Ibora nobé iki
46
Diossiki jawenbi jaweatimai noa jaki chipóti, itan noa jaki koshia;non masá teneaira noa akinnai.
2 Jakopíra noa rakétima iki,
mai ras ikainbi, itan aniparo
napon manánbo jikiainbi,
3 aniparo bechoni onsati xoo ikainbi, itan
jaskati onsataitian manánbo shakotainbi.
4 Paro taen jene baitaitoninra,
Diossen jemamea jonibo raromai,
jara koshi Diossen wetsa jemabo xewina
bebonbires jakon iki.
5 Diossa ja jema napon iki, janra tewanai;
Diossenra nete xabataitian jato akinti iki.
6 Maibotiibi iká jonibora saa ikanai, apobaon jato ikinna jonibora saki ikanai,
Diossen yoyo ikin ninkámaara mai reokootai.
7 ¡Jatíbi atipana Ibora nobetan iki!
¡Jacobnin Diossa, jawenbi jaweatimai noa jaki chipóti iki!
8 Oinni bekanwe, ratetibires jawéki,
nato main Ibon aká:
9 Reteanantibora moa jenémake,
nato nete pasenena ochóbobira imake:
kanótibora moa keyo sekea iki,
kensho jawékibo moa beshea iki,
¡Janmeax reteananti carrobora moa keteake!
10 “¡Moa reteananyamakanwe! ¡Onankanwe
eara Dios iki!
¡Eara maibotiibi ikábo manahon iki!
¡Eara jatíbi mai manahon iki!”
11 ¡Jatíbi atipana Ibora nobé iki!
¡Jacobnin Diossa jawenbi jaweatiamai noa jaki chipóti iki!