Non Dios iki naikan
115
Ibó, noara iamai, minbix rábikawe;¡Mia noimis, itan akonkin senenhai kopí minbix rábikawe!
2 ¿Jawekopíki ikonma Dios rabiaibaon,
jaweranoki non Dios iki ixon noa yokáti iki?
3 Non Diossa naikan iki,
janra jawen keena keská jatíbi aká iki.
4 Ikon Dios ikonhayamaibaon ja rabiti akábora, oro itan plata iki,
jara jonin jawen mekemanbi aká jawékibo iki,
5 jabora kexaya iki, ikaxbira yoyo iti atipanyamakanke;
jabora beroya iki, ikaxbira ointi atipanyamakanke;
6 jabora pabíkia iki, ikaxbira ninkáti atipanyamakanke;
jabora rekinya iki, ixonbira xeteti atipanyamakanke;
7 jabora mekenya iki, ixonbira meeti atipanyamakanke;
jabora taeya iki, ikaxbira niti atipanyamakanke;
¡Westíora joibira jawen tetonhainoax pikóyamai!
8 Ja rabiti akana keskáboribi riki,
jan akaibo itan ja ikonhaibo.
9 ¡Israelitabó, Iboki koshikanwe!
Janra noa akinnai itan noa koirannai.
10 Ikon sacerdotebo, ¡Iboki koshikanwe!
Janra noa akinnai itan noa koirannai.
11 Mato ja Ibo rabiaibó,
¡Jaki koshikanwe!
Janra noa akinnai itan noa koirannai.
12 ¡Noaakin shinanxonra Ibon,
jakonhakin shinanti iki!
Israelitabora jakonhakin shinanxonti iki,
ikon sacerdotebora jakonhakin shinanxonti iki,
13 kikinbo itan kikinmabo inonbira,
já rabiaibo jato jakonhakin shinanxonti iki.
14 ¡Maton bakebo, itan maton bakebaon bakebo
jainoax jabaon chiní bakebo mato Ibon kaimaxonbanon!
15 ¡Ja nai betan mai jonia Ibon,
jawen jakon shinanman mato jakonhabanon!
16 Ja naira Ibona iki,
jatian ja maira joni menia iki.
17 Mawatax moa jawebi ninkáti yamanko boabaonra,
moa Ibo rabiti atipanyamakanke;
18 ikaxbi rama axon
itan jatíbitianra non rabiti iki.
¡Ibo rabikanwe!