2 Jaskáara Elías Acabhiba kaai pikota iki. Jatianra Samariain ikonbiresi jawékiatin ikanai iká iki.

3 Elías joai kamanra, Acabnin jan jawéki koiranxonai joni koshi Abdías kenaa iki, jara akonkin Ibo rabiai iká iki.

4 Jaskákinra Jezabelnin Ibon profetabo reteti jato yoiketian, jan jato westíora pacha bia iki, jaskáa pekáora rabé tsamá pichika chonkabo axon, rabé shanka kini meran jato jonea iki, jaskáxonra jainoa ja jawékiati maxkákanabo jato menia iki.

5 Jaiba nokóketianra Acabnin, Abdías yoia iki: —Kanonkawe, nato mainra jatíbiain noa kati jake, jatíbi chichokeax jene jokonainkobo itan paronkobora noa kati iki, pastoki non jain nokotima iki ixonra non benati iki, jatianra kabayobo betan mulabo jan jati iki. Non jaskáyamaabira, noa yoinaoma banéti iki —akin.

6 Jaskáaxonra, jain katibo moa onantiakana iki, jatian moa Acab okea bain kaaitianra; Abdías wetsaorikea bain kaa iki.

7 Abdías bain kaaitianra, Elíasninbishaman bechia iki, já onanax ja bebon maikibi beotaananra koshin yoia iki: —¡Miarin nokon ibo Elías! —akin.

8 Jatianra Elíasnin aká iki: —Jenjén, ea riki —akin. Jainxonra yoia iki: —Min ibo yoitanwe, ea moa neno nokota —akin.

9 Jaskáara Abdíassen yoia iki: —¡En ja yoiara ea reteti iki, enra jawe jakonma akáma iki!

10 Min Ibo Diossen janenkora en mia ikon yoiai, nokon ibon jain mia benati jato raanyamara mai betan jain apo iká mai yamake; jatianra ja benai botanabaon banéxon yoikana iki ikon mia yamaa.

11 ¡Jatian rama min ea yoiai, kaxon ja nokon ibo moa mia neno nokota en yoiti!

12 Neskarara winóti iki, ea miibakeax paskéketianra, Ibon shinanman en onanyamainko mia boti iki. Jatianra kaxon ja Acab en yoia joxonbi mia nokoyaxon ea reteti iki. Nato ea min yonotira bakeranontianbi, jatíbitian ea Ibon jakonha iki.

13 En akára mia yoikanamabira iki, ja Jezabelnin Ibon profetabo jato retemanontianra, westíora pacha en jato jonémaa iki, pichika chonkabo rabé tsamá axonra, rabé shanka kininko en jato imaa iki, jatianra ja jawékiati maxkákana en jato menia iki.

14 Rama mia neno nokota nokon ibo en yoii kaketianra. ¡Ea reteti iki! —akin.

15 Jatianra Elíasnin yoia iki: —Ja en tee axonai, jatíbi atipana Ibon janenkora en ikon yoiai, ramabira Acab bebon ea iki kaai —akin.

16 Abdíassa, Acab benai kaa iki, Elías joaitian yoii, jatianra já joai bechii Acab kaa iki.

17 Jatianra nokoxon yoia iki: —¿Jaskara ikaxki mia iki, jan jato benómaxon Israel jonibo jakonma imai? —akin.

18 Jaskáketianra Elíasnin yoia iki: —Eama riki jan jato benómai, mia itan min jonibokaya riki jan jato benómai, jainoax Ibon esébo maton jenea kopí itan ja rabiti Baal jisaakin akanabo maton rabiai kopí riki.

19 Rama joi boai jonibo ranwe, israelitabo itan ja chosko pacha pichika chonka, Baalnin ikonma profetabo betan chosko pacha Aseránin ikonma profetabo, ja Jezabelnin jato jawékiamaibo, Carmelo mananman jato tsinkínon ixon —akin aká iki.

20 Acabninra israelitabo jato kenama iki, jaskáaxonra ikonma profetabo Carmelo mananman jato tsinkia iki.

21 Jatianra ja jonibo patax kaxon, Elíasnin jato yoia iki: —¿Jawetian kamanki, rabé shinan akí mato jenetai, ikon Dios rabixon itan ikonma Baal dios rabii mato jenetai? Ibo Dios ikon Dios iketian, já ikonhakanwe, ikaxbi dios Baalkaya ikon iketian, já ikonhakanwe —akin. Jato jaskáara jonibaon jawe joibi yoiamaa iki.

22 Jatianra Elíasnin jato yoiboresa iki: —Eabicho riki, ja Ibon profeta jiria baneta, ikaxbi dios Baalnin ikonma profetabora, chosko pacha pichika chonka iki.

23 Jaskara iketian rama, rabé waka bake bene noa menibakanon, jatian maton westíora katókanwe, kaxkepakexon jainxon yoina menotiain karo iká pekatan tsamankanwe, ikaxbira ja karo keteakantima iki. Enribira, wetsa waka bake bene jaskáashokoti iki, jaskáxonra jainxon yoina menotiain karo iká pekaten en tsamanti iki, ikaxbira enribi ketéatima iki.

24 Jaskáaxonra maton diosbo maton yokáti iki, jatianra enribi nokon Ibo yokáti iki, ¡Jatian jawerato diossenki, non yokata noa axonkin chii raanai, jara ikon Dios iki! —akin jato aká iki. Jato jaskaara: —¡Jara jakon shinan iki! —iki ikana iki.

