Ja akinbicho Davidkan yoia joi
23
Nato riki ja ikíbicho David yoyo ika joi:“Ja David iká iki Isaíkan bake,
Diossen ani joni imaa,
ja Jacobnin Diossen, katóxon apo imaa,
itan Israelhainoa jakonni bewai joni,
jara neskata iki:
2 Ja Ibon shinanra emeranoax yoyo ikai;
ja joira nokon kexain iki.
3 Israelnin Diossa yoyo ike;
Israel koirannaitonra ea yoike:
‘Jonibo atikeskabiakin ikinai,
Dioski raketi yoiti ikin jato ikinai jonira,
4 nete xabákin joekan tenai keská, itan
nai koin yamaketian,
oi bea pekáo barin tenaaton xobi xoxomai keská iti iki’ akin.
5 Jaskatira, nokon chiní bakebo Dios betan ikax jakonhain iki,
janra ja senenhabekonti joi jatíbitian iti ebé aká iki,
jaskara ati onantishaman, itan akonkin.
Jan amaara jatíbi rebestankin enharesai
itan jatíbi ea keenaibora ea meniai.
6 Ikaxbi jatíbi jakonma jonibora, moxa
potakana keskáres iti iki,
tsonbira moa biwetsatima iki.
7 Jabo bikinra, yami xaon iamax tsatsitaxon biti iki,
ja bixonra chiiain potati iki.
Jatíbi keyoti menonon ixon” iki.