2 Jatianra Jezabelnin, Elías yoiti westíora joni raana iki: “¡Mia Elías iketianra, ea Jezabel iki! Abánon ea diosbaon akonbireskin masá tenemakin, ikonma profetabo min jato aká keskáribiakin bakish nato horaribi en mia reteyamaketian”, akin.

3 Jatianra Elíasnin onanna iki eara onsá meran iki ixon, jaskatira mawákashamai jawen yonoti betan, Judáinoa jema Beersebain kaa iki, jainra jawen yonoti potabaina iki.

4 Japekáora tsoa jonibi jain jaama mananhori kaai, westíora nete Elías bain kaa iki, kaibira jain senenres kati atipanax retama jiwishoko naman yakata iki. Mawátinin keenira neskata iki: “Moara jainres iki, Ibó ea moa retewe, nokon anibo winoa jakonhirama riki ea”, iki.

5 Jatianra jain, ja retama jiwishoko naman rakatax oxaa iki, Jaskákenbira Ibon ángel jaiba joá iki, jatianra tii axon yoia iki: “Wenixon piwé”, akin.

6 Jaskáara Elíasnin já katemakin oinhaketana iki, jatianra jawen mapokiri, westíora pan xoi betan jarran onpax iká meraa iki. Jatianra weníxon pixón, itan xea iki; ja aká pekáora moa rakáribia iki.

7 Ikaxbira ja ángel joríbaa iki, jatianra tii axon yoia iki: “Weníxon piwé, min piamaabira min koshi moa yamati iki, mia jain kaaira ochóira iki”, akin.

8 Jaskáara Elíasnin wenixon, pixón xea iki. Ja jawékiatoninra koshi menia iki, jatianra chosko chonka nete, itan chosko chonka yamé, Ibo Diossen mananman, Horebhain kaman kaa iki.

9 Jain nokotax westíora shanka kini meran jikia iki, jainra yamé winota iki. Ikaxbira Ibonbi yoyo aka iki: “¿Elías, jaweakirin mia neno?” akin.

10 Janra yoia iki: “Mionparanan ikinra en ichabires shinanna iki, jatíbi atipana Ibo Diossé, israelitabaonra ja senenhabekonti joi min jato betan aká moa jenekana iki, mia jainxon yoina menoxontibora moa ras akana iki, jainxonra min ikon profetabo espadanin jato retekana iki. Eabichoresa banéke, jatianra retenoxon ea benakanai”, akin.

11 Jatianra Ibon yoia iki: “Jeman pikotax, ebebon manan maxkaten chankátanwe” akin. Jatianbira Ibobi winota iki, niwe koshiribira bea iki, janra manan shakona iki, Ibo bebonra shankabo toeta iki, ikaxbira Ibo ja niwenko yamaa iki. Ja niwe bea pekáora niwanna iki; ikaxbira Ibo ja niwanhin iamaribaa iki.

12 Ja niwan pekáora chii ika iki; ikaxbira Ibo ja chiiain iamaa iki. Ikaxbi chii pekáo ninkatara kestenmashaman jakonshoko xoín ika iki.

13 Ja ninkataxa, Elías jawen perakootinin bepota iki, jatianra pikotax, ja kini xemakainbi itoshia iki. Jainxonra jabi akí ikai joi ninkata iki: “¿Jaweki min jain akai, Elías?” akin akaitian.

14 Janra yoia iki: “Mionparanan ikinra, en ichabires shinanna iki, jatíbi atipana Ibo Diossé, israelitabaonra miibetan ja senenhabekonti joi jenexon jainxon mia yoina menoxontibo ras akana iki, min profetabora espadanin retekana iki. Eabichora baneta iki, jaskara ikenra ea retenoxon benakanai”, akin.

15 Jatianra Ibon yoia iki: “Jan mia joatoninribi banetax, ja Damascoainoa tsoa jonibi jain jaama mananhin katanwe. Kaxon, Siriain apo iti Hazael imatanwe,

16 Nimsinin baba Jehúra, Israel apo iti min janeti iki; jainxonra Safatnin bake Eliseo, Abelmehola jemamea, min toan ikon profeta iti min janeti iki.

17 Jaskáxonra jaweratoki Hazaelnin retekasa jabatai, jara Jehúkan reteti iki, jatian jaweratoki ja Jehúkan retekasa jabatai, jara Eliseonin reteti iki.

18 Jaskara ikenbira, dios Baal bebon chirankooyamabo itan ja betsó ayamaabo, kanchis waranka joni, reteyamakin Israelhain en jato jamati iki”, akin.

19 Jainoax kaxonra Elíasnin, Eliseo nokoa iki, mai karanbei iitaitian. Eliseo bebonra iká iki ja teemati aká rabé chonka chosko waka benebo, rabébo kataxa kaai, chinitainoara janbi teemai iká iki. Jainoara Elíasnin, ochómakainxon ja Eliseo jawen perakootinin rakobaina iki.

20 Jatianbira waka benebo jenebaini, Elías chibani ishtoi kaxon nokoxon yoia iki: —Ea manawe, enpari nokon anibo eara kaai akin en betsó abatanon, jatianra mia chibani ea mibé kati iki —akin. Jatianra Elíasnin yoia iki: —Miara kati atipanke, ikaxbi ja en mia akára min shinanti jake —akin.

21 Eliseoninra, Elías potabaini kaxon, rabé waka bene bia iki, bixon retexon kaxkepakea iki, jainxonra jan manexai jiwinbi nami xoixon jawen chonka westíora joni pimaa iki. Jato jaskaabaini kaaxa, Elías tee akinnai baneta iki.