25 Jatianra Elíasnin, Baalnin ikonma profetabo yoia iki: —Matora icha iki, jaskara ixon matonpari westíora waka bake bene katókanwe, jaskáxon moa menotires itiakin akanwe. Jaskáaxon maton dios yokakanwe, ikaxbi chii ketéayamakanwe —akin.

26 Jatianra waka bake bene bixon, moa menotires itiakin akana iki, jaskáaxonra yamékiri peoxon bariapan kaman, dios Baal yokákana iki, Neskáakin: “¡Non mia yokata noa axonwe Baal!” akin. Jainxon yoina menoti akana mayaira choronkana iki, ikaxbira jato akí ikai jawe joibi ninkáyamakana iki.

27 Ja moa bariapan iketianra, Elías jatoki shiroi, neskata iki: —Ja dios iketian, bebonbires koshin saí ikanwe. Jawe jawéki akíra iti iki, iamax poiira ibirai, iamax ochó kaara ibirai. ¡Oxaara ibirai, jishténhakanwe! —iki.

28 Jabora saí iki jenéyamakana iki, chichikabaon itan kenshobaonra xatékana iki, jaskati axeabo ikaxa jimín nashinon kaman jaskákana iki.

29 Jabora moa bariapan winókenbi, shinan ramitabo ikai keskati sai iananbi choroni jenéyamakana iki, yantan ja ikon sacerdote israelitabaon yoina jatian menokatitai kamanra ikana iki, jaskákanaibira jawebi iamaa iki, ikaxbira ¡Tsonbi jato kewinyamaa iki, itan tsonbira jato ninkáyamaa iki!

30 Jatianra Elíasnin jatíbi jonibo yoia iki: —Epatax bekanwe —akin. Jaskáara jatíbi jonibo já patax bekana iki, jatianra janbiribi ja Ibo jainxon yoina menoxonti ras ika iketian, benxoa iki.

31 Jaskáaxonra chonka rabé makan bia iki, ja westíora tsamá Jacobnin bakebotiibi, já iká iki Israel akin Ibon janea.

32 Ja makánbora Ibo jainxon yoina menoxonti tsamana iki; ja katemakinra jain jene ati taeshoko ayaketana iki, jain rabé chonka litro bimi bero napóti senen itiakin,

33 jain karo tsamanxonra, waka bake bene kaxkepakexon jaki tsamana iki.

34 Japekáora jaweti israelitabo jato yoia iki: —Chosko chomoki onpax bochoaxon, ja menoti namiki, itan ja karoki onpax chikokanwe —akin. Japekáora jawen rabé itin, itan jawen kimisha itin aribati jato yoia iki, jatianra jaskáakana iki.

35 Jainxon yoina menoti makan tsamana katemaira onpax baita iki, ja taenribira jene bochoa iki.

36 Jatian ja yoina moa menoira, profeta Elías ochómakiranax, saí ika iki: “¡Abrahamman, Isaacnin, itan Israelnin Ibo Diossé, rama jato onanmawe mia riki Israelnin Ibo Dios ixon, jainoax ea riki min yonoti ixon jatíbi jato onanmawe, jainxon jatíbi nato en akaira min ati yoia en akai iki!

37 ¡Ea axonwe Ibó, ea axonwe, nato jonibaon mia Dios onannon ixon, jakiribi miki yoiti ikanon ixon min jato kenanon!” iki.

38 Jaskatainbira, Ibon chii pakéxon, ja nami, karo, ja makanbo, mai poto jainoax ja taenkonia jene jatíbi jabo keyokin menoa iki.

39 Jaskara oinnaxa jatíbi jonibo, mai tii anon kaman beotax, neskákana iki: “¡Ibora Dios iki, Ibora Dios iki!” iki.

40 Jatianra Elíasnin jato yoia iki: —¡Baalnin, ikonma profetabo yatankanwe! ¡Tsoabi jabámayamakanwe! —akin. Jatianra jonibaon jato yatanketian, Elíasnin Cisón weain jato boá iki, jainxonra jato textea iki.

41 Japekáora Elíasnin Acab yoia iki: —Moa pixon, xeatanwe, oi kextó bei xoo ikaira moa ninkáti iki —akin.

42 Jatianra Acab pixón itan xeai moa kaa iki. Ikaxbi Elíassa jawen yonoti betan Carmelo manan bochiki mapeta iki, jatianra main chirankooxon jawen ranboxo xarán jawen bemanan akax beota iki,

43 jainxonra jawen yonoti yoia iki: —Aniparoori ointanwe —akin. Jatianra kaxon oinna iki, jainxonra yoia iki: —Jawebira yamake —akin. Ikaxbira Elíasnin yoia iki: —Kanchisaakin ointanwe —akin.

44 Ja kanchis itinra, jawen yonotinin yoia iki: —¡Onora, mekentio ani nai koinshoko aniparomeax keyatai en oinke! —akin. Jatianra Elíasnin yoia iki: —Kamentanwe Acab yoii, jawen carro benxoax, oin chiteamatianbi moa katanon ixon —akin.

45 Jatianra Acab, jawen carron nanetax moa Jesreelhain kaai pikota iki. Jaskatainbira, nai koinyabi niwe beaitian, nai yameta iki, jaskataxa ikonbiresi oi kextó bea iki.

46 Jatianra Elías Ibon koshi menia iki, jawen chopa jakonhakin sawetaanan, Jezreel kaman ishtoi kaax, Acab nokotamatianbi japari nokota iki.