Ibon koshi tsonna keskáma kikin
118
Ibora jakon iki itan jawen noimisti shinanra jatíbitian iki,jaskara iken iráke akanwe,
2 Israelitabaon yoibanon:
“Ibon noimisti shinanra jatíbitian iki”, akin.
3 Ikon sacerdotebaon yoibanon:
“Ibon noimisti shinanra jatíbitian iki”, akin.
4 Ja Ibo rabiaibaon yoibanon:
“Ibon noimisti shinanra jatíbitian iki”, akin.
5 Masá tenekinra en Ibo kenaa iki;
janra ea ninkáxon ea xabáin pikoa iki.
6 Ibora ebetan iki; eara rakéyamai.
¿Joninki ea jaweati iki?
7 Ibora ebetan iki; janra ea akinnai.
¡Ja ea omisaibora, moa jatoareskana en ointi iki!
8 Iboki chipótira jakon iki,
westíora joniki chipota keskáma.
9 Iboki koshitira bebon jakon iki,
joni koshiboki koshia keskáma.
10 Jatíbi mainmea jonibaonra ea katea iki,
ikaxbira Ibon janenko en jatoaresa iki.
11 Jatíbiora ea kateaketankana iki,
ikaxbira Ibon janenko en jatoaresa iki.
12 Ea kateaxa bina keska ikana iki,
ikaxbi jaton sinára, chiikan moxa akai keskáakin keyoa iki;
ikaxbi Ibon janenko en jatoaresa iki.
13 Pakénon ixonra jakonmakin ea koshín werankana iki,
ikaxbira Ibon ea akinna iki.
14 Jan ea koshi meniai Ibokira ea bewai.
¡Já riki jan xabaai!
15 Ja ikon senen jonibaon xobonra,
jatoaresxax iti raroshaman bewábo jake:
“¡Ibon koshínra en jatoaresa iki!
16 ¡Ibon, koshira tsona keskáma iki!
¡Ibon koshínra en jatoaresa iki!” iki.
17 ¡Eara mawáyamai, eara jaresti iki
ja Ibon akábo yoiti kopí!
18 Ja Ibonra akonbireskin ea masá tenemaa iki,
ixonbira ea mawámayamaa iki.
19 ¡Ibo rabiti xobo xepótibo kepenkanwe,
Ibo irake aki ea jain jikinon!
20 Nato riki Ibon xepóti,
ja akonkin joi senenhaxonaibora jain jikiti iki.
21 Ibó enra mia iráke akai, min ea ninkáxona kopí, itan
mia iki ea jan xabaai.
22 Ja xoboaibaon iresbiresa akana makanra,
japari axon jaki xoboakin peoti,
kikin jakon makan baneta iki.
23 Nato jaskara jan akára Ibo iki,
jaskara aketianra noa ratékana iki.
24 Nato nete riki Ibon jawen koshín jawéki aká:
¡Beneshaman, itan raroshaman inon akanwe!
25 Ibó, noapari ¡Kishpinmawe!
Ibó, noapari ¡Jakonbires kanón ixon akinwe!
26 ¡Ja Ibon janenko joai jakonbires jobanon!
Ja Ibon xobonkoxonbira, non mato jakon shinanxonai.
27 Ja Ibora, Dios iki; ¡Janra jaskati jati noa onanmai!
Moa fiesta akin peokanwe,
jainxon yoina machanbo menoti ikainko,
jiwi ponyanbo bokanwe.
28 Enra mia iráke akai,
en mia rabiai, mia kikin iketian
mia nokon Dios iketian.
29 Ibora jakon iki, jawen noimisti shinanra jatíbitian iki,
jakopi iráke akanwe.