2 Jawen kikin joni koshibaonbires kateara nokota iki, jawen camellobora ininti, kikin icha oro itan metsá kopí makan papíabo iká iki. Jatian Salomónhiba nokóxonra, jatíbi ja yokati shinanabo yokata iki,

3 jatianra Salomónman jatíbi jan yokatabo yoia iki. Jaskara riki ixon, ja yokata yoitira westíorabi jan onanyamaa yama iká iki.

4 Ja apo ainboninra oinna iki ja Salomónman jakon ati onan shinan, itan jain apo iti xoboa,

5 jawen mesankonia noe pitibo, jawen joni koshibo jaton jain ikábo, jawen yonotibaon jaton jaskara jisá chopa, jan xeamaibo, itan Dios rabiti xobonko yoinabo menikin keyokin menokanaibo, jaskarabo oinnaxa kikini rateta iki,

6 jaskákinra apo ainbaon ja apo yoia iki: “Min jawéki akábo, itan ja min jakon ati onan shinan yoikanaibo, nokon mainxon en ninkatara, ikonshaman iki;

7 neskati joxónpariresa rama en ikonhati atipanke, nokon beronbira en oinke. Ikon riki, napónbekontanibira ea yoiamakana iki, ja min jakon ati onan shinan, itan min jawékibora ja yoikanai en ninkata bebonbires iki.

8 ¡Min awinbora raroshaman ikanti iki, itan ja min yonotibora raroshaman ixon jakon shinankanti iki, jatíbitian miibetanbi ixonra, onanshamanax mia yoyo ikai joi ninkákanti iki!

9 ¡Jakon ibanon min Ibo Dios, mia jawen keenshaman oinxonra, Israelhain mia apo imaa iki! ¡Israel jatíbitian noia ixonra, ponté itan atikeskabiakin jakonhakin Ibon jato ikinnon ixon mia apo imaa iki”, akin aká iki!

10 Jaskaa pekáora apo ainbonin, kimisha waranka iskon pacha sokota chonka kilo oro apo menia iki, jainxon kikin icha inintibo, itan metsá kopí makánbora menia iki, ja Sabáinoa apo ainbonin Salomón ininti meniati ichara jawetianbi Israelhain ininti nokoisma iki.

11 Jaskáakenbira, Hiramhinoa wapóronin Ofirhainoa oro bea iki, icha sándalo jiwi itan metsá kopí makánboribira bea iki.

12 Ja Sándalo jiwibaonra, apo Salomónman, Ibon xobo itan jain já iká xobo katemakin xechaakin jato chikéaketamaa iki, ja bewati onanbora arpabo itan salteriobo jato axona iki. Jawetianbi, itan rama kamanbira jatí icha sándalo jiwibo nokotai oinkanama iki.

13 Apo Salomónmanra, kopikin ja Sabáinoa apo ainbonin jatíbi ja keenkin yokata jawékibo menia iki, moa jawen shinanmanbi meniabo jakebira tekikin meniribia iki. Jaskáa pekáora ja apo ainbo, jan akinnai jonibo betan moa jawen main kaa iki.

14 Salomónman baritiatíibi oro biaira rabé chonka rabé waranka kilo iká iki,

15 jaskáaxonbira ja jawékinin maroaibaon kopía, itan jawéki marokin boaibaon kopíabo jainoax jatíbi Arabiainoa apobaon kopiabo itan ja mainmea koshibaon kopíakin menikana biabo toponkanama iká iki.

16 Salomónmanra oro chaka, rabé pacha jan panáti ati jato yoia iki, westíorabora sokota kilo oro iká iki.

17 Jainxonra kimisha pacha maxko yami panatiribi ati jato yoia iki, westíorabora westíora kilo wetsa napónbekon bebonchaashoko oro iká iki, jabora “Líbano nii”, akin janekana jain apo iká xobonko akana iki.

18 Jainxonribira marfil ani yakati axonkanon ixon jato yoia iki, jaskáaxonra kikin oronbires rapoti jato yoia iki.

19 Ja ani yakátiain mapéti tapitira sokota keyanya iká iki; jan kakepitira metsáakin raoa toró, itan ponyan oken ibékona iká iki, jainra león jisáakin akana rabé, ja patax oken nibékona iká iki.

20 Chonka rabé leónra jain jaríbaa iki, jabora ja tapiti sokota keyánbotiibi oken nibékonabo iká iki. ¡Jawetianbira wetsa apobaon jaskara jisáakin yakáti akáma iká iki!

21 Jainoax ja apon copabo jatíbi orobires iká iki, ja apo jain iká xobora “Líbano nii”, akanainko iká iki, jan jawékiatibora jaskáribi iká iki. Jainra jawe koríkibi yamaa iki, ja Salomón janontianra, plata kopíma iká iki,

22 ja apon waporobo Tarsissainxon akanabora, ja Hiramman waporobo betanbi kimisha baritia pekáobo westíorai nokotai iká iki, orobo, platabo, marfilbo, shinobo itan kopí korokorobora bea iki, jatíbi jabora apo jain iká xobo jan metsaati iká iki.

23 Apo Salomónra nato netemea jatíbi apobo xewinna kikinbires icha jawékia itan kikínbires jaskáaxon jakon ati onan shinanya iká iki.

24 Ja Diossen menia onan shinanra jatíbiainxon oinkaskana iki itan ninkákaskana iki,

25 jaskákinra baritiatíibi wetsa apobaon jatíxonbi kopímabi ja meniti jawékibo boxonkana iki: Plata aká jawékibo, oro aká jawékibo, taribo, jan reteananti jawékibo, ininti jenebo, kabayobo, mulabo boxonkana iki.

26 Salomónmanra janmeax reteananti carrobo itan kabayobo tsinkia iki. Waranka chosko pacha carroya itan chonka rabé waranka kabáyonin niti onan joniboyara iká iki, jabora jan reteananti carrobo jain iká sontárobaon xobonkobo ikana iki, jainoax jatíribibora Jerusalénhain apo koiranaibo ikana iki.

27 Ja apon Jerusalénhain plata kaiara, makan keska icha iká iki; jainoax ja mai teshanpainoa nii meranoa higuera jiwibo ikai keskáakinra konxanbo kaia iki.

28 Salomónman kabayobora Muzri mainmea, itan Cilicia mainmea bekana iki, ja apo jawéki maroxonaibaonra jainoabo bia iki.

29 Ja Egiptonkonia bea carron kopíra iká iki sokota pacha koríki, jainoax westíora kabayora pacha pichika chonka kopía iká iki. Jatianra jatíbi hitita apobaon, itan sirio apobaon ja Salomón maroxonai joniboibakea marokana iki.