Profeta Elíasnin banábo choshiti yoia
17
Ja netebaonra Galaad main iká, Tisbe jemamea Profeta Elíasnin, Acab neskáakin yoia iki: “¡Ja en tee axonai Israelbaon Ibon janenkora, en mia ikon yoiai, nato baritiabaonra oi beyamai itan nibibi manyamai, ja en beti yoiai kaman!” akin.2 Japekáora Ibon Elías yoia iki:
3 “Nenoax kaax bari pikotaiori, Querit weain jonétanwe, jara Jordánhinoax bari pikotaiori iki.
4 Jainoara wean onpax min xeati iki, mia piti boxonon ixonra wiso nawashianbo en moa yoia iki”, akin.
5 Ibon jaskara ati yoiara Elíasnin aká iki, jatianra kaax Querit wean kexá jaai baneta iki.
6 Jatianra wiso nawashianbaon yamékiribo itan yantánbo pan betan nami boxona iki. Jatianra ja weanmamea onpax xeakatitai.
7 Ikaxbira jaweti nete pekáo moa wean tsosinna iki, ja main oi beyamai kopí.
Elías betan Sareptainoa benomaya ainbo iká
8 Jatian ja wean tsosina moa westíora nete winota pekáora, Ibon Elías yoia iki:
9 “Wenitax Sidón jema ochóma iká Sarepta jemanko katanwe, jain jaaira mia baneti iki. Jain jaa benomaya ainbora jan mia pimati enbi moa yoia iki”, akin.
10 Jaskáara Elías Sareptain kaa iki. Ja jeman jikitiain nokoxon oinnara, westíora ainbo karo bii iita iki. Ja ainbora kenaxon yoia iki: —Ea westíora vason ichátama onpax, en xeanon ea bexontanwe —akin.
11 Ja ainbaon moa onpax bii kainbira, Elíasnin kenaxon yoia iki: —Westíora pan pakexibi ea bexontanwe —akin.
12 Jatianra ja ainbaon yoia iki: —Min Ibon janenkora en mia ikon yoiai, eara jawe panhonmabi iki. Nokon chomonra westíora mesó harinashokores iki, jainoax jarranra ichatamashoko xeni iki, rama jashoko nokon baken jawékiati itan en ati xoi kanoxon karo jawetishoko biira ea iitai. Jara non piti iki, ja aká pekáora moa noa pitin reteai —akin.
13 Jaskáketianra Elíasnin yoia iki: —Rakéyamawe matora mawáyamai. Ja min yoia xoitanwe. Ikaxbi ja min harina maxko panshoko axon eapari bexontanwe, jaskáa pekáo minna itan min bakena atanwe.
14 Israelbaon Ibonra yoike, ja chomon iká harina itan ja jarran iká xeni keyóyamai, Ibon nato main oi bemai nete kaman —akin.
15 Kaxonra ja benomaya ainbaon, Elíasnin ati yoia keská aká iki. Jatianra ja ainbo itan jawen bake jainoax Elías, icha nete ja jawékiatia iká iki.
16 Ja Elías meranxon Ibon yoia keskára iká iki, chomomea harina itan ja jarramea xenira keyóyamaa iki.
17 Moa jawetio basi pekáora, ja benomaya ainbaon benbo bake isina iki, jawen isinra kikínbires jakonma iká iki, iikaxonra moa joinyamabobia iki.
18 Jatianra benomaya ainbaon Elías yoia iki: —Ibon joní, ¿Jaweaki ea jakonma imai mia neno joarin? ¿En ocha aká ea shinanmaxon, nokon benbo bake mawámaxon, ea masá tenemai mia joárin? —akin.
19 Jatianra Elíasnin yoia iki: —Min bake ea neri bexonwe —akin. Jatian ja benomaya ainbaon, jawen sayánbi noxtia iketian bixonra, jain iká bochiki xobo chité meran boxon rakana iki.
20 Jatianra Ibo akí neskati koshín saí ika iki: “Nokon Ibo itan nokon Diossé, ¿Nato benomaya ainbo ea jawen xobon ikenbiki, jawen benbo bake mawámaxon, min chexakamati iki?” iki.
21 Jaskátaananra ja baken kimishai perakaa iki, jaskáxonra Ibo koshín saí aka iki: “Nokon Ibo itan nokon Diossé, ¡Enra mia yokatai nato bake jiriawe!” akin.
22 Ja Elíasnin yokatabora, Ibon ninkáxona iki, jaskáxonra ja bake jiriaxona iki.
23 Jatianbira Elíasnin ja bake bitaanan, ja iká bochikia xobo chitéainxon naman boa iki, jatianra jawen tita menikin yoia iki: —¡Oinwe, min bakera moa jirike! —akin.
24 Jatianra ainbaon yoia iki: —Ramara en onanke, miara ikon Ibon joni iki, jaskara ikaxa min yoiabo ikon Ibona iki —akin.