39
¿Jatian manish meranoa chivobo bakenaiki min onanna?¿Chaxo awinbo bakenaiki min oinna iki?
2 ¿Minki onanna jawen benen aká pekáoki jaweti oxe bakenai?
3 Bakenira tsaotai,
jatianra jaton bakebo pikotai pakéyamai.
4 Ishtonbiresa koshikanai, xabáinoa xobi piira aniai,
jaton tita potaax wetsanko boaxa,
moa bewetsayamakanai.
5 ¿Tson imaaki nii meranoa burrobo,
tson jaweatima jatonbiribi jaabo iki?
¿Tson imaaki jatonbiribi nireskanai?
6 Enra jain jati onantiakin jato axona iki,
jain jawebi xoxoyamai mai,
itan ja manan teshanpa ikain.
7 Jabora jemameax riri ikai ninkátinin keenyamai,
burrobo teemai jawen ibo saí ikaiboribira ninkakashamai.
8 Xobi benaira mai matóbotiibi kawanhatanai,
ja pinoxonra wetsabires inonbi xobi yankonabo benai.
9 ¿Minki ikonhai ja nii meranoa waka benen mia tee akinti,
min shinannaki min chiké meran oxati iki?
10 ¿Minki atipana jiwiki nexaxon
akáshamaibi mai chirinmakin,
iamax akiati iki mí pekáo kakin mai beshéabokin?
11 ¿Ja kikin koshi iketianki, jaki koshiti min
shinannai, itan min teebo axontininki mia keenai?
12 ¿Min shinannaki ja yoá tsekaabo tsinkimaxon,
jain benxoati ikain min tsinkimaa ati jisá iki?
13 Minra ointi atipanke peia yoina avestruz:
raroshamanra pea pea ikai,
manxaman pechi ikai keskati,
14 jaskákinbira, bari xanan aká toshínon ixon mashi xantoaxon,
jawen bachibo mapoxon potaresai.
15 Ja bachibora jamáxon toshakanti iki ixonra shinanyamai,
wetsabires yoinaninra jamáti iki ixonra shinanyamai.
16 Jawen bake beshébora isinhai,
jawenamabo keskáakinra akai, yanka ea teetara itiki ixonra shinanyamai.
17 Enra jaskáaxon jawéki ati onan shinan, itan
jaskatax jakon iti shinanribi en meniamaa iki.
18 Ikaxbi wenitax moa ishtoi kakinra,
ja kabayobo itan jan peyaka
jonibo jato osánbainai.
19 ¿Minki kabayo koshi menia iki,
jan raota jawen texonkonia booki min axona iki?
20 ¿Min imaaki chanpo ikai keskati choronai,
ja rabíkin onsati pere akin joinnaiki min imaa iki?
21 Rabíkin jawen taen mai wasaara, mai
teshanpain jakonma poto keyatai,
itan rakéyamaira reteanantiain kaai.
22 Onsá jawéki oinxonra osanai,
jara ratéyamai, espadaya
jawen rawí sontárobo oinnaxbira rakéyamai,
23 ja kabáyonin peyaka jonin kikinhakin
pia neá chori chori akaibi,
lanzabo itan tsatsitaxobo potaa joéboanainbira rakéyamai.
24 Ja kaainko ishton nokóti kopíra,
yoinanin jawen nami keyokin
ishtonbires piai keskati,
tson chitetimai kikinni ishtoai;
moa jato ati yoii trompeta xoon iketianra,
jainbi chankáti atipanyamake.
25 Trompeta xoon ikai ninkataxa kabayobo keotai,
ja reteanankanai itsara ochóxonbi xeteai,
moa jato akanwe ikai joira ninkatai
itan saí ikanairibira ninkatai.
26 ¿Minki halcón tetébo noyati onanmaa iki,
minki onanmaa iki, kikinni keyatax surhori noyai kati?
27 ¿Min jain ati yoiaki akai
ishminman manan maxkaten naakin?
28 Jabora jatíbitian shanka manan maxkaten jake,
ja manan keyára jaki koshia, itan jain jonetai iki.
29 Bochikixonbi oinkinra ja bikasai yoina merai.
30 Jawen bakeshokobaonra jimi xeai,
jaweranoki mawá rakata,
jara jain iki, akin aká iki.