Isaíassen baken jane, jonibo yoii iká
8
Wetsa netera Ibon ea yoia iki: “Ani tabla bixon jain wishawe, ja onankana letrabaon onantibiresakin awé; ja janera neskara iki: ‘Maher-salal-hasbaz’, basiamabira jatíbi jawéki bichinxon mato keyokanai iki iká.2 Japekáo, min jaskara aká jabaon oinna iti kopí, ja jakon joni jaki koshitibo biwé, ja ikon sacerdote Urías itan Zacarías, Jeberequíassen bake”, akin.
3 Jaskara aká pekáo moa jawetio basi iketianra, ja nokon awin profeta ainbo betan en yorana tóota iki, jaskataxa westíora benbo bakeya iká iki. Jatianra Ibon ea yoia iki: “Maher-salal-hasbaz akin, janewe akin.
4 Ja baken ‘papá’, itan ‘titá’ iti onanamatianbira, Damasco betan Samariainoa jaton jawéki jato keyokin bichinkanti iki, jatianra jaton kopí jawékibo Asiria apo boxonkanti iki”, akin aká iki.
5 Jatianra jato yoinon ixon jakiribi ea Ibon yoia iki:
6 Rezínki itan Remalíassen bakeki rakékinra,
jonibaon Ibo omisai
ja jainmashaman baitai Siloé onpax omisai keskáakin.
7 Éufrates paro jenetia bai koshi bemaxonra,
Ibonbi jato jene mapomati iki,
(Jara ja Asiria apon, jatibi
jawen koshiaxonbi jaskáati yoii iki).
Jatíbi jawen taebaonra jene bochoti iki,
jatíbi ja tae kexaboribira jenen mapoti iki,
8 Judáin kamanbi nokóxon jato mapoara,
jaton texon senen kaman jenen iti iki,
peia yoinanin jawen pein
panai keskáakinra, jatíbi maton mai
mato betan ixon Ibon mato panati iti iki.
9 Ja maibotiibi ikábo, tsinkíkanwe,
jainoax kikinni ratékanwe;
jatíbi ja ochokea maibotiibi ikábaon, ninkakanwe:
jan reteanankin amistibo tsomaaxbira, mato ratéresti iki;
jaskara riki, jan reteanankin amistibo tsomaaxbira mato ikonbiresi ratéresti iki.
10 Maton jaskara ati shinannabora jawemabi iti iki;
Dios noobetan iken, maton shinannabo
atin keenkinbira, maton atima iki.
Ibo riki jaki rakéti
11 Ibonra koshinshaman jawen mekenman ea tsomaa iki, jaskáaxon ja jonibo ikai keskati itima ea yoia iki:
12 “Wetsabo betan rebéti riki iki jonibo ikainbi, mato jaskáyamakanwe. Jaskaraton jabo raketaikiribi matoribi rakéyamakanwe, itan ratéyamakanwe.
13 Jatíbi atipana Ibora jakon iki ixonra non shinanti iki; já riki noa jaki rakéti; já bebonmeaxa noa rakéti iki.
14 Jara matona westiora trampa keska iti iki; jaki mato tatí iti makan keskára iti iki, janra Israelhain iká jato ikinai rabé apon mai naman paketi iki; Jaki jerusalén jonibo pakéti trampa keskára iti iki.
15 Icha jonira jaki tatí ikanti iki, pakérakanti iki, jaskataxa mawákanti iki, itan jainra icha wexetax banékanti iki”.
Isaíassen jaonmea onannaibo koiranmeeti keshana
16 Nato joi kikinhakin mekekanwe; nato jaskáakin
jawéki atibo axeakin en mato yoiabo, tsoabi
onanmayamakin jonekanwe.
17 Israel jonibo oinmakashamai Ibo jonetaibira,
jaki koshii ea jenéyamai.
Jan akintinin manatira ea jenéyamai.
18 Ea itan ja Ibon ea menia nokon bakebora,
Israel jonibaon ja oinxon onanti ratéti jaweki,
jatíbi atipana Ibo Jerusalén mananman jaatonin
noa imaa iki.
19 Wetsa shinanyamakinra jonibaon mato yoikanti iki:
“Onanoxon mawábaon kayabo yokakanwe,
jainoax ja shinanmanres onannai,
baxexshokon jato yoiaibo yokakanwe, akin.
¿Ayamakiati ja, jonibaon jaton
iresa diosbo, itan ja mawábo ja jiriabo kopí jato yokákin.
20 Jaskáaxon jatoibakea esébo binoxon?”
Wetsa shinanyamaira jaskati yoyo ikanti iki,
ikaxbi ja yoikanaibora iresabires iki.
21 Jakonmaakana, itan pitin ikira jonibo oken
boanbekonkanti iki,
jaskatira pikasi sinákanti iki,
jaton apo itan jaton diosbora jakonmanin yoinkanti iki.
Bochikira kotsákanti iki,
22 jaskata pekáora mai oinkanti iki,
wetsa jawéki ayamakinra,
jawebiomabires itires itan yamé nokokanti iki,
ota itan masá tenetira nokokanti iki.
Jatíbira yamekan mapoti iki. Ja ramiakin masá
tenemakanaibora kenekaatima iki.