Acaz, Isaíassen reken yoia joi
7
Ja Siriainoa apo Rezín, itan ja Israel apo Pécah ja Remalíassen bake, jabora Jerusalén bikasi jato betan reteanankana iki, ixonbira biti atipanyamakana iki. Ja Jotamman bake, itan Uzíasnin baba Acaz, Judáin apo inontianra jaskara winota iki.2 Jaskara inontianra Acaz jawen rarebobo betanbi neskara joi boxonkana iki: “Siriobora Efraín betan rabéke” iki iká. Jaskáakanara, ja apo itan jawen jonibo saki iki peokookana iki, niibo niwen aká shakotai keskati.
3 Jatianra Ibon Isaías yoia iki: “Min bake Sear-jasub betan kaxon apo Acaz joai bechitanwe, jain onpax iti akanaton, jan jene beai tae senenainko, ja chopa patsataibaon bainkora min nokoti iki,
4 yoitanwe:
‘Koiramewe, ikaxbi ratéyamawe;
rakéyamawe, shinan yosmayamawe ja rabé tsiste
koinnaibo iki, jara rabé apo yoii iká iki.
Rezín, jawen sirio sontároboya, itan ja Remalíasnin
bake, jabora kikinni sinati tiríreskanai.
5 Ja Siriobaonra, Efraínman jonibo,
itan ja Remalíassen bakeboyaxon,
mia ramiati shinanxon jakonma esé akanke.
Jabora neskati yoyo ikanke:
6 Judá binoxon jato rakéanon akanwe;
jara non iboakin biti jake,
jatianra Tebeelnin bake non apo imati iki.
7 Ikaxbira Ibon yoia iki:
¡Jaskarara jawetianbi iamai!
8 Ja Damascora Siria apo jain jaa jema iki,
jatian Rezínra Damascoainoa apo iki;
sokota chonka pichika baritia kamanra Efraín moa
jema iamai.
9 Jatian Samariara Efraín apo jain jaa jema iki,
jatian Remalíassen bakera, Samariain jaa apo iki;
mato eki koshiamaitianra
matoareskanti iki’ ”, iki ixon.
Jawen rabé itin Diossen bake pikotai yoia
10 Ibonra Acaz yoiribia iki:
11 “Ja min Ibo Dios yokáwe jaskara iosma mia axonnon, ja oinxon min onanti, kikin mai chichó iamax ja kikin nai keyá ikain”, akin.
12 Jatianra Acazsen yoia iki: “Enra ayamai, atipankiatiki ixon tanakinra, ja oinxon onanti en Ibo yokáyamai”, akin.
13 Jatianra Isaíassen yoia iki:
“Mato ja apo Davidkan chiní bakebaon ninkakanwe.
¿Jonibo teaxon sinámakin,
nokon Diossibi sinámatin keenaki,
maton jisá jawemabi iki?
14 Ja oinxon onantira Ibonbi mato meninoxiki:
Xontakora moa tóoke,
já bakenara westíora benbo bake inoxiki,
jara Emanuel akin janekanti iki.a
15 Ja jawen reken baritiabora, ja bake,
leche seró betan mishkin jawekiai jati iki.
16 Ikaxbi ja baken jakon itan jakonma onanamatianbira,
mia jaki raketai apo rabekan, jaton maibo
moa jenekanti iki”.
17 “Miki, itan min joniboki, jainoax min xobonkoniabokira,
jaskara iosma netebo Ibon raanti iki,
Judá jeneax Efraín janbiribi inontianbira,
jawetianbi jaskara ikáma iki”.
(Jara Asiria apo masá tenemati yoii iká iki.)
18 Ja netebaonra Ibon bemaa nabón beai keská,
ja ochokea Egipto parobaon jaa sontárobo beti iki,
Asiriainoa sontárobora, bona beai keská jato bemati iki.
19 Jatíbi jabora beax mai xanken
neminhainbo peotanin jakanti iki,
shanka kininkoboribira jakanti iki,
jatíbi manish moxankobora jakanti iki,
jainoax jain wakan onpax
xeainkoboribira ikanti iki.
20 Ja netebaonra Asiria apo itan jawen sontárobo
Éufrates paro winobain ikábo beti iki.
Ibon amaara, wetsabaon navajanin akai keskáakin akanti iki,
mato israelitabo yatanxonra maton boo orokanti iki,
maton kenira orokanti iki,
itan maton yora namankirikea ranibora orokanti iki, akin.
21 Ja netebaonra ja westíora waka awin, itan rabé carnero ináatonin,
22 icha lecheya ixon, leche seróshaman jawékiati iki. Jatianra jatíbi jato keyokanaitian kishpinnabaon, ja mainxon leche seróshaman betan mishkin jawekiakanti iki.
23 Ja netebaonra, ja waranka uva banáya wai, jawen kopí waranka koriki ikátiibi, moa moxa manishbichobores banéti iki.
24 Jatíbi ja maira moa moxa itan manishbichobores iti iki, jaskara ikenra yoina retei kanóti betan piaya jain katires iti iki.
25 Ja mai mató ikainbo lampan orokatikanainkobora, ichabires moxa itan kikin manish iketian tsoabi jain katima iti iki. Waka benebo betan carnerobo jain imati pastoresa iti iki.