshin jato boti iki.
25 Jakon Diossenra noa yokatai:
“¿Jawe jawéki keská jisá riki,
ikiki ea yoii mato iti iki?
¿Tsoaki ebé senenti iki?” ikira iká iki.
26 Bewakeexon nai oinkanwe:
¿Jatíbi jain ikáboki tson joniabo iki?
Janra westíorabo ja pené wishtinbo jain itinkobo aká iki,
jaskáaxonra jatíbi jabo janepakea iki.
Jawen atipana koshira kikin ani iki, itan
jawen koshi kopira pené wishtinbo
jawebi maxkáyamake.
27 Israelbo, Jacobnin chiní bakebó.
¿Jaweakiki mato joiai?
¿Jawekopíki mato neskati yoyo ikai:
“Noa jaskara winotaira Ibon onanyamaresai;
Diossenki noaakin shinanyamai?” ikibo.
28 ¿Matonki onannama iká iki?
¿Matonki ninkatama iká iki?
Ja Ibo, jatíbitianbires Dios,
jan jatiobi nato nete jonia,
jara jawetianbi paxkinyamai;
jatíbi jawékira jakonhakin ati onanke.
29 Janra paxkinnabo koshi meniai,
yosmaabora bebon koshimaboresai.
30 Bake ranonbobira paxkinax itan jatsanti atipanke,
ja kikin koshibobira paketi atipanke,
31 ikaxbi ja Iboki koshiaibaonra
jatíbitian koshi biboreskin, tee akana atibires iti iki,
tetébo noyai keskára ikanti iki;
ishtoibira paxkinkantima iki,
itan kakáresibira jatsankantima iki.