Iboki raroi bewanon akanwe
95
Neri bekanwe, raroi Iboki bewanon akanwe;jan noa panaaki itan noa xabaaki bewanon akanwe.
2 Já bebon kaxon irake anon akanwe,
já rabii jakon iketian bewábaon bewanon akanwe.
3 Jaskara kopí, ja Ibo kikin Dios iki,
jara jatíbi diosbaon koshi Apo iki.
4 Ja kikin chichó mai ikábora,
jawen mekenman iki;
ja manan kikin keyabora jawena iki.
5 Jakopíra jan aká ikax, ja aniparo jawena iki;
¡Jawen mekebaonra mai manxan aká iki!
6 Neno bekanwe, chirankooxon rabinon akanwe;
Ibo bebon chirankoonon akanwe,
janra noa jonia iki.
7 Jara non Dios iki, noabora jawen joni iki;
noara jawen carnero tsamá keskábo iki.
Rama jan mato yoiai ninkakanwe:
8 “Meribáinoax ikáni keskati,
maton jointi chorishyamakanwe;
ja tsoa jonibi jain jaama, Masáh mainkoniax ikánni keskáyamakanwe,
9 jatianra maton rekenbaon ea tanaa iki,
en aká jawékibo oinxonbira ea akana iki.
10 Chosko chonka baritiara, ja joniboki
ea sinata iká iki,
jatianra en jato yoia iki: ‘Nato jonibora benotabo ikana iki;
¡En ati yoiabo ayamaira yoitimakana iki!’
11 Jakopíra sináxon, en jato akonkin yoia iki,
nokon jain tantiti ikainra jikikantima iki”, akin.