Egiptonko jan akinti benaiboki ramiti yoyo ika
31
Jawe ireskiai, jan akinti benaiEgiptonko boaibora, jakonma iti iki,
jaton kabayoki koshiaibo, jaton icha
carroki koshiaibo, ja kabáyonin ikaibo
icha iketian jaki koshiaibo,
Israelnin Jakon Diossa oinyamakanai,
Ibora benayamakanai.
2 Ikaxbi jaribira jaskáaxon ani
jakonma jato winómati onan iki,
westíora jawéki ati yoixonra
winómayamakin senenhai.
Janra jakonma jonibo ramiati iki,
jakonma akaibo akinnaibora
jato ramiati iki.
3 Egipciobora ponté jonires iki,
jabora diosmabo iki;
jaton kabayobora namiya ikáx kayamabo iki.
Ibonra jato masá tenemati iki,
jan jato panai itan ja panakaatabora
reteanantiainoax keyókanti iki,
jatíbira jatianbicho mawákanti iki.
4 Ibonra Isaías yoia iki:
“Ja carnero reteketian pastorbaon rateabi león jawe
iamai keskára iti iki, jatíbi jabo tsinkíxon
ratekaskin saí akanabi jawe iamai keskára iti iki,
jatíbi atipana Ibo joira jaskara iti iki,
ja Sion mananmamea jawen jonibaon paranan ikí joi.
5 Peia yoina jawen naakan paranan
ikí já mananhon noya noyai keskatira,
jatíbi atipana Ibo Jerusalénman
paranan iti iki;
jaskákinra koiranti iki,
akinti iki, jaonparanan iti iki,
onsainoara pikoti iki”, akinra aká iki.
6 Israel jonibó, jaki ikonbiresi
mato yoitimataki, jakiribi yoiti
ixonkanwe.
7 Oro itan plata matonbi ja rabitibo aká
rabiaxa mato ochaa iki,
ikaxbi netera nokoti kaai jatian jabo
rabikin maton jeneti,
8 Asiriabora reteanankin retekanti iki,
ikaxbi jan jato akára, jonin koshin akáma iti iki.
Ja reteanantininra ja jonibo jato jabámati iki,
jatianra jaton reteanannai bake
ranonbo bixon, jaton yonoti imakanti iki;
9 raketai kopíra jaton apo jabati ishtoti iki,
jaton sontárobaon koshi capitánbora,
jaton bandera jenebaini jabákanti iki.
Jaskara itira Ibon yoia iki,
jawen rawíbo jan masá tenematira,
Jerusalénhain chii horno moa aká iki.