2 wetsankoniax joá jonibo betan iamaira jatonbiribi ikana iki, jain charotaxa keshakana iki, noa ochaara ikon iki, itan non rekenbo ochaara ikonribi iki, ikira ikana iki.

3 Ja ikáinbopari ikanaitianra, kimisha hora kaman jato bebonxon jaton Ibo Diossen esé kirika koshin yoyo aka iki, jatian wetsa kimisha horaribira jaton ochabo keshakana iki, itan Ibo rabikana iki.

4 Japekáora ja Levitabo, Josué, Binuy, Cadmiel, Sebanías, Benui, Serebías, Bani itan Quenani, ja jainoax yoyo iti akana taponko mapékana iki, jainxonra jaton Ibo Dios koshin orankana iki,

5 japekáora levita Josué, Cadmiel, Binuy, Hasabnías, Serebías, Hodías Sebanías itan Petaías neskati yoyo ikana iki: “Weníkanwe, maton Ibo Dios rabikanwe jatíbitianbires. ¡Ja ani itan min jakon jane rabii, miki bewabakanon!” ikibo.

6 Jatianra Esdrasnin yoia iki: “Miabicho riki, Ibo, wetsara yamake. Minra ja nai, itan ja kikin bochiki iká nairibi aká iki, jain iká jatíbi wishtínboyabi; jainxonra ja mai, itan jain iká jatíbi jawékiboribi min aká iki, ja aniparobora min aká iki, jain iká jatíbi jawékiboyabi. Minra jatíbi jawékibo jati meniai. Jakopíra naikanmea wishtinbaon mia rabiai.

7 Mia riki Ibo, jan Abram katoni Dios; minra Urhainoa pikoa iki, ja caldeobaon jemamea, jaskáaxonra Abraham akin min janea iki.

8 Min oinna iki ikoni miki koshia joni, jaskara ikenra min jabé ja senenhabekonti joi aká iki: Minra yoia iki, ja cananeobo, hititabo, amorreobo, ferezeobo, jereseobo jainoax gergeseobaon mai jawen chiní bakebo meniti; ¡Min joira min senenhaa iki, jaskara ikaxa mia jatíbitian joi senenhai iki!

9 Egiptonkoxon non rekenbaon jaskaakin masá teneaira min oinna iki, jainoax ja Joshin aniparo kexakeax, masá tenei onisi yoyo iananbi winii saa ikanaira min ninkata iki.

10 Jaskara iosma ja oinxon onanti ani jawékibo, itan ratéti jawékibora min aká iki, faraón, jainxon jawen yonotibo, itan jatíbi jawen main iká jonibaon, israelitabo jakonmakanai oinxon. Jaskara aká ikaxa, anibires jakon mia rama ninkakaatai.

11 Oinkankenbira jato bebonxon aniparo min chopémaa oken ibékona iká iki, jatianra ja bai napo mai manxanman shitákana iki, jaskakenbira jato chibani boaibobiribi aniparo xamanko jene meran min jato potaa iki, jene nemin ikain makan potaa keskára ikana iki.

12 Jainxonra ja nai koin pania chibanmakin min jato neten boá iki, jatian yaméra jan bokanai bai joénti, chii tirí pania min imaa iki.

13 Japekáora Sinaí manan ikain mia paketa iki, jatianra naikameaxbi mia jato betan yoyo ika iki; minra jato menia iki, atikeskabiakin ati joibo, jan axeti ikon joibo, esébo itan ja senenhati koshi joibo.

14 Ja tantiti nete mia mekéxontiribira min jato axea iki, jainxon ja senenhati joi, ja ikon joibo, jainoax esébo itan jan axeti joibora ja min yonoti Moisés meranxon min jato onanmaa iki.

15 Ja pikáskanai jan jato tantimatira naikanmea piti min jato menia iki, jainoax jan jato nómi tantimatira shankamea onpax min jato menia iki. Jaskáa pekáora, jato meninoxon min jato yoini mai moa iboakin bii jain jikikanon ixon min jato yoia iki.

16 Ikaxbi jabo betan non rekenbora rabitaibo, itan jaton keena keskáres akaibo ikana iki, jaskakinra ja min koshi joibo senenhayamakana iki.

17 Yoitira ikashamakana iki, jato akinkin jato kopi min ani jawékibo akára shinankashamakana iki. Kikinbires jaton keena keská akaibo ixonra, Egiptonko jakiribi inakaati kati jan jato ioti jaton koshi janekana iki. Jaskara ikanainbi, mia riki jaton jakonma akábo shinanxonhisma Dios, akonkin noibamis Dios, jakonma ikanaitian jato onisai, ishtonbires sináisma, jatíbi noi Dios, jaskara ixonra min jato potayamaa iki.

18 Senentiainbira jatonbi waka bake bene jisáakin yami charaxon akáx, natora non dios iki ikana iki, janra Egiptonkonia noa pikoa iki ixonra, mia akonbireskin jakonma shinanmakana iki,

19 kikinbires noibamis ixonra, tsoa jonibi jain jaama mananman min jato potabainyamaa iki. Nete iketianra jan bokanti bai jato pontexonti kopí, ja nai koin pania ochóyamaa iki, ja chii tirí paniatonribira, yamé iketian jan bokanai bai min jato joénxona iki.

