Jawen rawibo jatoaresa pekáo David bewaa
22
Saúlnin itan jatíbi jawen rawíbaon ati ikenbi, Ibon amayamaara, nato bewakan David Iboki bewaa iki.2 Neskára iki:
“Mia, Ibora, nokon panáti iki,
onsá jakonmanin anaketian nokon jain jonéti,
itan miara ea jan xabaai iki,
3 miara nokon Dios iki,
miara ea panaa shanka iki,
miara nokon yami panati iki,
miara ea jan kispinmati atipana koshiya iki,
miara ea jain jonéti kikin keyá iki,
miara onsá jakonmanin anaketian ea jain jonéti iki,
itan miara ea jan kishpinmai iki.
¡Ea retekaskanaibira min jato amayamaa iki!
4 Mia Iboresa, rabiti iki:
En mia kenaara, nokon rawiboibakea ea min xabaai.
5 Westíoraakinra mawakan bechonman ea rawexea iki;
retemis jene bai koshi, oinnaxa ea raketa iki;
6 itan mawakanra jawen risbikan ea ratanea iki;
¡Jakonmanin mawáti trampabo meranra ea iká iki!
7 Masá tenekinra en Ibo kenaa iki,
ea akinnon ixonra en Ibo Dios yokata iki,
jatianra jawen xobonkoxonbi ea jan ninkata iki;
¡Ea saí ikabora ea ninkáxona iki!
8 Jatian koshi niwannaitianra mai shakota iki,
ja nai jan tewanabora shakota iki.
Ibo sináketianra shakota iki.
9 Jawen rekinhainoaxa koin jokona iki,
jawen kexainoaxa keyomis chii jokona iki;
¡Itan jawen kexakanra chii tsistobo potaa iki!
10 Ibonra nai chopémaa iki,
¡Jaskaaxa ja nai koin kextokan ipakea iki!
11 Westíora ángel querubinman peyakaxa, naikan noyai kaa iki;
niwe pechin peyakaara en oinna iki.
12 Ja kikin yamé itan ja nai koin kextóyabi jain jene ikára,
Carpa peota keskáakin imaa iki.
13 Já ikainoaxa icha kaná jokona iki, oi keskara
chii tsistobo manna iki.
14 Naikanmea koshi Ibo yoyo ikinra,
tirin ikai keská jawen joi ea ninkámaa iki:
15 Piabo potaa keskatira, jawen kanábo bea iki,
jatianra nokon rawibo janbisax,
ishtoi bokana iki.
16 Nokon Ibó, minra sináxon aniparo notsina iki;
itan mia koshi ixon akátoninra,
chichó jishtibires iká iki,
jainoax jan mai tewanabora jishtibires iká iki.
17 Nai bochikixonbira, Diossen jawen mekenman,
ea aniparo chichokea bia iki.
18 Nokon rawíbaonra ea winoa koshi ixon,
ea omiskana iki, ikaxbira jatoibakea min ea xabaa iki.
19 Ea rabintiain ikenbi, nokon rawibaon ea akaitianra,
ea Ibon akinna iki:
20 eara xabáin pikoa iki;
¡Ea noixonra ea xabaa iki!
21 Nokon iká jakon ikáx, iti keskabi ikaitianra,
ja en biti jaweki ea Ibon menia iki,
22 jaskákinra Ibon esekan yoiai keská en akai;
¡Jawetianbira nokon Dioski yoiti iki ea jeneyamaa iki!
23 Enra jatíbi jawen esébo senenhai;
¡Jawetianbira jawen esébo en jeneyamaa iki!
24 En já bebonxon jakonma akáma ikaxa,
ea ja yoixonti yama iká iki;
jakonma jawékibora en jenea iki.
25 Nokon iká jakon ikáx, iti keskabi ikaitianra,
ja en biti jaweki ea Ibon menia iki.
26 Ibó, ja mia akonkin senenhaxonaibora, minribi jato senenhaxonai,
ja jakonmanin yointi yamaabora, jakonmanin min yointi yamaribike,
27 ja ikonbo betanra mia ikonribi iki,
ikaxbi ja paranxon pakemisbo betanra, mia bebonbires onan iki.
28 Ja rabí shinanhomabora,
min jato akinnai; ikaxbi ja rabitaibora, oinxon min jato rabinti imai.
29 Nokon Ibó, miara nokon joé iki;
mia Diossenra, ea yaméainoa tenai.
30 Min akinnara nokon rawíbo en ati iki,
Jainoaxa jaton jema chikébaon ea marawati iki;
31 Diossen esébora senen iki,
noa axónnoxon Ibon yoiabora, ja ikonhatishaman iki.
¡Diossenra jaki koshiaibo jato panai!
32 ¿Ja Ibo pekaoki, tsoa wetsa Dios iti iki?
¿Jakia wetsa dios jan noa koiranti?
33 Dios iki ea akonkin koshi shinan bimai,
jan imaara nokon iká jawebi yoiti yamake,
34 jan ea koshi meniara, ea chaxo keska ishto iki,
manan keyáin niaitianra, ea jan koshi meniai,
35 reteanantira ea jan axeai,
janra ea bronce kanóti esteanon ixon, koshi meniai.
36 Koirankinra min ea panai;
noibaxon min akinnara ea bebonna iki.
37 Ea jan kati bai min jakonhaxonara,
nokon taebo jain rainsh itibo yamaa iki.
38 Nokon rawibo chibankin nokoxonra,
en jato keyoa iki,
jato keyoaxparira ea banéribia iki.
39 ¡Enra jato kikinhakin keyoa iki! ¡Jaskáaxonra en jato beshéa iki!
Jatianra moa tsoabi weníyamai, nokon tae naman pakékana iki.
40 Ea reteananaitianra min ea koshi menia iki;
ja yoitima jonibora min amaa en jatoaresa, ebebonmeax beokana iki,
41 min imaara ebebonmeax, nokon rawíbo jabákana iki.
Jaskáxonra ea omiskatitaibo en jato keyoa iki.
42 Akinkanon ixonra jato saí akin kenakana iki, ikaxbira jato tsonbi akinyamaa iki;
Ibo kenakanabira jato jeen ayamaa iki.
43 ¡Mai poto keska itiakinra en jato beshea iki!
¡Callemea chawá akai keskákinra en jato jámata iki!
44 Nokon jonibo betanbi reteananaitianra, min ea xabaa iki,
icha mainmea jonibaon koshira, min ea imaa iki,
jainxonra ea onannama jonibaon ea yoiti ixonkanai.
45 En yoia ninkaxonra, ea senenhaxonkanai;
wetsankonia jonibora ea jakonman rabii rarokanai,
46 wetsankonia jonibora jaton shinan yosmaax,
onsá jakonmanin anaketian jain jonétiainoax saki iannanbi pikókanai.
47 ¡Ja Ibora jatíbitian jake, ea jan panai jakon ibanon!
¡Ea kishpinmai itan ea koirannai Dios bebonbires koshi ibanon!
48 Jan amaara nokon rawibo en kopita iki,
jaskáaxonra jonibo jan enaman imaa iki.
49 Janra nokon rawíboibakea ea kishpinmaa iki,
ja yoitima jonibo ea akí bekankenbira, min ea xabaa iki.
¡Jakonma jonibaon ea ati ikenbira, min jato amayamaa iki!
50 Jakopíra wetsa jonibo xaranxon en mia rabiai,
min jane rabii bewati bewábaonra ea bewai.
51 Min katota apora anibiresakinbo min jatoamaresa iki,
ea itan nokon chiní bakebo noixonra jatíbitian min jakonhai” iki.