Ibon Isaías kenaa
6
Apo Uzías mawata baritianra, kikin keyá yakátinin yakata en Ibo oinna iki; jawen tari kexakan jawen ani xobo chichó tapo mapoaketana.2 Já manaon iká iki ángelbo chii tiritai keskábo. Westiorabo iká iki sokota peiabo. Rabé pein bepotabo, ja wetsa rabé peinribi namankiri jaton yora mapoabo, jainoax wetsa rabekanribi noyakana iki.
3 Jatianra yoianani neskákana iki:
“Jatíbi atipana Ibora jakon, jakon, jakon iki.
Jatíbi maira jawen koshi bochobires iki”, ikibo.
4 Ja ikanai joi ninkátibires pikotaitianra, Diossen ani xobo xepótibo shakota iki, jatianra ja xobo meranbi koin bochoa iki.
5 Jatianra en shinanna iki: “¡Jawe iresaipanon, eara moa mawatai! Ja Apo, jatíbi atipana Ibora nokon beronbi en oinke, joni ikax ochan aká nokon kexá kerásbires, itan ja ochan kerásaa jaton kexá kerásbires jonibo xaran jaa ixonbi”, iki ixon.
6 Jatianbira ja westíora ángel chii tiritai keská eki noyai joa iki. Jainxon yoina menotiainoa, jan yatantinin axon bia westiora tsiste tsomaya,
7 jatian janra nokon kexá tii axon ea yoia iki:
“Oinwe, nato tsistenra min kexá en tii ake.
Min jakonmara moa mia bichinke,
min ochabora moa mia shinanxonyamai”, akin.
8 Jatianra Ibo yoyo ikai en ninkata iki:
“¿Tsoaki en ranti iki?
¿Tsoaki non joi boai iti iki?” iki ikai.
Jaskáketianra en yoia iki:
“Eara neno iki, ea raanwe”, akin.
9 Jatianra jan ea yoia iki:
“Katanwe, ja jonibo neskara yoitanwe:
‘Ninkáxonbira onankantima iki,
oinxonbira, merakantima iki’.
10 Ja jonibaon shinan jato benómatanwe;
jaton pabíki kinibo xépotanwe,
jaton berobo bepotanwe,
abákanon oinyamakin, abákanon ninkáyamakin,
abákanon onanyamakin,
ibákanon shinanmeetax eki banéyamai,
en jato benxoayamanon”, akin.
11 Jaskáketianra en yokata iki:
“¿Ibó, Natoki jawetio basi iti iki?” akin.
Jatianra jan ea yoia iki:
“Ja jemabo keyokin ras akana,
moa tsoa jonibi jain yamai kaman; Jainoax ja
xobobo tsoa joniomabi banetai kaman, itan
ja mai, jain jawebi xoxotimai banetai kaman,
12 jainoax Ibon amaa jonibo wetsanko jato bokanai kaman,
itan ja mai kikin jawebioma banetai kamanra iti iki.
13 Jatian pachankonia chonka jonires texea japariketianra,
jaboribi keyokanti iki,
ja roble, itan encina jiwi rerakana,
jawen borobichores banetai keskára ikanti iki”.
(Ikaxbi ja boroainoaxa jakon xoxo pikóti iki.) Akinra ea aká iki.