119
97 ¡Akonbireskinra min esé en noike!¡Netetiibira en jaakinres shinanai!
98 Ja senenhati min yoia joibora jatíbitian nokona iki;
nokon rawíbo winobain onanra ea imaa iki.
99 Jatíbi jan ea axeaibo winobainbiresa en ninkatai,
ja min ati yoiabo en icha shinannai kopí.
100 Enra ninkatai yosi jonibaon akai bebonbires,
min ati yoiaboki ea yoiti ikai kopí.
101 Min joi senenhati kopíra,
jatíbi jakonma jawéki akí ea jeneta iki.
102 Ja min ea axeai kopíra,
min jaskara ati shinanna joibo en jeneyamaa iki.
103 Ja min ea axonti yoiabora, nokon jananko kikin bata iki,
ja nokon kexainra mishkin winoa bata iki.
104 Jaskara iti min yoia joinkoniara, en shinan bia iki;
jaskara kopíra jatíbi janso axébo en omisai.
105 Min joira ea niaitian jan joénai iki,
ja joekanra ea jan niai bai tenai.
106 Enra ati iki ixonra yoia iki, jara en senenhai kaai:
¡Atikeskabiakin jakon ati min yoia joibora en ati iki!
107 Ibó, eara moa kikínbiresi tsokasa iki;
¡Jaskáati min yoia ixon, ea jamawe!
108 Ibó, ja nokon kexakan, en mia rabiaibo ea bixonwe,
jainxon min koshi joibo ea onanmawe.
109 Jatíbitianra ea mawá onsáin iki,
ikaxbira min esekan ea shinanbenoyamai.
110 Jakonma jonibaonra ea jain pakéti axonai,
ikaxbira min koshi joinkoniax ea ochóyamai.
111 Ja senenhati min yoia esébora, jatíbitian ea jayá iti iki,
jabaonra nokon shinan ea raromai.
112 Min esébaon yoiai keská tanatira en shinanna iki,
jatíbitian jainoax ja senenai kaman.
129 Min esébora ratétibires iki;
jaskara ikenra ea yoiti ikai.
130 Ja min joibo onantiakin yoikanaitoninra tenai,
itan axeaama jonira ja ninkatax axeai.
131 Ja min esekan kikinni keenkinra,
janxbataanan en koshín joinnai.
132 Ja mia noiabo min akai keskáakin,
ea oinxon, min noibamisti shinanman ea noibawe.
133 Min join yoiai keská ea nimawe;
ea jakonmanin iboanaketian ea amayamawe.
134 Jonibaon ea jakonmanaketian ea amayamawe,
min jaskara iti yoia esébora en senenhati iki.
135 Min yonoti iketian ea jakonhakin oinwe,
jainxon min esébo ea onanmawe.
136 Eara kikínbiresi winiai,
min esé senenhayamakanaitian.
137 Ibó, miara atikeskabiakin jakon akai iki;
ja min yoia joibora pontébo iki.
138 Jatíbi ja ati min yoia joibora
atikeskabiakin yoia, itan ikonbo iki.
139 Ja min yoia joibo ayamakanaitianra en jakonma shinannai,
nokon rawíbora ja joibaon moa shinanbenota iki.
140 Ja min ati yoiabora kikin atikoma tanakaatiainbo winota iki;
jakopíra nato min yonotinin noia iki.
141 Eara jawemabi iki itan iresabires iki,
ikaxbira ja min yoia esébaon ea shinanbenoyamaa iki.
142 Ja min atikeskabiakin akaira jatíbitian jakon iki,
itan ja min axeti yoibora ikon iki.
143 Masá teneti meran itan atikoma meranra ea iká iki,
ikaxbi ja min senenhati esébaonra ea raromaa iki.
144 Jatíbitianra ja ati min yoia joibo atikeskabiakin min yoiabo iki;
¡Janon ixon onan shinan ea meniwe!