Diossen Job yokata
38
Niweaba meranxonra Ibon Job yoyo aka iki.2 ¿Miaki tsoa iki, nokon shinanman en akaibi, ayamarai iki ikáx,
min onanmanin imaa jaskatibo mia yoyo iti?
3 Rama min koshi ea oinmawe, nato en mia yokataibo ea yoiwe:
4 ¿Jan mai tewanabo en akaitianki,
mia jawerano iká iki?
¡Ikon onan ixon ea yoiwe!
5 ¿Minki onanna, jatio iti shinanxon jan nete toponaki tsoa iká iki, itan tsoaki iká iki jan aká ixon?
6 ¿Jawekiki jan mai tewannabo perakaa?
¿Jan tewanti koshi ani makanki, tson aká iki,
7 ja nete xabataitian ikai
wishtinbo bewakanaitian, itan ja nokon yonoti ángelbo rarokanai kaman?
8 ¿Mai meranoax aniparo jene jokonaitian,
moa iamanon ixon,
jan ani xepótibaon xepoaki tsoa iká iki?
9 Nai koinra, aniparon chopa keská iti en imaa iki,
itan ja wishnin koinra, jan bake rakoti keská iti en imaa iki.
10 Jain senenres itira en aniparo aká iki,
jawen ani xepótibora llaven akai keskáakin, jenen mai maponaketian en xepoa iki.
11 Enra yoia iki: “Neno senenresa mia iti iki,
nenoaxa mia bebon winótima iki;
neno senenresa min onsá bechon tsakati iki”, akin.
12 ¿Wetsatianboki min jaskáti yoia nete oxneta iki, itan nete xabáta iki?
13 ¿Jainxon jawen joekan mai tenaketian,
jakonmabo jóneti bokantiki min yoia iki?
14 Ja mananbo pekáokeax bari pikóxon
tenaa, chopa pokoa keská jawen chexe joshin ikaitianra;
15 jakonmabaon ja joé meran ikáshamakin omisai,
jatianra jain senenres jaton ramiamisti onsá keyotai.
16 ¿Aniparo xaman tsonbi onanama,
jainoax jene jokonai oinniki mia kaa iki?
17 ¿Jain mawábo iká yamébires xepótibo ikain kaxonki min jato oinna iki?
18 ¿Maira jatio pextin iki ixonki min onanna? ¡Ikon jatíbi onan ixon ea yoita!
19 ¿Jan netea joé, itan ja yamébo jain benxokaataki jawerano iki?
20 ¿Ja mai senenainko boxonki, ja ikainko min beribati atipana?
21 ¡Minra onanke, icha
baritiaya ikaxa, jatian moa mia bake pikotabira iká iki!
22 ¿Wishnin matsi, itan oi xewa
jain en benxoa oinniki mia kaa iki,
23 minki onanna ja ramibires winótitian, itan ani reteanantitian,
jatoki raanoxon en jai aká?
24 ¿Jaweraoki kaná joékaini kaai?
¿Jawe keskataxki bari joaiokea niwe, nato main jatibiain janbisai?
25 ¿Tson bai kepenxonaki oi beaí,
tson jaó boti yoia boxonki niweabakan,
26 jain jawebi xoxoyamai mainko, itan
tsoa jonibi jain jaamainkoribi oi bemai,
27 jain jawebi xoxoyamai ikenbi mechaaxon
xobi xoxomati kopí?
28 ¿Oi itan nibikan papaki tsoa iki?
29 ¿Ja jene chorisha, itan nibí chorishaton titaki tsoa iki?
30 ¿Tson imaaki, jene chorixax makan keská chorish ikai,
itan aniparo bemakayan jene chorishai?
31 ¿Min imaaki, wishtin jainbicho tsamatax janbísshamakanai,
itan ja chaxon bai wishtinbo betan imayamakin, ja
wishmabo, kapé koi wishtinbo, jatonbiribi wetsa tsamabo min imaa iki?
32 ¿Min imaaki ja nete xabataitian pikotai wishtin jawen ititianbiribi pikotai?
¿Minki ja wishtin tsamatabo jawen jane Oso Awin ani, itan
Oso Awin maxko, jan kanon ixon min ponteai?
33 ¿Minki onanna ja naikanmea wishtinbaon esébo?
¿Min amaaki wishtinbaon nato mai tenai?
34 ¿Jenetianon ixon, min nai koin yoiaki oi beti atipana?
35 ¿Imayantiki wetsaori kanon ixon ja kaná min yoia: “Eara neno iki, ea kabatanon?”, iki.
36 ¿Tsonki akéni isá, itan atapa bene jaskara ati onanmaa iki?
37 ¿Tsoarin kikin onan, nai koinra jati icha iki ixon jan onanna?
¿Tsonki nai koin reoti atipana oi bexon,
38 mai poto chawánon ixon,
itan mai tonko chorishbo keyotax,
maibicho inon ixon?
39 ¿Miarin ja leónbo nami benaxonai,
jawen bakeshokobaon potókin pinon ixon,
40 jaton kininko jonéxon,
iamax jawen pokón rakáxon, xobi meranxon jawen piti manaitian?
41 ¿Tsoarin jan okabo pimai,
jawen bakeshokobo piti benai boanhatani,
koshín chión chión iananbi ea yokákanaitian?