42
Jatianra Jobnin Dios yoia iki:2 “Enra onanke minra jatíbi atipanke,
itan min atipanyamaara jawebi yamake.
3 ¿Tsoarin ea ja min shinanna jawéki min akaitian, ayamarai iki iti,
jaskaxon akonkin en onanama jato oinmai?
En onanyamaa jawéki ikenbira ja yoii ea yoyo iká iki,
kikin ratéti jawékibo ikenbi onanyamaax.
4 Minra ea yoia iki: ‘En mia yoiai ninkawe;
nato en mia yokataibo ea yoiwe’.
5 Rama kamanra, yoikanai ninkaxonres en mia onanna iká iki,
ikaxbi ramara nokon beronbi en mia oinke.
6 Jakopira jakonmaibo yoyo ika ikáx, moa iwetsayamai,
kikinni shinanmeetax, mai poton, itan chiimapon ea yakatai”, akin aká iki.
Diossen jakiribi Job jawékia imaa
7 Nato jawékibo Job Ibon yoia pekáora, Elifazsibi yoia iki: “Jaskara kopíra, miki itan ja mia jabé raenanai joni rabéki ea kikinni sináke, ea yoii yoyo ikinra ikon yoiamakana iki, ikaxbi nokon yonoti Jobninra ea yoikin ikon yoia iki.
8 Rama kanchis waka bene biax, itan kanchis carnero biax, nokon yonoti Jobhiba botankanwe, jainxonra mato kopibi, ea menikin keyokin maton menoti iki. Nokon yonoti Jobninra mato kopí oranti iki, jatianra ja orana en bixonti iki, jatianra jawe jakonmabi en mato atima iki, ea yoii yoyo ikin maton ikon yoiamaa iketian ati ixonbi, nokon yonoti Jobnin ea yoikin ikon yoia iki”, akin.
9 Jato jaskáa boxonra, ja Elifaz, Bildas, itan Zofarnin, ja Ibon ati yoia keskáakin akana iki, jatianra Jobnin orana Ibon ninkata iki.
10 Jabé raenanaibo kopí Jobnin orana pekáora, moa ikátiai keskaribi Diossen icha jawékia iti imaa iki, jatian menikinra moa jayá ikátiai bebonbires icha rabé tsamá menia iki.
11 Jatianra jatíbi jawen wetsabo, jawen poibo, jabé raenanaibo, itan moatianbi já onanna jonibo jaiba merati bokana iki, jatianra já betan jawen xobon ixon icha jawékiati axon pikana iki. Jabaonra onískinkana iki, jatíbi onsá jakonma jawékibo jaki raanxon Ibon masá tenemaa ikenbira, moa jakon shinan bimakana iki, jatianra westíorabaon jaweti icha koriki menikana iki, westíora oro meosotiribira menikana iki.
12 Jawen senenainoa baritiabaonra, ja winota baritiabaon aká bebonbires, Diossen jakonhakin shinanxonkin Job jawéki menia iki. Bebon icha jawékira menia iki, chonka chosko waránka carnero, sokota waránka camello, rabé waránka ja teemai waka benebo iká iki jainbicho kataxa westíora waranka, itan waránka burro awinboribi.
13 Jawen bakebora iká iki, kanchis benbo bake, itan kimisha ainbo bake.
14 Ja ainbo bake rekeman janera iká iki, Jemima, japekáo iká ki Cesia, ja kimisha itin ikára iká iki Keren-hapuc.
15 Nato netenra, Jobnin ainbo bakebo keská metsáshoko ainbobo jaweranobi yamaa iká iki. Jaton papanra, já mawáketian jaton poibo betanbi senenbires jawen jawéki biti jawen bakebo jato iboamaa iki.
16 Jaskata pekáora, pacha chosko chonka baritia jaa iki, jaskáxonra oinna iki, jawen bakebo, jawen bababo, jawen bababaon bakebo, itan jawen bababaon baken bababo.
17 Jaskatira kikinshaman yosi mawata iki.