2 Jaskáa pekáora ja sontárobo kimisha tsamáa aká iki. Ja reken tsamára Joabnin ikinaibo iká iki, ja rabé itin tsamára Joabnin wetsa Abisainin ikinaibo iká iki, ja kimisha itin iká tsamára, Gat jemamea Itainin ikinaibo iká iki. Jainxonra Davidkan jatíbi jawen sontárobo yoia iki: —Eara mato betan reteanantiain kaai —akin.

3 Jatianra wetsa sontáronin yoia iki: —Miara nobé katima iki. Nato jemanbi banéxon, noa jan akintibores min noa raanxonara jakon iti iki. Noa jabámakanti, itan naponbekon senen jatí icharibi noa retekantira ja non rawíbaona jawemabi iki. Miakayara ja noa chonka waranka sontárobo winoa bebonbires kopí iki —akin akana iki.

4 Jatianra apon jato aká iki: —Ja maton yoia jaskara jakon iti iketian ea jaskara ibanon —akin. Jaskataananra jema xepotiain kaax, wetsaori chankata iki, jainxonra waranka tsamábo, itan jainoa pacha tsamá sontáro, boai jato oinna iki.

5 Jainxonribira, apon, Joab, Abisai jainoax Itai, jabo raankin yoia iki: Ea noia ixonra, ja nokon bake Absalón maton jaweayamakin jakonharesti iki, jaskáakin ati jaton koshibo yoiaitianra jatíxonbi sontárobaon ninkata iki.

6 Jaskataxa Davidkan sontárobo moa Israel sontárobo betan reteanani Efraín niiain bokana iki,

7 ja David betan ikábaonra, Israel jonibo jatoareskin icha jato retekana iki, ja netera rabé chonka waranka israelita sontarobo mawata iki.

8 Jatianra ja main jatíbi niiain reteanani janbiskana iki, ja netera espadanin aká bebonbires, israelita sontárobo nii manish meranoax mawákana iki.

9 Jatian Absalónra mulan peyakaax kaaibi, shinannamainbi ja Davidkan sontárobo betan bechianana iki. Jatianra ja mula, ani jiwi encina naman jikia iki, jaskáketianra ja Absalón jawen maponbi teostamekaini jiwi ponyain panitina iki, ikaxbira mula ishtoi karesa iki.

10 Jatianra jan oinna sontáronin kaxon Joab keshana iki: —Absalónra encina jiwín panitina en oinke —akin.

11 Jatianra Joabnin yoia iki: —Jaskáakin oinxonbiki, ¿Jaweati min jainxonbi reteyamaa? Min jaskáketianra, jakonshaman shinankin en mia chonka plata koriki, itan westíora cintora en mia menikeanke —akin.

12 Ikaxbira ja sontaronin Joab yoia iki: —Ja ea min chonka waranka plata koriki meniabira, ja apon bakeranon Absalón, en jawebi rami ayamakeanke; nonbira ninkáibake ja mia, Abisai itan Itai apon yoiaitian, ja bakeranon Absalón, jaweayamakin maton koiranti.

13 Ikaxbi en wetsaorixon oinnara, ja retexon enbi nokon jati nete ramiakeana iki, aponra onankeana iki, jara jatíbi jawéki onanai iki. Jainoax miabira eki ramíkeana iki, itan minbi ea akinyamakeana iki —akin.

14 Jatian Joabnin yoiribia iki: —Mibéra ea neno yanka nete winotai —akin. Jaskataananra Joab encina jiwi ikain kaxon, Absalón jiriapari ikenbi kimisha pia bixon, jointiainshaman tsakaa iki.

15 Jainxonra ja Joab akinnaibaon, ja Absalón chonka jonin katea iki, jaskáxonra moa kikinhakin retekana iki.

16 Jainxonra onanti inon ixon Joabkan trompeta xon ati jato yoia iki, jatianra sontárobaon ja Israel sontárobo moa chibankin jenekana iki, jaskáaxonra Joabkan moa reteananti tantimaa iki.

17 Jatianra jan retea sontárobaon, Absalónman yora bixon, ja nii meran ani xantó ikain potakana iki, já pekatenra makan kikin keyaakin tsamankana iki. Jaskátaananra jatíbi israelita sontárobo, jabati boax jaton carpa xobo meran weikana iki.

