41
¿Ja ani yoina Akoron Leviatánki,mishkitinin min biti atipana?
¿Jawen janaki risbikan min nexati atipana?
2 ¿Repéxonki risbikan min renexti atipana
iamax yami wekikan jawen koi pekatiki min atipanti iki?
3 ¿Noibakin min jaweayamanon ixonki mia yokáti iki,
jakonshoko joinmein mia yokáti iki min raannon ixon?
4 ¿Ibánon ea jatíbitian min iboaxon yanka yonoai akinmein mia yoiti iki?
5 ¿Westíora isáshoko betan ikai
keskatimein mia jabé tsiniti iki?
¿Min bake ainbobo jan tsininon ixonki min nexati iki?
6 ¿Jain jawéki marokanainko boxonmein,
bikanon ixon jati kopía riki akin jato yoikanti iki?
¿Maronoxonmein beshéakin ja namiaibaon xatepakekanti iki?
7 ¿Jawen bichimein pian bebankin min tsakati atipanti iki,
iamax jawen mapomein chikáronin
min bebánkin chachiti atipanti iki?
8 Ja yatankasi mia ikábira, bebon koshi iketian,
ja shinanbenotimai mia jabé reteananti iki,
jatianra jawetianbi jakiribi yatankasi mia itima iki.
9 Ja ani yoina Akoron Leviatán oinnatonbichora,
tsoa inonbi raketi shinan keyoti atipanke.
10 Teakanara sinatai;
tsoabira jabé reteananti senenma iki.
11 ¿Tsoa, jabé reteananaki jatíbi jakonbires isinama
itan rakéyamai joti iki?
¡Nato netenra tsoabi jabé reteananti senen yamake!
12 Jawen taebora koshi iki,
jawen yorara wetsa yoinabo bebon koshi iki,
ixon yoikinra en jenetima iki.
13 ¿Tsonki jan rapoa bichi raopeti atipana,
iamax tsonki jan rapoa jawen yami xopananti
chorish oke bebankin pekati iki?
14 ¿Tsonki kechopeti iki,
jawen xetabo chichó onsá iketian?
15 Jawen kaxobora yami panáti kerex chorish joyóbaina makan keská iki.
16 Jawen xakábora wetsabo betan bianananbotana kikin kerex iki,
jawe niwebira ja xakábo xaran bebati atipanyamake.
17 Ja jaskara jainbicho bianana ikax kikin tsitsí iki,
tsonbira jainoa pasketi atipanyamake.
18 Já jatishan ikara kaná ikai keská iki;
jawen berora bari pikotai keská pené iki.
19 Jawen kexainoaxa chii jokonai,
jaskataxa ja chii janbisai.
20 Jawen rekinhainoaxa koin jokonai,
ani kentí kobinnai keská riki.
21 Jawen joinnatonra tsiste ketetai, itan
jawen kexakameaxa chii jokonai.
22 Jawen texora kikin koshi iki,
jaskara iketianra jatikaxbi já bebonmeax kikin jaki rakékanai.
23 Jawen yora namibobira, jawenbi pekatima chorish iki,
yami chara keská chorish riki.
24 Jawen jointira shanka keska chorish iki,
jan reneti makan keska chorish iki.
25 Já wenitaitianra diosbo ratetai,
kikinni saki iananbira raketi jabákanai.
26 Espada, chikáro, pia, lanzabaon inonbi isinhakin chachiara jawemabi iki.
27 Jara, yamínbi, iamax yami bronceninbi retetima iki,
jabora jawena nii pei keskáres iki,
broncera jiwi payo keská iki.
28 Piabaon tsakáara jabáyamai;
já makaman tsakáara pei choshin aká keskáres iki.
29 Mazón rishkiara tawan aká keskares iki;
tsatsi taxobo keotai ninkáxonra osanai.
30 Mexokai kakinra jawen pokón mano taeabainnai,
jan bero xemeti yami xetaya kenshon ati keskáakinra akai.
31 Kentí kobinai keskáakinra aniparo nemin saman mayámai,
raoati jawéki meskokin, ani kentikan kobinha keskára ikai.
32 Jan kaara jenenko joxo bakox pené joyókainai,
itan box penéshaman parata keskára ikai.
33 Nato netenra já keská yoina yamake;
jawetianbira tsokibi rakéyamai.
34 Koshin rabitaibora jato bechiteai,
jara jatíbi yoina sinábaon apo keska iki, akinra Diossen aká iki.