27 Jaskarainoax Jeroboam apoki ramiti yoitimatara neskara iká iki: Salomónra, jawen papa Davidkan jema katemai iká chiké bebonmea mai xankenbo jato bochoamai iká iki.

28 Jatian Jeroboamra iká iki koshi itan jato ikinti atipana joni, Salomónman oinna ja bake ranon rayá iketianra, Josekan chiní bakebaon tee anon ixon yoiai, koshi jikimaa iki.

29 Jaskarabo inontianra, wetsa nete Jerusalénhainoax pikotax bain kakin Jeroboamman profeta Ahías nokoa iki, Siló jemamea joni perakooti bená saweya kaaitian. Jato rabébicho iká iki ja tsoa yama xabá ikáinko,

30 jatianra Ahíassen ja perakooti benáshaman sawea jopexon, chonka rabé pakex itiakin noshia iki,

31 jaskáaxonra Jeroboam yoia iki: “Mina iti chonka pakex biwé, Israelnin Ibo Diossenra mia yoiai: ‘Jaskara kopíra Salomón apo pikoxon, chonka tsamá ja jonibobires tsinkita jonibora en mia meniai.

32 Salomónra westíora tsamá joniares en imai, ja nokon yonoti David eki yoiti iká kopí, itan Jerusalén jema kopires, jatíbi Israel jonibaon jemabo xaranmeara ja jema en katota iki.

33 Salomónmanra moa ea omiske, jaskáxonra sidoniobaon dios ainbo Astarté rabiai; ja moabitabaon dios, Quemós; ja amonitabaon dios Milcom rabiai. En oinnara jan akábo jakonma iká iki, jawen papa Davidkan aká keskáakinra nokon esébo, itan ja nokon koshi joibo senenhayamaa iki.

34 Jaskara ikenbira, en apo imapariai, mawatai kaman apo ixon jato ikíntira en imai, ja en katota nokon yonoti Davidkan ja senenhati nokon joibo itan nokon esébo senenhaa iketianres.

35 Ikaxbi jawen bakera apo ikenbi en moa pikoai, jaskáxonra en mia apo imai, ja jonibobires tsinkita chonka tsamá jonibora en mia meniai.

36 Jawen bakera westíora tsamá jonibores en jenexonti iki, nokon yonoti Davidkan chiní bake, Jerusalénhain jatíbitian ebebon apo iki jenéyamanon ixon, ja jemara jain ea jati en katota iki.

37 Enra mia biti iki, apo ixon jatíbi mia keenai maibo min binon ixon, itan Israelbaon apora mia iti iki.

38 Jatíbi ja ati en mia yoia akí mia yoiti ikaitian, itan min akábo ebebon ponté jakon iketian, nokon esébo itan ja senenhati nokon koshi joibo, nokon yonoti Davidkan aní keskáakin min senenhaitianra, en mia akinti iki, jatianra mato rarebobires koshi ikí jenétima iki, David betan aní keskára en ati iki, jatianra Israel en mia meniti iki.

39 Davidkan chiní bakebaonra masá teneti iki, ikaxbira jatíbitian itima iki’ ”, akin aká iki.

40 Jaskáakin profeta Ahíasnin yoiketianra Salomónman, Jeroboam retekasa iki; ikaxbira Jeroboam, Egiptonko jabati kaa iki, jainra Sisac apo iká iki, Salomón mawatai kamanra jain iká iki.

41 Salomón jaskara iká yoia jatíribi joibo, itan jawen jakon ati onan shinanbo, jainoax jatíbi jan akábora, Salomónman kirikainbo wishaa iki.

42 Salomónmanra apo ixon Jerusalénhainxon jatíbi Israel jonibo chosko chonka baritia senen jato ikinna iki,

43 mawáketianra jawen papa Davidkan jeman miinkana iki. Japekaora jawen toan, jawen bake Roboam apo iká iki.