Diossen jawéki akábora ratétibires iki
66
Jatíbi ja main jakanabo,raroanan Dioski bewakanwe;
2 jawen jakon janeki iká bewábo bewakanwe;
aniakin jakonman rabii bewakanwe.
3 Dios yoikanwe:
“Min aká jawékibora jan ratétibiresbo iki.
Min ani koshin imaara, min
rawíbo mibebon kikinni raketi pakékanai;
4 jonibaonra jatíxonbi mia rabikanai,
itan min janeki iká bewábora bewakanai”.
5 Diossen, aká jawékibo oinni bekanwe,
jonibo axonkinra jan ratéti jawékibo aká iki:
6 aniparora mai manxan banémaa iki,
itan non rekenbaon taenbires paro shitakana iki;
¡Dioski raronon akanwe!
7 Jawen koshinra jatíbitian jato ikinnai;
maibotiibi iká jonibora oinkin jeneyamai,
yoitima jonibo Dioski bechiakenaketianra oinnai.
8 ¡Maibotiibi iká jonibó, non Dios rabikanwe!
¡Jan rabiti bewábo bewakin jato ninkámakanwe!
9 Jaskara kopíra noa jamaparike;
noara pakémayamaa iki.
10 Non Diossé, minra noa tanaa iki,
¡Plata ati keskaakinra kerásma itiakin min noa aká iki!
11 Ani rikankora min noa pakémaa iki;
anibires iwera min noa papimaa iki.
12 Min amaara wetsabaonbires noaaresa iki;
jene meran itan chii meranra noa winota iki,
ikaxbi senentiainbira icha jakonhain min noa pikoa iki.
13 Min xobonkora ea jikiti iki, jatianra mia menikin yoina keyokin en menoti iki;
jaskáaxonra ja en ati iká en senenhati iki,
14 ja onsáin ixon mia axonti en yoiabora en senenhati iki.
15 Xoashaman yoinabo boxonra,
keyokin en mia menoxonti iki;
waka benebo betan cabra benebora en mia meniti iki,
itan ja carnerobora en mia menoxonti iki.
16 ¡Jatíbi matobo ja Dioski raketaibo neri bekanwe!
¡Ninkakanwe, ja ea kopi aká
jawékibo en mato yoinon!
17 Nokon kexakan kenaxonra, en rabia iki.
18 Ea jakonma shinanya iketianra,
Ibon ea ninkáyamakeanke,
19 ¡Ikaxbira ea jan ninkata iki, jaskákinra en oranketian ea akinna iki!
20 ¡Dios jakon ibanon,
en oranara ea ninkáxona iki,
itan jawen noimisti shinanra ea washíyamaa iki!