20 Jainxonribira min jakon shinanman onan ikannon ixon, onan shinan min jato menia iki; jawetianbira ja pikanti maná maxkámayamakin min jato menia iki, jainxonra jan jaton nómi tantimati min jato onpax menia iki.

21 Chosko chonka baritia senenra tsoa jonibi jain jaama mananman ikanaitian min jato piti menia iki, jawebira min jato maxkámayamaa iki: Jaton chopabora payóyamaa iki, jaton taeboribira soo iamaa iki.

22 Apobaon jemaboyabi jaton maibo min jato meniara, mai toponxonbo bikana iki, itan Hesbón maira iboati min jato menia iki, jara apo Sehónman mai iká iki, jainoax Basán mai, jara apo Ogkana iká iki.

23 Min jato bakeamaara naikanmea wishtíntii icha ikana iki, jaton rekenbaon iboakin biti min jato meniti yoini mai bikannon ixonra min jato boá iki.

24 Jaskara iketianra Canaán main jikixon jatoareskana iki; ja mainmea jonibora jato bebon min jato naman shinanmeema iki, jainoa jaton apobo itan ja mainmea jonibora iboakanon ixon itan jaton keena keská akannon ixon min jato menia iki.

25 Jainoaxibira makan chikeya jemabo, itan jain jawéki xoxoai maibo, kikin jakon jawékibo jain bochoa xobobo, pozobo, uva waibo, olivo waibo, jainoax wetsa icha yobín jiwibora iboakin bikana iki; potóakin piira xoákana iki, aniakin noibaxon min jato menia akíra rarokana iki.

26 Ikaxbi yoitimabo ixonra, miki ramíkin, min esé iresabires akana iki. Jaskáaribaxonbira min profetabo retekana iki, jaton jakonma aká onantibires jato yoiaitian, shinan wetsaax miki yoiti iti jato yoiaitian, itan jakonmara mia shinanmakana iki.

27 Jaskara ikenra, jaton rawibaon iboaxon jato ramiakanon ixon min jato amaresa iki. Japekáora masá tenekin, akinnon ixon mia yokákana, jatianra mia noibamis ixon, naikanxonbi min jato ninkata iki; jaskáaxonra jabaon jato xabaati joni koshibo min jato raanxona iki.

28 Ikaxbi shokores jakon ixonra, jakiribi mii bebonxon jakonma akana iki. Jakopíra rawibaon jatoaresnon ixon, min jato oinresa, jato iboakatikanai. Jainxonra jakiribi jato akinnon ixon mia yokákana iki, jatianra min noibamisti shinanman, naikanxonbi min jato ninkata iki, jaskáaxonra ichaakin min jato xabaaka iki.

29 Min esébo jakiribi senenhakin peokanon ixonra min jato esea iki; ikaxbira bebonbires atipana shinanmeekana iki, jaskákinra min ati yoia koshi joibo ayamakana iki; ja senenhai jonibora min keena keská min jato jamai; yoitimabo itan jaton keena keská akaibora ikana iki, jaskákinra ja ninkáyamakana iki.

30 Icha baritiara jakonma ikanainbi jaweayamakin min jato tenea iki, jainxonra jakonma akanaketian min shinan meranxon itan ja min profetabo meranxonribi min jato keshana iki; ikaxbira mia ninkáyamakana iki, jaskákinra nato mainmea wetsa jonibaon jato iboanon ixon min jato menia iki.

31 Jaskara ikenbira, ani noibamisti shinanya ixon, jatíbi min jato keyoyamaa iki, itan min jato potabainyamaa iki; mia riki akonkin noibamis Dios, itan jato onisai.

32 Jaskara iketian, non Diossé, mia, Dios, ani koshi, itan onsá ixonra ja ati shinan min senenhai, itan miara jatíbitian noimis iki, non apobo, non joni koshibo, non sacerdotebo, non profetabo, non rekenbo, itan jatíbi wetsa jonibaonra, Asiriabaon jato anontian peoxon rama kamanbi non jakonmabo teneara, jawemabi iká iki ixon shinanyamawe.

33 Jaskara ikenra, nato noa winota jawekibo atinkobi min noa aká iki, akonkin senenhai ixon, nonra jakonma akona iká iki.

34 Non apobaonbi, non koshibaonbi, non sacerdotebaonbi, itan non rekenbaonbira, tsonbi min esé senenhayamakana iki, min ati joibora ninkákashamakana iki, jakonma anaketian min jato yoiabira onankashamakana iki.

35 Jaskara ikenbi, jabo apo iketian, icha jakon jawékibo min jato meniabi, ani itan jakon mai min jato meniabira, mia rabiamakana iki, itan jaton jakonma axébora jeneyamakana iki.

36 Rama noa oinwe, noa riki ja jainoa yoabo jawékiati, itan jainoa jakon jawekibo akí raroti, ja non rekenbo min jato mai meniniainkobi moa iboaxon yonokanaibo baneta.

37 Ja ichabires yoábo non tsekaabora apobaonares iki, non ocha kopí min noa jaskámaa riki. Jato koshibo ixonra non wakabo betanbi jaton keena keskábo noa akanai. Jaskara ikenra masá tenei moa kikinbiresi jatsanke”, akinra aká iki.

38 Jatíbi jaskarabo kopíra, akonkin ja esé senenhanoxon ja non yoiaibo non wishai, jatian ja kirika sellanara jatibi ja non joni koshibaon, ja levitabaon itan ikon sacerdotebaon jaton jane jain wishakanai.