2 Jatianra jato reteanankin jatoaresaxbi, ja nete onisi yoyo iananbi winiti iká iki;

3 jainoax ja sontárobo jeman weiti reteanantiainoax, jatoareskana rabinax jabatai keskati joneshoko ja jeman jikikana iki.

4 Jaskákanaitianra apo, jawen bemanan mapoax, kikinbiresi koshin saí ika iki: “¡Nokon bake Absalón! ¡Nokon baké, Absalón, nokon baké!” iki.

5 Jatianra Joabnin jain apo iká xobonko kaxon, apo yoia iki: —Ramara ja min yonotibo min jato rabinhake, jabo riki mia janon ixon, miayabiakin ja min bake benbobo itan min bake ainbobo, jainoax min awinbo, itan wetsa awinboribi jato akinnabo.

6 Jaskara ixonra rama min joni koshibo jawemabi keská min jato imake, mia omisaibora min jato noike, jatian ja mia noiabora min jato omisai. Ramara moa en onanke, jaskara ikaxa noa mawati keyókenbi, min bake Absalón jarésketian mia bebonbires raroshaman ikeanke.

7 Enra mia yoiai, ramabi nenoax pikókaini kaxon min sontárobo jakonhakin yoixon, min jato koshi shinan bimati. Ibon janenkora ja en yoia senenhati iki, min ayamakenra nato yamébi tsoa sontárobi mia jan akinti yamati iki. Mia nato jawéki winotara iti iki, ja bakeranontian peokootax, ramakamanbi jatíbi jakonmabo mia winota bebonbires jakonma —akin.

8 Jatianra apo wenitaanan, Mahanaim jema xepotiain kaax jabiribi yakata iki. Jatian jain apo yakata ninkatax, jatíbi joni itan sontárobo ja bebon bokana iki.

Ikaxbi jatíbi Israel sontarobora jaton xobonkobo moa jabati bokana iki.

9 Jatíbi Israel jonibora join iananani, neskákana iki: “Apo Davidkanra non rawí filisteobaon, noa iboa ikenbi noa pikoa iki, noa jaskáakenbira, Absalónman nato mainmea jabamaa iki.

10 Jatianra Absalón, ja non apo inon ixon non imaa, reteanantiainoax moa mawáke. ¿Jawe manakinki, apo David non jakiribi jomayamai?” iki.

11 Jatíbi Israel jonibo yoyo ikana joira apo Davidkan xobo kamanbi nokota iki. Jatianra apo Davidkan, sacerdote Sadoc betan Abiatar jato yoiti raana iki: “Judá jonibaon koshibo yoikanwe, jainxon yokakanwe, jaweakiki jakiribi nokon apo jain iká xobonko ea kati yoitinin basikanai;

12 jato yoikanwe jabaonra ea jakiribi kati chinípari yoiti yamake, noa ja jonibobires ikaxa non wetsabobires iki”, akin.

13 Jainxonribira apo Davidkan Amasáki joi raana iki: “Miara nokon jimibi iki, enra mia Joabnin toan jatíbi sontárobaon koshi jikimai, jaskákin en mibé senenhayamaketian, abánon ea Ibon akonbireskin masá tenemakin”, akin ati.

14 Jaskáxonra Davidkan Judá jonibo jeen imaa iki, jatianra jatíxonbi westíora shinanbicho axon, apo jawen joni koshiboyabi jakiribi jonon ixon, joi bomakana iki.

15 Jatianra apo David Jerusalénhain jakiribi kaai pikota iki, jatíbi jabé boai jonibo betan kaaxa, Jordán paronko nokota iki. Jatianra ja Judá jonibo, nokotaitian bianan itan ja Jordán paro shitákanaitian jato akinni Gilgalhain bokana iki.

16 Jainoax ja Bahurim jemamea Semei, ja Benjamínman joni, jaribira apo David bii, Judá jonibo betan kaai ishtoa iki.

17 Jainoaxibira waranka Benjamínman jonibo, Semei betan bokana iki. Jatianribira, Saúlnin rarebonin yonoti Siba, jawen chonka pichika bakeya itan jawen rabé chonka iboaxon yonotia, jatopari Jordán paronko nokotax,

18 keiba shitákana iki, ja paro benésain apo Davidkan rarebo shitákanaitian, akinti kopí, itan jaskatax jato betan jakon iti kopí. Ja moa Apo Davidkan Jordán paro shitai kaitianra, Simei já bebon beota iki,

19 jainxonra apo yoia iki: —Mia en jakonma aká kopí eki jakonma shinanyamawe. Mia Jerusalénhainoax pikotaitian en mia jatíbinin jakonmakin akábo ea shinanxonyamawe. Jainoax moa eki sináyamawe,

20 enbira onanke en jakonma aká, jaskatira jatíbi Josekan rareboibakeax, mia bii eapari rekenkiranke —akin.

21 Jatianra Sarvianin bake Abisainin, yoia iki: —¿Ibon katota ikenbi, apo join jakonmaaxbiki, jawekopí Simei mawátima iki? —akin.

22 Ikaxbira Davidkan Abisai itan Joab yoia iki: —¡Sarvianin bakebo! Natora maton jawékima iki, ¿Jaweatiki maton ea bechiteai? Rama min onanwe, Israel jonibaon moa onanshamanke ea moa jaton apo, jaskatira rama nete tsoabi mawáyamai —akin.

