15
Moa jawetio basi iitira, Sansón trigo tsekatitian jawen awin oinni kaa iki, kakinra westíora cabra bake boa iki. Ja nokoti kaaira neskata iki: —Eapari nokon awin oinni jawen xobonko jikibanon —iki. Ikaxbira jawen rayosen jikimakashamaa iki,2 jaskáakinra neskáa iki: —Moara mia kenyamabirai ixonra, nokon bake ja mibé raenanai jonibi en menia iki. Ikaxbi jawen wetsa chiníra ja bebon metsá iki; jawen reken bititianbi jakaya min biara jakon iti iki —akin.
3 Ikaxbi Sansonman neskáakin yoia iki: —¡Ramara jake jakopi filisteobo en jato kopiti! —akin.
4 Jaskákaini kaxonra, Sansonman kimisha pacha jina sopó maxó yatana iki, jaskáaxonra rabébo jaton jinanbi chinexpakexon, westíora tiríti akábo rabé jinanko chinexpakea iki,
5 japekáora ja tiríti akábo keteaxon, filisteobaon wainko botankanon ixon ja maxobo jenea iki. Jaskáaboxonra, ja trigo xatekanayabi ja niabo, jainoax uva jiwiabi, olivos jiwiboribi jato menomaana iki.
6 Jainxonra filisteobaon tsonki noa jaskáa ixon onankaskana iki, iikaxon Sansón betan raenanai jonibi jawen rayosen, jawen awin meninanxon jayaoma banémaa ixonra, jan kopikaakin noa aká riki ixon onankana iki. Jaskati boxonra, ja ainbo betanbi jawen papa menokana iki.
7 Jatianra Sansonman jato yoia iki: —Enbix janekaatananra, matonbi jaskara aká iketian en mato yoiai. Mato kopitaxparira ea tantiti iki —akin.
8 Jaskati sináxonra, moa jainxonbi jato retepakea iki. Japekáora Etam shanka kini meran Sansón jaai kaa iki.
Sansón itan burro koixao
9 Filisteobora beax Judáin ikana iki, jainoaxa ja Koi Xao akanai kaman janbiskana iki,
10 jainoara Judábaon jato yokata iki: —¿Jawekopi nobé reteanankasi mato bekanarin? —akin. Jatian jabaon neskáa iki: —Sansón yatankasi noa bekana riki, janbi noa aká iken noa kopíanon ikax —akin.
11 Ja ninkátaananra, kimisha waranka Judá jonibo, Etam shanka kininko bokana iki, boxonra Sansón yoikin neskáakana iki: —¿Filisteo jonibo riki, noa winoa koshibo ixonki min onanyamaa iki? ¿Jaweati min noa jaskara jawékiain banékinnarin? —akin. Jatianra Sansonman jato neskáa iki: —Enriki ja filisteo jato jaskáa, jatonribi ea jaskáa iketian —akin.
12 Jatian jabaon yoia iki: —Noara bekanke ja filisteobo meninoxon mia yatani —akin. Ikaxbi Sansonman jato yoia iki: —Ea akonkin yoikanwe, matonbiki ea reteyamai —akin.
13 Jaskáara jabaon ponté yoikana iki: —Nonra mia reteyamai. Yatanxonresa mia non filisteobo meniai —akin akana iki. Jaskáxonra rabé bená risbi rastonman nexaxon, ja kini meranoa pikobainkin bokana iki.
14 Ja boi Koixao akanainko nokókanaitianra, filisteobo jato bechi bei raroshamani koshin saí ikana iki. Ikaxbira Sansonman Ibon shinanman iboa ixon ja ponexkana betanbi menexkana lino risbi raston payo keskáakin ras aka iki;
15 jatianbira westíora burron koixao paxabirespari bixon, westíora waranka filisteo jonibo jato retea iki.
16 Japekáora neskata iki:
“Ja burro koixaon en jato akára,
westíora itan rabé tsamá iká iki.
Ja westíora burro koixaonra,
en waranka joni retea iki”, iki.
17 Jaskata pekáora ja koixao wishkoa iki, jakopíra jain janekana iki, Ramat-lehí, akin.a
18 Jatianra ikonbiresi nomikin Sansonman Ibo Dios neskáakin yoia iki: “¿Jawekeskakayarin, ea akonbireskin reteanantiainbo jato kananmatananbi, rama nato mia Dios ikonhaismabo xaranmea ea min nomi retemai?” akin.
19 Jatianra Diossen ja xantóain jene jokonmaa iki, jainoa jene jokonai xeaaxa, Sansón shinan koshiinakaina iki. Jakopíra ramakamanbi, ja wean janekanai, En-hacore, akin.
20 Rabé chonka baritia Israelbaon koshi Sansón inontianra, filisteobaon ja mai iboakana iká iki.