Egiptonko jan akinti benaiboki ramita
30
Ibonra neskara yoiai:“¡Jawe ireskiai, ja yoitima
bakebaonra, jaskara ati shinanbo
ebetan ayamai, jaskara ati en jato shinanmaamabira
shinanbo akanai,
jaskákinra, ochai jenéyamakin ocha tsamanboreskanai!
2 Jaskara ati onannoxon ea
yokáyamaira, Egiptonko boi ishtonkanai;
faraónki chipóti benaira ikanai,
Egiptonko jonetira shinankanai.
3 Ikaxbira faraónman jato ramiati iki,
onsá jakonmanin anaketian jain jóneti,
ja Egiptoki chipótaxa, rabintibires ikanti iki.
4 Ja maton janenko jan mato yoyo ixonti joni koshibo,
Zoan itan Hanés jemanko maton raankenbira,
5 jainoa jonibaon jawebi akinyamakin, jatíbi jato rami banémati iki,
jainoara maton jawebi bitima iki, itan jawebi mato akinkantima iki.
Ani rabin itan jakonmaresa maton biti iki”.
6 Natora Néguevhainoa yoinabo ikámatianbi jaskara iti yoia iki:
Ja onsá bochoa mainko, jain iká leónbo
sinati keotai napobi, ja ronobo itan noyai roninbo xaranbira,
jaton kopí jawékibo, itan icha
jakon jawékibo, burroyabi camellobo papimaxon,
ja Egipto iresa jemanko bokanti iki,
7 jara koshima itan jato akinti senenma iki.
Jaskara kopíra ja Egipto nato janeya Diossen imaa iki:
“Onsá yoina sinati keotibi jaweamisma”, iki iká.
8 Ibonra yoia iki: “Rama neri jowé, nato joi westíora
tablanin wishawe, toxkotimaakin awé,
ja ori ikí kaai netebaon ja ointi jain ibanon.
Ja oinna yoiara ikon iki ixon jatíbitian ja shinankanti”, akin.
9 Nato jonibora yoitimabo iki,
joi senenhayosmabo riki,
Ibon onanmatin keenyamakinra
ninkákashamakanai.
10 Ja oinxon onanmisbo akira
neskákanai:
“Namá keska meran moa oinyamakanwe”, ikibo.
Ja profetabo akíra neskákanai:
“Maton oinnabo ikon ikenbi
noa yoiamakanwe;
jakon joires noa yoikanwe;
ikonma jakon shinan non akábo noa bichinyamakanwe.
11 Jakon jati yoikin noa jenekanwe,
itan jakonma akin jeneti noa yoiamakanwe,
Israelnin Jakon Dios yoikin noa jenekanwe”, ikibo.
12 Jaskara kopíra Israelnin Jakon Dios neskatai:
“Nato jaskara itima en yoiara maton
omisai, sináxon ishtonbires jakonma
akaiboki itan jakonma jonibokira
mato koshiai;
13 jaskara ixonra, ja ocha maton iboai.
Keyá makan chiké moa toeta ikax,
shinannamainbi reokoti keská riki mato;
14 mapó kenti toetai keskatira ras ikanti iki,
kikinni bésheti toetaxa, jan chii
tsistó biti, itan jan pozomea onpax
weati jisámabobi ja pakéxbo banétiki”, ikira iká iki.
15 Ja Ibo, Israelnin Jakon Diossa neskatai:
“Jakiribi eki yoiti ikanwe, jawe
iamai jakonres ikanwe, jatianra mato xabakaati iki.
Jawe iamai jakonres ikax itan eki
chipotaxa mato koshi iti iki”.
Ikaxbira mato jaskara iti keenyamaa iki,
16 jaskákashamaira mato neskati yoyo ika iki:
“Ikáma, kabáyonin noa jabatara jakon iti iki”, iki.
Jakon riki, jaskara ikaxa mato jabati kati iki.
Jainoax neskatiribira mato yoyo ika iki:
“Carro ishtobaon nanetax
jabati katiriki”, iki.
Jakon riki, ja mato chibanaibora ishto iti iki.
17 Westíora joninbicho jato rakéara
waranka joni jabáti iki,
jatian matora, pichika jonin rakéa
jatikaxbi jabáti iki,
kikin ichamashoko banénon kaman,
manan maxkaten westíora jiwibicho
texea keskára mato iti iki,
iamax mai matokan westiora ja oinxon onanti
jiwi chankana keská, iki.
18 Ikaxbi noibaxonra, mato yoiti ikai kaman Ibon mato manake;
jara jawen noi shinan mato oinmatin kikinni keenai,
jaskara ikaxa Ibo atikeskabiakin jawéki akai Dios iki.
¡Jatíbi jan akintinin manatabora kikinshamani rarokanti iti iki!