Diossa atibi rabiti iki
65
Siónhainoa Diossé,¡Miara atibi rabiti iki!
¡Axonti yoia ixonra atibi mia senenhaxonkanti iki,
2 jaskara kopí mia orankana ninkáwe!
Jatíbiainoaxa miiba bekanai.
3 Non jakonmabaonra noaaresai,
ikaxbi minra ja non ochabo moa noa shinanxonyamai.
4 Ja min katota jonira raroai,
jatianra mí patax inon ixon, ja min xobo chitébo ikain jati min boai.
¡Ja min jakon xobonko iká jakon jawekibo menikinra min noa maxkámayamai!
5 Non Dios itan noa jan xabaai,
atikeskabiakin akinra jakon teebo min noa axonai;
jatíbiainoaxa miki koshikanai,
ja ochokea aniparo ikainoaboribira miki koshiai;
6 min atipana koshinra, manánbo taxkémayamakin min jainbi imai.
7 Minra bechon xoo ikai tantimai,
itan jonibo saa ikaira min tantimai;
8 ja ochokea maibaon jakanabobira,
jaskara iosma ratéti jawékibo min
aká oinnax, raketi saki ikanai;
bari pikotaiorikeax, bari jikiaiori kamanra,
mia kopi raroi saí ikanai.
9 Minra mai koirannai;
oi bemaxonra banábo min xoxomai,
minra, icha weanbaon onpaxen,
trigo banábo xoxomai.
¡Jaskáaxonra jain banati maibo min benxoai!
10 Minra jain banati mai taeshokobo mechaai,
itan ja maibora min masenenhai;
icha oi bemaxonra mai min wachoai,
jatianra jakonhakin yoábo min icha bimimai.
11 Minra ja baritian ichayora jawékinin
jakonhakin jato akinke,
min nai koinmanra icha oi maanmai;
12 tsoa jonibi jain jaamainkonia pastobora paxashamanbo iki,
jatianra manánbo jaton raotibo saweax metsáshaman ikanai;
13 ja mai masenen ikainbora carnerobaon bochoa iki,
ja mai teshanpabora trigoninbires bochoa iki.
¡Jatikaxbira bewakanai itan raroi saí ikanai!