Iboki iká bená bewá
(1 Crónicas 16.23-33)
96
Ja bená bewá Iboki bewakanwe;jatíbi mainmeabo Iboki bewakanwe;
2 Iboki bewakanwe, jawen jane rabikanwe;
netetiibi chibanmakin jawen kishpinti joi yoikanwe.
3 Jara ani koshi iki, itan jawen jawéki
akábora jan ratétibo iki ixon yoikanwe,
jatíbi jonibo bebonxon itan maibotiibi
ikábo bebonxon yoikanwe,
4 jaskara ikenra, Ibo kikin iki
itan ayorakin jakonhakin rabiti iki:
¡Jatíbi diosbo winobain onsá riki!
5 Wetsa jemamea jonibaon diosbora jawemabi iki,
ikaxbi Ibonra naibo aká iki.
6 ¡Já ikainra kikin penébires iki!
¡Jawen xobonkora já koshi iki, itan kikin metsá iki!
7 Rabikanwe, Ibo, jatíbi ja maton bakeyaxonbi,
jaskara ikenra Ibo ani koshi iki itan kikin jakon iki;
8 jaskáakin atibi iketian, Ibo rabikanwe;
ja rabiti xobo meran iká jema xaba ikain, jawéki boxoni jikikanwe,
9 jawen metsá rabiti xobonkonia Ibo rabikanwe.
¡Jatíbiainoa jonibo já bebonmeax saki ibakanon!
10 Maibotiibi ikábaon yoikanwe: “¡Ibora Apo iki!” akin.
Janra jainbiribi iti nato nete aká iki, taxkétimaakinra aká iki;
janra koshi ixon senenbires jato ikinnai.
11 ¡Mai itan naibo ikainoabo rarokanwe!
¡Ibanon ja aniparo, itan jatíbi jain ikáboyabi onsati xoo iki!
12 ¡Mai xabá rarobanon, itan jatíbi jain ikábo rarobakanon!
¡Ja niikamea jiwibo raroi saí ibakanon,
13 ja Ibo joai bebonmeax saí ibakanon!
¡Jaskara riki, janra nato main koshi ixon jato ikinni joai,
itan nato netemea jonibo ikinkinra jakonhakin
ja atikeskabiakin ati iki!