18 Japarinontianra, Absalónman jato westíora makan monumento amaa iki, jaskáaxonra jain jawen jane aká iki. Bakeoma ixon en jaskáketianra, ea jonibaon jatíbitian shinantiki ixon aká. Ja monumentora Apon Teshanpain iki, jaskara ikenra ramakamanbi onankana iki. “Absalónman monumento iki iká”.

19 Jatianra Sadocnin bake Ahimaasnin Joab yoia iki: —Ea ramabi ranwe, ishto kaxon en apo oinbatanon. Ibonra atikeskabiakin moa ake, enra yoikasai, jawen rawíbaon ati ikenbira, moa Ibon xabáake ixon —akin.

20 Ikaxbi Joabkan yoia iki: —Ramara mia jaskara joi boí mia kati yamake. Wetsa netera mia kati atipanke. Rama ikaxbira mia kayamai, Apon bakera mawáke —akin.

21 Jatian Joabkan etiope sontáro yoia iki: —Mia kaxon ja min oinna keskábo apo yoitanwe —akin. Jatianra Etiope Joab bebon beota iki, jaskátananra moa ishtoi kaa iki.

22 Jatianra Ahimasnin jakiribi Joab yoia iki: —Ea jawekeska winóresbanon, ea raanreswe, etiope pekáo ea kabatanon —akin. Jainxon Joabkan yoia iki: —¿Jawekopíki mia kakasai, nokon baké, ja joi boá kopí jawe bitima ikenbi? —akin.

23 Jatianra Ahimaasnin yoia iki: —Ibanon jara jawemabi iki, ea karesbatanon ishtoi —akin. Jatianra Joabkan aká iki: —Ishtoi katanwe —akin. Jaskáara Ahimaas mai teshanpain ishtoi kaxon, ishtonbires ja etiope nokoxon winobaina iki.

24 Jaskákanai kamanra, Davidbiribi, Mahanaim jema xepóti rabé naxaran yakata iká iki. Jainxonra já koirannai sontaronin bochiki kaxon westíora joni ishtoi joai oinna iki.

25 Jatianra koshi join apo yoia iki. Jatianra apo saí ika iki: —Jabicho joai ikaxa jakon joi bei joai iki —iki. Jatian ja joni moa ochómaitianra,

26 já koirannai sontaronin, wetsa joni ishtoi joai oinribia iki, jatianra ja xepóti koirannai joni keshani saí ika iki: —¡Wetsa jonira ishto joribai! —iki. Jatianra apo neskata iki: —Janribira jakon joi betiki —iki.

27 Jatianra já koirannai sontaronin yoiribia iki: —Jawen ishtobi oinxon en onannara, ja rekenain joai Sadocnin bake, Ahimaas iki —akin. Jatianra apon yoia iki: —Jara jakon joni iki, jaskara ixonra jakon joi beti iki —akin.

28 Jatianra Ahimaasnin moa nokóxon apo eara joke akin aká iki. Jainxonra mainbi bekepinon kaman beoxon yoia iki: —Min Ibo Dios jakon ibanon, jaskara ixonra jan jatíbi ja miki yoitimatabo moa jato keyoke —akin.

29 Jainxonra apon yokata iki: —¿Bakeranon Absalónki jakon iki? —akin. Jatianra Ahimasnin yoia iki: —Min yonoti Joabnin raana jokinra, boanki, boanki iki, kikinni saa ikanai en oinke, ixonbira jaweki winotai ixon en onanyamaa ike —akin.

30 Jatian apon yoia iki: —Okeshoko kaxonpari ea manawe —akin. Jatianra Ahimaas ja yoia keskata iki.

31 Jaskatainbira etiope nokóxon yoia iki: —Min jakon joi biwé: Ramara mia, Ibon atikeskabiakin axonke, jatíbi ja miki yoitimatabo amayamakinra moa mia xabáake —akin.

32 Jatianra apon etiope yokata iki: —Ja bakeranon Absalónki, ¿Jakon iki? —akin. Jatianra Etiopenin yoia iki: —Jatíbi ja min rawíbo itan jatíbi miki yoitimakin, mia jakonmanoxon min jakonma benai jonibo; ja bake iká keskati keyópainnonra ikanai —akin.

33 Jatian apo David ikonbiresi onisi, Mahanaim jemanko kaai jikiti xepóti mananho, jawen iká chitéain mapetax winia iki. Ja mapeti kaira neskata iki: “¡Nokon bake, Absalón! ¡Nokon bake Absalón! ¡Eakaya min toan mawápain iká riki! ¡Nokon baké, Absalón, nokon baké, Absalón!” iki.