1 Jatianra Jerusalén katemai iká chiké, ja jene xepóti akanai bekeiba iká plazain, jatíbi jonibo tsinkitax tsamákana iki, jatianra Ibon Israel jonibo menia, Moiséssen esé kirika beti maestro Esdras yoikana iki.

2 Ja kanchis oxe reken nete iketianra, benbobo, ainbobo itan jatíbi moa shinanti atipana bakebo tsinkikana bebon, ja sacerdote Esdrasnin ja esé kirika bea iki;

3 jatianra yamékiribi peoxon, bariapan kaman jatí jonibo bebonxon yoyo aka iki, plaza bebon Jene xepóti akin akanai bekeibaxon. Ja esé kirika yoyo akaitianra jatíbi jonibaon netébainxon ninkakana iki.

4 Jatian ja Maestro Esdras iká iki jiwi tapoakanaton penita. Jawen mekayao niabora iká iki, Matatías, Sema, Anías, Urías, Hilcías jainoax Maaseías. Jawen mexkaora iká iki Pedaías, Misael, Malquías, Hasum, Hasbadana, Zacarías jainoax Mesulam.

5 Jatianra jatíbi jonibaon oinketian Esdrasnin ja kirika chopea iki, jatíxonbi oinna jishtibires iketianra, ja kirika chopeaitian jatikaxbi wenikana iki.

6 Jatianra jatíbi atipana Dios, Esdrasnin rabia iki, jatianra jatíbi jonibo bochiki meken sananax: “Jaskara ibanon, jaskara ibanon”, ikana iki. Jatianra maikibi bekepinon kaman beoxon Ibo rabikana iki.

7 Ja Levitabo Josué, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán jainoax Pelaía, jatíbi jabaonra ja esé jaskati iká onantiakin jonibo yoikana iki. Jainbipari jonibo ikanaitianra,

8 jabaon ja Diossen esé kirika koshin jato yoyo axonkana iki, jaskáaxonra jaton joinbi ninkátiakin jato yoikana iki.

9 Ja esé kirika meran iká joi ninkataxa jatíbi jonibo winikana iki, jatianra jaton joni koshi Nehemíasnin, ja sacerdote itan maestro Esdrasnin, jainxon jan jato esé onantiakin yoiai levitabaon jatíbi jonibo yoia iki, masá shinantima itan winitima, ja nete jaton Ibo Dios iboama nete iketian.

10 Esdrasninra jato yoiribia iki: “Moa botankanwe, kikin jakon piti pitankanwe, uva xeati batashaman xeatankanwe, ja jawékiati akamabo kenaxon jato pikintankanwe, ramara non Ibo non menia nete iki. Masá shinanyamakanwe, ja Ibon noa raro shinan meniara noa jan koshi meniai iki”, akinbo.

11 Jainxon levitabaonribira jonibo jato tantimaa iki, moa netékanwe, winiyamakanwe, natora non Ibo menia nete iki.

12 Jatianra jatíbi jonibo pii, itan xeai moa bokana iki, jaton jawékiati jato pikinhananra, ani fiesta akana iki, Esdrasnin jato yoiara kikinhakin ninkákana iki.

13 Ja wetsa nete xabáketianra, jatíbi ja rarebobotiibi joni koshi ikáboyabi sacerdotebo itan Levitabo, Esdras betan tsinkíkana iki, ja esekan yoiaibo kikinhakin onanti kopí,

14 jatianra Ibon Moisés meranxon jaskara ati yoini wisháinoa merakana iki, jain yoia iká iki, kanchis oxe iketian Ibo shinankin fiesta akí, ja israelitabo peotanin jakanti.

15 Jatianra jatíbi jemabotiibi, itan Jerusalénhinxon onankanon ixon jato joi bomakana iki, ja esé kirikain wishaa joi senenhati kopí, peota anoxon ja ati pei benai jonibo nii meran bokanti, ja benai bokantira iká iki olivo ponyán peía, arrayán jiwi peía, xebon peí, iamax peipeishaman wetsa jiwibires inonbi benakanti.

16 Jatianra jonibo peí benai bokana iki, jainoaxa peiabo bekana iki, jaton xobo pekaten, itan jaton xobo jemankobora peotaakana iki, jainxon Dios rabiti xobo iká chiké meranribira akana iki, jene xepoti patax iká plazain, itan ja Efraínman xepoti ikain plaza ikainboribira jaton peotabo akana iki.

17 Ja yatanxon bokanabo jakiribi joá jonibaonribira jatíxonbi jaton peotabo akana iki, ja akáxa jain ikana iki, ja Nunman bake Josué betan inontianbira moa jaskara jawéki akanama iká iki. Jaskara iketianra kikinbiresi rarokana iki.

18 Kanchis nete kamanra, Dios shinankin onantishamanhakin ani fiesta akana iki; ja peokoota neten peoxonra ja senentiain iká nete kaman, ja Diossen esé kirika Esdrasnin netetiibi yoyo aka iki; ja posaka nete itinra iresama tsinkíti akana iki, jaskara ati esekan yoiai keskáakin.