Jakonshaman jato imai apon bake pikóxon jato ikinti
9
Motianra, jain ja Zabulón betan Neftalíkan chiní bakebo iká Galilea mai, Diossen rabintibo imayona iki,ja ani maira ikon Dios onanma jonibo patax iká iki,
ja Jordán keibakeax peokootax, aniparo kamanbi nokota,
ikaxbi jaskata pekáora, icha jan jakon ninkakamatibo biti iki.
2 Ja yamé meran ipachoai jemamea jonibaonra
ani joé oinkanti iki;
yamématani meran jaabaon
ointira ja joekan tenati iki.
3 Ibó, minra aniakin noa raromaa iki;
ja beneti shinanra kikinshaman anibires iki.
Ja yoá tsekatitian ikai keskati, itan
ja icha jaweki jato bichinax,
senenbires bii ikanai keskatira, mibebonmeax jatikaxbi rarokanti iki.
4 Minra ja jonibo yanka yonokin akonbireskin
masá tenemakanai, itan ja
iboaxon jaton keena keskáakin jonibo yonokin jato tsokásmakanaibo keyoa iki.
Madián jonibo keyokin min ras ani keskáakin.
5 Sontárobo niaitian jaton botabo ninkáti
ikátiaibo, itan jaton chopa jimin tsaia ikátiaibora,
chiikan keyokin menoti iki.
6 Noibara westíora bake pikóke,
Diossenra westíora bake noa menike:
Jara jaskáaxon jato ikinti atipana koshi menike.
Jatianra nato janebo menikanti iki:
Jan akaibo ratétibires,
jaarestima Dios,
jatíbitianbires Papa,
jakonshaman jato imati apon Bake.
7 Davidkan ani yakátininra yakáti iki;
ja apo ikenra jawen koshi jatíbiain pextinti iki,
jatianra ja jakonshaman iti shinan keyótima iki;
ja apo ikára jawetianbi keyótima iki,
ja atikeskabiakin akai,
itan ponté senenbires akaira,
rama peokootax, jatíbitian iti iki.
Natora ja jatíbi atipana Ibon anoxiki,
jawen noimisti shinanman, akonbireskin
noa noia ixon.