2 Jatianra Nabatnin bake Jeroboamman, Egiptonkopari ixon ninkata iki, ja iká iki Salomónki raketi jabati kaax jain jaai baneta.

3 Jeroboam kenamakana joketianra, já betan jatíbi ja chonka tsamáinoa Israel joni koshibo, Roboam betan yoyo iki bokana iki, jatianra westíoran yoia iki:

4 —Min papara nobé kikin jakonma iká iki; rama akonbireskin noa teemai, itan apo ixon kikinbiresakin noa kopíamai, jaskarainoa noa tantimawe jatianra mia non teexonti iki —akin.

5 Jatianra Roboamman jato yoia iki: —Moa botankanwe, kimisha nete itin ebé yoyo iki beríbatankanwe —akin. Jatianra jonibo moa bokana iki,

6 jatianra apo Roboamman jawen papa Salomón janontian jan akinkatitai joni koshibo betan onannox yoyo ika iki. Neskáakinra jato yokata iki: —¿Nato jonibo en yoinon ixonki, jawekeskáakin maton ea eseai? —akin.

7 Westíoratoninra yoia iki: —Rama nato jonibo akintiain jikixon, jakon join min jato akára, jatíbitian raroshamankin mia teexonkanti iki —akin.

8 Ikaxbira joni koshibaon esé ninkáyamaxon Roboamman, jabé senen ania jawen yonoti bake ranonbo betan onannox yoyo ika iki,

9 neskáakinra jato yokata iki: —¿Nokon papan bebonhira jato teema iketian itan bebonhira kopíati jato yoia iketian, namantani en jato ati ea yokákana jaskáakin nato jonibo yoinon ixonki, jawekeskáakin maton ea eseai? —akin.

10 Ja westíoratoninra yoia iki: —Min papan bebonhira jato teema iketian, itan bebonhira kopiáti jato yoia iketian, teeiratima itan namantani jato min kopíamati mia yokata jonibora, min jato yoiti iki: ‘Nokon papa jakonma iká iketianra, ea bebonbires jakonma iti iki;

11 jan mato bebonhira teemaxon bebonhiraribi mato kopíamaa iketianra, en bebonbires mato ati iki; mato cintorabaon rishkia iketianra, yami kensho rerontameya rishkítibaon en mato rishkiti iki’, akin jato awé —akin akana iki.

12 Kimisha nete itinra Jeroboam betan jatíbi joni koshibo jakiribi Roboamhiba bokana iki, jatian kati ja apon jato yoiara iká iki.

13 Jatianra apon koshi join jato aká iki, ja joni koshibaon esea keskára ayamaa iki,

14 ikaxbira ja bakeranonbaon esea keskáribi jato yoia iki: min papanra jato bebonhira teemaa iki, itan bebonhira jato kopíamaa iki, jan bebonbires jakonma jato aká iketianra, jawen papan cintorabaon jato rishkia iketian, risbí yami kensho rerontameya rishkítibaon jan jato rishkitira iká iki.

15 Aponra joni koshibaon esea ninkáyamaa iki, Ibonra jaskara iti moa yoia iká iki, Nabatnin bake Jeroboam jaskara iti yoia senenti kopíra iká iki, Silóainoa profeta Ahías meranxon jaskara iti yoiara iká iki.

16 Jatíbi Israel joni koshibaon onanna apon jato ninkáxonyama iketianra, westíoran yoia iki:

17 Ikaxbi Judá jemabaon jaa israelitabora, Roboamman apo ixon jato ikinboresa iki.

18 Jato tee senenhamaiton koshi iketian Adoram Roboamman raanketianra jatíbi Israel jonibaon makaman tsakaxon retekana iki. Jatianra apo Roboam ishtonbires jawen carron nanetax, Jerusalénhain jabati kaa iki.

19 Jaskatax ja nete kamanbi, Davidkan rarebo koshiboki, Israel jonibo ramiti yoitimai peokookana iki.

20 Israelitabaonra Jeroboam jakiribi joá ninkákana iki, jonibo bebon jonon ixonra kenamakana iki, joketianra jatíbi Israel jonibaon apo imaa iki, tsonbira Davidkan rarebo koshibo ikonhaxon chibankin akonkin senenhayamakana iki, Judá jonibobichoresa jato betan ikashamaa iki.

21 Jerusalénhain nokóxonra Roboamman, jatíbi Judá joniboainoa itan Benjamín joniboainoa, katóxon pacha posaka chonka waranka sontáro tsinkia iki, ja Israel jonibo betan reteananax jakiribi jaton apo inoxon.

22 Ikaxbi ja Diossen joni Semaíassa, já betan yoyo ixon, Diossen neskaakin yoia iki:

23 “Yoiwe ja Roboam, Salomónman bake Judáinoa apo, jatíbi Judakan rarebo itan Benjamínman rarebo jainoax jatíbi jonibo,

24 enra yoiai jaton wetsa israelitabo betan reteanankantima. Moa jatikaxbi jaton xobon botankanon. Jaskara ati shinanax ea keena riki”, akin. Ibon jato jaskáakin yoia ninkata pekáora, moa bokana iki, ja Ibon jato jaskáti yoia keskati.

25 Jeroboammanra Siquem jema koshishaman itiakin jato amaa iki, jara Efraín mananman iká iki, jatianra jain jaa iki. Penuel jemaribira koshishaman itiakin jato amaa iki.

26 Ikaxbira shinanna iki: “Davidkan rarebo apo ixonra, jakiribi já betan ikámabo jato biribati atipanke,

27 nato jonibo Jerusalénhain Ibo rabiti xobónko yoina menoxoni kaketianra jato biti iki. Roboam, Judá apoki axexonra jakiribi moa noibakanti iki, jaskáaxonra ea retekanti iki, jatianra Judáinoa apo Roboam betan jakiribi ikanti iki”, ixon.

28 Jaskara atiki jawekeska iti iki ixon joni koshibo yokata pekáora, apon rabé waka bake bene jisáakin oro jato amaa iki, jainxonra jonibo yoia iki: “Mato israelitabora ichai moa Jerusalénhain kake. Nenora Egiptonkonia jan mato pikoni maton diosbo iki”, akin.

29 Jatianra ja diosbo, westíora Betelhain jato amaxon, wetsa Danhin jato amaa iki.

30 Jaskatax Israelbo jan ochatira iká iki, jatianra Betelhain itan Danhain ja rabii jonibo bokátikanai.

31 Manan keyainbora ikonma diosbo rabiti maxko xoboboribi jato amaa iki, jainxonra Levita jonima ikenbi, wetsabiresbo ikonma sacerdote iti jato janea iki.

32 Jainxonribira posaka oxe itin ja chonka pichika nete iketian, jatonbi aká diosbo shinankin ati fiesta jato akinna iki, ja Judainxon akátikanai fiesta keskáshamanribi, jatianra janbi jainxon atinko perakaxon yoina menikin menoxona iki. Ja Betelhainxonra aká iki, ja rabiti waka bake bene jisáakin jato amaabo, yoina menoxonkin, jainxonra ja ikonma dios rabiti jato amaa maxko xobobo akáinko itibo, ikonma sacerdotebo janea iki.

33 Jaskáakinra, posaka oxe itin jawen chonka pichika nete iketian Jeroboamman Betelhainxon, jainxon yoina menoti jato amaainxon perakanxon yoina menikin menoxona iki. Ja oxera iká iki, jawen keena keskáakin ati fiesta pikoa, israelitabaon jatian dios shinankin ati fiesta riki ixonra onantiakin jato yoia iki, ja oxeribira jainxon yoina menotiain mapéxon incienso ininti menoa iki.