23 Japekáora apo Davidkan Simei yoia iki, enra senenhati iki; miara mawáyamai, akin.

24 Jainoax ja Saúlnin baba, Mefibosethribira ja apo joaitian bii pikota iki. Ja apo David Jerusalénhainoax kaai pikónon netén, itan jakiribi jakonbires isinama itan japariax joai kamanra, Mefibosetnin jawen tae jakonhakin koiranyamaa iki, jawen chopa patsáyamaa iki, itan jawen keniribi ayamaa iki.

25 Jatian ja Jerusalénhainoax apo bii Mefiboset pikóketianra, yokata iki: —Mefiboset, ¿Jawekopíki mia ebetan kayamaa iki? —akin.

26 Jatianra Mefibosetnin yoia iki: —Niti atipanyamaxonra, en nokon yonoti Siba yoia iki, ea jan peyakax kati burro benxoaxonti, ikaxbira ea jan parana iki.

27 Jaskataxa ja ea ikáma joibores yoii, mii bebon kaa iki. Jaskara ikenbira, mia Diossen westíora ángel keská iki, jakopí min jaweakaki jakon itiki, jaskara ea awé.

28 Jatian jatíbi nokon papan rarebobo, mii bebonxon moa retekantires iká ikenbira, nato min yonoti, min mesanxon pikinnoxon, min kenaa iki. Jaskara ixonra en mia jawebi yokáti yamake —akin.

29 Jatianra apon yoia iki: —Noara moa oribo yoyo iti yamake. Enra moa jato yoike, ja Saúlnin mai ikátiaibora minribi, itan Sibákanribi biti iki —akin.

30 Ikaxbira Mefibosetnin yoia iki: —Ibanon Siba jatíbia baneti. Nokonara jakon iki, ja apo jatíbi jakonbires isinama, itan japaria jakiribi jawen xobon joá —akin.

31 Jainoaxibira ja Galaadhainoa Barzilai, Roguelimhainoax ipakea iki, Jordán paro apo shitakiini, itan jainxon já raani.

32 Jara iká iki posaka chonka baritiaya ikax moa kikin yosishoko, janra apo David Mahanaimhain inontian, ja maxkatabo menia iki, icha jawékia joni ixon.

33 Jatianra apon Barzilai yoia iki: —Ebé Jerusalénhain kawé, jainxonra en mia koiranti iki —akin.

34 Ikaxbi Barzilainin yoia iki: —Miibetan ea Jerusalénhain kati ikaxbira, nokon jati nete moa ichátama iki,

35 eara moa posaka chonka baritiaya iki; en piá itan en xeaara moa noema iki, noerin o noemarin ixon yoitira en atipanyamake; jainxon jonibo bewai itan ainbobo bewaira en ninkati atipanyamake. ¿Jaweatiki, min ea koiranon ixon en mia tee meniti iki?

36 Jordán paro shitatiain kamánres mia chibani ea joá riki, min koiranon ikaxa, ja apo ikax mia jain iká xobonko ea kayamai.

37 Ikaxbi en mia jares yokatai riki, nokon mainbiribi min ea raanon ixon. Jainoaxa ea mawátinin keenai, nokon anibo betanbiribi miinmenox. Ikaxbi nenora min yonoti wetsa jake, ja nokon bake Quimam. Já mibé katinra ea keennai. Min jawekeskaaki jakon iki, jaskáakinra nokon bake betan min ati iki —akin.

38 Jatianra apon yoia iki: —Ibanon Quimam ebetan kaai, ja min yoia keskákin en jabé abanon; jainxon jatíbi ja min ea yokatabora en meniti iki —akin.

39 Jatianra jatíbi jonin moa Jordán paro shitakana iki, jatian shitáxonra, apon ja Barzilai betsó ataanan jakon katanwe aka iki, jatianra Barzilai moa jawen xobónko baneti kaa iki.

40 Jatian jainoax apo, Gilgalhain kaitianra, Quimam jabé kaa iki, jatíbi Judá sontárobo itan israelita sontárobo napónbekon senen jatí icharibi bokana iki.

41 Jatianra jatíbi israelita joni koshibobires apo betan yoyo iki boxon, westíoranin yoia iki: —¿Jawekopíki ja Judáinoa non wetsabo mion ibokanai, jabaonra min rareboyabi itan jatíbi min sontároboyabi, koiranxon Jordán paro mia shitamaa iki? —akin.

42 Jatianra Judá sontárobaon westíoranin, Israel jonibo yoia iki: —Nato apora non ochómakea rarebo iki. Jaskara ikaxa mato jawekopí sinati yamake. Ja apon noa pimanon ixon, iamax jawéki noa kopímabi meninon ixonra non ayamake —akin akana iki.

43 Jainxonra Israel joni koshibaon jato yoia iki: —Nato apora nona iki, noa maton wetsabora chonka tsamá iki, matora westíora tsamábicho iki, jaskara ikaxa chonkai mato bebonbires noakaya ibo iki. Jaskara ikenbiki, ¿Maton noa iresabires shinanai? ¡Non apo jakiribi joti yoiira, noapari jen ika iki! Jaskáakanabira Judá jonibaon, Israel jonibo bebonbires onsáakin join akana iki —akin.