Atikeskabiakin jato ikinti apo iti
32
Ninkakanwe, ponté jakonres jato ikinti apo,itan atikeskabiakin jato ikinai joni koshibora janoxi iki.
2 Ja westíorabora iti iki niwen anaketian jain jonéti,
itan niweaba koshin anaketian jan jato panaa keská,
jabora iti iki, mai manxan mechaati
jan jene boti taeakana keská,
itan jain jawebi xoxoyamai mai ikain, jan otaa ani shanka keská.
3 Jaskara akaibora kikinhakin oinkanti iki,
itan ja yoikanaibora akonkin ninkákanti iki;
4 jabaonra aresbireskin jaweki ayamakin,
shinanshamanxon akanti iki, onantishamanhakinra jawékibo yoikanti iki.
5 Jonibaonra jakonma jonibo, jakon jonin yointima iki,
tsokas jonibora, jakonhakin akantima iki.
6 Ja jakonma jonira jakonmai yoyo ikai,
jawen shinan meranra jaskáaxon jakonma ati shinanbo akai;
jaskáaxon jato retetira benai, itan Ibokira jansoi yoyo ikai;
ja pikasai jonira jawebi
meniyamakin jawebioma raanai,
ja nomiaira xeamayamai.
7 Ja tsokas jonin jakonma akaira,
jaskáaxon paranmisti onan iki,
jainxonra kikin jakonma
jawéki ati shinanbo akai;
jansoxonra jawebiomabo jato ramiai,
ja maxkatabaon yokákenribira,
atikeskabiakin jato akinyamai.
8 Jaskáyamakinra, ja jakon jonin, jakon atires shinanai,
ja jaskara ati shinannabora jawetianbi wetsaayamai.
Iresbiresa ainbobo jato ramiati yoia
9 Jatian mato, ja ratéma
ainbobo en mato yoinon ninkakanwe.
Nonbira atipanke ixon shinannai ainbobó, nokon joi
ninkakanwe.
10 Ramara maton jakonres shinannai,
ikaxbi nenoax westíora baritiara,
raketi mato saki iki bokanai,
ja yoá bana tsekatira keyoti kaai,
jatianra ja uva maton tsekawetsatima iki.
11 Mato ja jawenbi ratéyamai
jaresabo, raketi saki ikanwe,
mato koshi shinanmeetaibo raski ikanwe,
maton sawea chopa jopékanwe,
mato chexakatai onanti inon
ixon, jakonma xaxa chopa sawekanwe.
12 Mato chexakatai onanti inon ixon,
maton xochi timakanwe,
jain yoábo jakonni xoxokatitai,
uva wai ikátiainkobo, boanhatani winikanwe.
13 Nokon mainra moxa, itan manish xoxoti iki,
jatíbi jemamea xobo jainoax rarokatiainko, itan ja
rarotinin kenbaon xobonkobora jaskáti iki.
14 Ja apon xobora moa jain iamakin potabainkanti iki;
ja kikin joni ichaya jemara,
tsoa jonibi jain jaama banéti iki;
jawetianbi joyamai kakinra, jaton
jakon koshi xobobo potabainkanti iki;
jainra niimeranoa burrobo raroshaman
jakanti iki, itan jainra
wakan xobi piti iki.
15 Ikaxbi jan jawéki joniai Ibon atipana koshi
jakiribi noki joketianra, jain jawebi xoxoyamai mainko,
jain yoábo xoxoai kikin jakon mai iti iki,
16 jatíbi joninra ja mainxon, jatíbitian
pontéres itan atikeskabiakin akanti iki.
17 Jonibaon atikeskabiakin akaitianra, jakonshamanres jakanti iki,
jan tsokastibo yama, itan jatíbitian jaki koshikanti iki.
18 Nokon jonibora jakonbires jatinko jakanti iki,
jain jawe onsábi, itan tsokasbo yamaa
xobonkora jakanti iki,
19 moa niibo rerayonkana ikenbi, itan ja jema
moa jakonmaayonkana rabintibires ikenbira,
jaskara ikanti iki.
20 Raroshamanra mato jati iki,
wainko maton banaa yoabo jan
mechaatira icha onpax jati iki,
jain ja onsá yamainko,
burro betan waka benen piti xobira maxkátima iki.