Ibon axontinin manáti
33
¡Jawe ireskiai mato Asiria jonibo, keyomisboikenbi mato tsonbi keyoama,
jakonmaakinbi jakonhai keskáxon jato ramiai ikenbi,
mato tsonbi jaskáama!
Wetsa maibo min keyokin ras akin senenhaketianra,
matoribi keyokin ras akanti iki,
jakonhai keskáxon min jato ramiaketianra,
miaribi jakonhai keská ixon ramiakanti iki.
2 Ibó, min axontininra noa
manáke, noa noibawe.
Mia iwé yamékiritiibi noa jan akinnai,
non atikomatianbo noa jan kishpinmai iwé.
3 Jato ramiakasi mia yoyo ika onsá ninkataxa
jonibo jabatai,
min jato akára maibotiibi iká jonibo janbiskanai;
4 jaton kopí jawékibo bichinira
jaton rawibo beai, chanpo icha
beai keskára bekanai.
5 Ibora jatíbi koshibo xewina koshi iki,
naikan jaa ikax;
janra ponté shinanman, itan
atikeskabiakin ati shinanman
Jerusalénhain imaa iki,
6 jatíbitianra jakonres jato
jamati iki.
Ja onan shinan, itan jawéki
ati onan shinan riki, onsáinoa jan xabakaamai;
Jaton kopí jaweki riki, ja Iboki raketi yoiti iti.
7 ¡Ninkáwe, callemeaxa koshi shinanya
sontárobo saí ikai,
jakonshaman inoxon joi benxoati raankanabora, ayamax winikanai!
8 Baibora moa tsoa jonibi jan katima baneta iki,
jainra moa tsoabi niamai.
Ja senenhabekonti akana joibo, itan jaskara
anoxon joi benxoakanabora moa ras akanke;
tsonbira tsoabi jakonhayamai.
9 Ja maira jato mawámaxon masá
shinannai keská ixon masá shinanni iki,
Líbano nii choshiara rabinti jawéki iki,
Sarón mai teshanpara, jain jawebi xoxoyamai banéke,
Basán mai, itan Carmelo mananra moa jain jawebi xoxoyamai iki.
10 Neskarara Ibon yoia iki:
“Ramara en jishtiakin pikoai;
jatíbi nokon kikin atipana itan ea jatíbibaon kikin koshi.
11 Maton jaskara ati shinannabo, itan
maton akai teebora xobi
choshi keská, itan manish tsama keská iki;
en xoon aka chii tiritaitoninra keyokin menoti iki.
12 Jonibora tiritax chiimapo banékanti iki;
moxabo xatexon chiiki potaa ikai
keskatira tiríkanti iki.
13 En jato jaskáa ninkakanwe ochokeabó,
jatian ochómakeabaon akonkin nokon koshi onankanwe”, ikira iká iki.
14 Jerusalénhainoaxa ochares jonibo saki ikanai,
jatianra jakonmabo kikinni
raketi neskati yoyo ikanai:
“¿Tsoaki, ja jawetianbi nokayamai keyokin menomis
chii tiritai meran jati iki?” ikibo.
15 Jan pontéres jawéki akin, ikonres yoiaibo,
wetsabo koshi teemaxon janres icha jawéki biosmabo,
jawékibo menikanti kopíres jato axonaimabo,
esé ramiati yoikanabi, jaskara atin kenmabo, itan
jakonma oinnaketian betitaibo,
16 jabora jawebi rakéyamai jakonres jakanti iki,
tson jaweatimai jain jonétira, shanka xobo koshi keská iti iki,
jatíbitianra jaton jawékiatia jati iki,
itan jaton onpaxa maxkátima iki.
17 Ja Apo penetara maton ointi iki;
icha maibo jan iboara jain senenna kikin ochó iti iki.
18 Ja rakémeranbires jakátiai shinannaxa mato neskáti iki:
“¿Ja apo kopíati noa jan yokákatitaiboki jawerano ikanai?
¿Non kopía koriki topónkatitaiboki jawerano ikanai?
¿Non keyá xobobo jan topónkatitaiboki jawerano ikanai?” ikibo.
19 Ja kerabinma jonibo
xaranra moa mato jatima iki,
ninkátima joiabo xaran, itan ja
tsonbi kikinhakin ninkátima join ikaibo xaranra mato jatima iki.
20 Jerusalén jonibó oinkanwe,
ja jema riki jainxon non fiestabo ati;
Jerusalén oinkanwe, ja jemara tsonbi jaweatima iki;
carpa peota koshiakin nichina keskára iti iki,
jan tewanna jiwi nichinabora tsonbi tsekatima iti iki,
jan nexaa risbibora tesétima iki.
21 Jain nobetan ixonra Ibon jawen koshi noa oinmati iki.
Jainra parobo, ja kikin naxbá ikain bai koshibo iki,
jaskarabo ikenbira maton rawibo,
ja winaa kaai jaton ani nontibo, itan
jaton koshi wapórobobi jain winókantima iki.
22 Ibora noa joi benxoaxonai iki,
Ibora noa jan esé meniai iki, Ibora non apo iki,
janbira noa xabaati iki.
23 Ja wapórobaon risbibaonra ja jiwi
chankata moa tewanyamai,
jan niwe xotonti chopara moa peantima iki.
Jaskáketianra, kopí jawékibo ichabires
jaton rawíbaona bikanti iki,
benchebaonbira jaton jawéki biti iki,
chantobaonribira jaton jawékibo
jato bichinti iki.
24 Ja Jerusalénhain jaa jonibora tsoabi: “Eara isinai itima iki”.
Jain jaa jonibora jaton
ocha Diossen moa jato shinanxontima iki.