40
Ibonra Job yoiribia iki:2 Eakaya jatibi atipana ikenbira, ebé joi benxoatinin mia keena iki,
“¿Ea yoikasiki mia jenetamapari iki?” akin.
Job Dios betan yoyo ika
3 Jtianra Jobnin yoia iki:
4 “¿Ea jawemabishoko ixonki,
en mia jawe yoiti iki?
Ea netetakayara jakon iti iki.
5 Ichaira en moa yoyo ike,
tekikin en ja yoitira moa yamake”, akin.
Diossen Job joi yokáboresa
6 Jaskáketianra, niweaba meranxon Job Ibon yoia iki.
7 Ikon koshi shinanya ixon,
ea oinmawe, ja en mia yokataibo ea yoiwe:
8 ¿Jakonma akama keská inoxonki min akai, ja atikeskabiakin ayamai ikax,
jakonma akátonin min ea yoinkin?
9 ¿Miaki ea keska koshi iki?
¿Mia yoyo ikáki min joi tirin ikai, ja nokona ikai keskati?
10 Iresama itan kikinbires onanti iwé,
jatianra jonibaon kikin jakonman mia yointi iki.
11 Jatíbi rabitaibo oinxon,
min siná pikoxon,
min atipana keská bebonbires jato masá tenemawe,
itan jato namanbires shinanmeemawe.
12 Min oinnatonres jato poxawe,
jawerano inonbi jakonmabo jato pachowe.
13 Jato retea pekáo jatíbi jato miinwe,
jain mawábo ikain jato xepowe.
14 Jatianra ikon riki ixon enbishaman onanti iki,
min koshi shinanman amaa minharesa riki ixon.
15 Ani yoina Behemot oinwe,
jara mia aká keskaakinribi en jonia iki:
janra wakabaon akai keskaribiakin xobi piai;
16 oinwe jawen kishi namibora kikin koshi iki,
itan jawen koixaobora kikin koshi iki.
17 Jawen jinara koman keská chorish iki,
jawen tae tonko rexkebora kikin rastonbo itan nexaa tonkobo keská iki.
18 Jawen xaobora bronce tubo keskábo iki,
yami tonron keskábo riki.
19 Ja en jonia yoinara jatíbibo xewinna bebonbires kikin jakon iki;
eabichoresiki, jato jonia ixon,
jato reteti atipana.
20 Jain pimis yoinabo tsiniai niikameara,
xobi itan pei piai.
21 Tantiira, moxa jiwi lotobo naman rakatai,
iamax taxbainoa tawa meranra jonetai.
22 Ja jiwi peibaonra otaai,
wean kexakea álamo jiwibaon kateaketana riki.
23 Paro jenetiakenbira ratéyamai;
jawen rekinhain jene senenkenbira jakonbires iki.
24 ¿Tsonki yatanxon okenbekonbi jawen bero tsekati atipana,
iamax tsonki repéxon risbikan renexti atipana?