Iráke akin orana
116
En yokatabo ea ninkáxonketianra en Ibo noike,2 ea akonkin ninkata kopíra.
¡Ea jaai kaman en yokáti iki!
3 Mawakanra jawen nishibaon ea nexayona iki,
ja mawá kini masá tenetiainra ea nokota iki,
ja preso ikax raketi, itan chexakaatiainra ea iká iki.
4 Jatianra en Ibo janexon orana iki,
ea jamaparinon ixonra en yokata iki.
5 Ibora atikeskabiakin jakon akai iki, itan noibamis iki;
non Ibora jatíbinin noimisti shinanya iki.
6 Ibonra iiosmabo koirannai.
Ea moa koshioma ikenra, ea akinna iki.
7 Ramara, jawe iamakin jakiribi en moa jakon shinannai,
Ibo ebetan jakon iká kopí,
8 mawáinoa ea tsekaa iketian,
winitiainoa itan jakonmain pakétiainoabi ea xabáaka iken.
9 Nato neten ea jaai kamanra,
ea Iboki yoiti ikai.
10 En masá teneai ani ikenbira, ea Iboki koshi jeneyamaa iki.
11 Jan manáti shinanhoma ixonra en yoia iki,
jatíbi jonibora janso iki ixon.
12 ¿Jatíbi jakonhakin ea aká kopíki,
jawekeskáaxon en Ibo kopíati iki?
13 ¡Ea xabaa kopíra en Ibo irake akai,
jawen janenkora en yokáti iki!
14 Jatíbi min jonibo bebonxonra,
ja Ibo axonti yoiabo en senenhaxonti iki.
15 Já noia joni mawataira, Ibon akonbireskin shinanai.
16 ¡Nokon Ibó, eara min yonoti iki!
¡Eara min yonoti ainbaon bake iki!
Jan ea nexaa risbibora min ras aká iki.
17 En mia jawéki meniaitoninra, en mia iráke ati iki.
Ibó, min janenkora en yokáti iki.
18 En Ibo axonti yoiabora,
jatíbi jonibo bebonxon en senenhati iki,
19 ja Ibo rabiti xobonko jikiti xabábo ikainxonra en ati iki,
¡Jerusalén, jema napónbekonxonra en ati iki!
¡Ibo rabikanwe!