Acab Israelhain apo iká
16
29 Kimisha chonka posaka baritia, Asá moa Judáin apo iká iketianra, Omríman bake Acab, Israelhain apo iki peokoota iki. Samaria jemanxonra, rabé chonka rabé baritia apo ixon jato ikinna iki.30 Ikaxbira jawen ikábo Ibon keenma iká iki, jakopíra ja apo ikamatian wetsa apobo ikátiai bebon jakonmabires iká iki,
31 ja Nabatnin bake Jeroboamman akátiai ochaboribi akíbira jawemabi iká iki. Jabicho ipanankan ja Sidónhinoa apo Et-baalnin bake ainbo Jezabel betan wanoxon bebonbires jakonma iká iki, jainxonra moa dios Baal rabia iki,
32 itan Samariainra, westíora ani xobo dios Baal rabiti jato amaxon, ja meranxon yoina menoti jato amaa iki.
33 Jainxonribira ainbo dios Asera jisáakin axon, jato nichinmaxon, ja Israelbaon Ibo Dios sinámaa iki, japari iká apobaon imakatitai bebonbires.
34 Acab apo inontianra, Betelhainoa Hiel janeya jonin Jericó benaakin jemaariba iki. Jaskákinra jan xobo koshiati akaitian jawen reken bake Abiram mawata iki, xepóti nichini iitaitianra jawen chiní bake Segub mawata iki, ja Nunman bake Josué meranxon Ibon jaskara iti yoini keskára iká iki.