2 Jatianra ja Gaza jemamea jonibaon Sansón ja jeman kaa ninkáxon, jatíbi xepóti ja netebi jema katemakin koirankana iki. Ikaxbi nete xabataitian retei benoxon shinanbainira, moa yaméketian tantii bokana iki.

3 Ikaxbi Sansónra yamé pochinikon kamánres oxaa iki. Ja jatian wenikaini kaxonra, jatíbi jan xepoti koshiaaboyabi tsekaxon, iabainkin Hebrón bekeiba manan bochiki boá iki.

4 Japekáora Sansón westíora ainbo Dalila janeyaton, jaonshaman keena iki, jara Sorec teshanpain jaa iká iki.

5 Filisteo joni koshibaonra, Dalila oinni boxon yoikana iki: —Sansón paranxon yokáwe itan benawe jaweranoaxki jawen kikinbires koshi joai ixon, jainxon jawekeskaxonmein nonharestaanan nexayonti iki ixon. Min jaskáaketianra, noa westíorabaon westíora waranka pacha plata koríki mia non meniti iki —akin.

6 Ja ainbaonra Sansón neskáakin yoia iki: —Eapari yoita, jaweranoaxkayaki min kikinbires koshi joai ixon, ¿Jawekeskaakin mia nexaaki mia chorokootima iki? —akin aká iki.

7 Jatian Sansonman neskáakin yoia iki: —Kanchis kanóti risbí benáshamantonin nexakanara, nokon koshi yamaax, moa wetsa joni keskáresibi ea iti iki —akin.

8 Jatianra, filisteo joni koshibaon Dalila kanchis kanóti risbí benáshaman boxonkana iki, jatianra Dalilanin jan Sansón nexaa iki.

9 Jaskáaxonra ja ikanainko moamabi jaweti joni jonémaa ikax, Dalila koshín saí ika iki: —¡Sansón miara filisteobaon yatankanai! —iki. Jatianra Sansonman ja risbí ras aka iki, risbí meno keskáakin. Jatianra filisteobaon, jaweranoaxki jawen koshi joai ixon onanyamakana iki.

10 Jatianra Dalilanin neskáa iki: —¡Miinra ea parana iki! ¡Minra ea jansoaa iki! Ikaxbi ramara ea min jaskáatima iki, eakaya yoipariwe, jawekeskaxonki en mia nexati iki —akin.

11 Jainxonra Sansonman yoia iki: —Risbi benáshamanbaon jawetianbi jan jawebi akámaton, min ea nexaara, wetsa joni keskábiresibi ikax ea koshioma iti iki —akin.

12 Jatianra Dalila risbí benáshamanbo bixon, jan nexayonax koshin saí iribaa iki: —¡Sansón miara filisteobaon yatanai! —iki. Jatianra jakiribi jato ikainko jaweti joni, jan joneribia iká iki; ikaxbira Sansonman ja bená risbibo wirish yoman akáakin ras aká iki.

13 Jatianra Dalilanin Sansón neskáa iki: —¡Minra ea parankin jeneyamai! ¡Minra ea jansoakin jeneyamai! ¡Ea yoiwe jawekayaki en mia nexati iki! —akin. Jainxonra Sansonman yoia iki: —Minra ati iki, jan yoman chopaakanaiki nokon boo kanchis ronokaxo axon, ja jiwiki kamayakin nexaxon kikinhakin tasakin. Jaskáara moa nokon koshi yamaax moa wetsa joni keskábiresibi ea iti iki —akin. Jatianra Dalilanin Sansón oxamaa iki, jaskáxonra jawen boo bixon kanchis risbí axon ja toroakana chopaki kamayaa iki,

14 jaskáa pekáora, maikibi kikinhakin jiwi tasaax jakiribi koshin saí ika iki: —¡Sansón miara filisteobaon yatanai! —iki. Ikaxbira Sansón weníkin, ja chopayabi kamayaxon, maikibi jiwi tasaa ikenbi tsekaa iki.

15 Jatian ja ainbaon neskáakin yoia iki: —¡Jansó! ¿Jaweakikayaki mia iká iki, ea akí eara mion keenai iki? Natoyanixa mia kimishai eki shiroai, itan ea min yoiamapari iki jaweranoaxkayaki ja min koshi jatíbi joai ixon —akin aká iki.

16 Jaskáakin ichayoraakin Dalilanin tearesa itan jatíbitian japacho yokatara, moa jatsanyonax Sansón mawátinin keena iki;

17 jaskákinra Sansonman ja senenainbi Dalila, jawen joné jawéki keshana iki, neskáakin: —Tsonbira boo ea xatenanhisma iki, pikotamatianbira ea Diossenabiribi iti iká iki, jakopira ea nazareo iki. Jaskatira nokon boo ea xatenankana, moa koshi yamaax itan bebonbires yosma ikax, ea moa wetsa joni keskábiresibi iti iki —akin.

18 Jatian moa jawen joné jawéki onanxonra Dalilanin, filisteo joni koshibo keshanti jato raana iki: —¡Ramakaya bekanon, Sansónmanra jawen joné jawéki ea moa meramake! —akin jato aká iki. Jaskáara jabo jaton plata koríki bibaini ja oinni bokana iki.

19 Jainxonra Dalilanin jawen kishín tepinxon Sansón oxamaa iki, jaskáxonra jawen boo kanchis risbí aká iki, jaskataananra ja boo risbiaabo xatenon ixon, westíora joni kenaa iki. Japekáora ja ainbaon Sansón ramiakin peoa iki,

20 jainoaxa koshín saí iribaa iki: —¡Sansón, miara filisteobaon yatanai! —iki. Jaskáa jishtenxonra Sansonman shinanna iki, moa ipachoai keskati xabakatai, ikaxbira eara moa Ibon jeneke ixon jan onanyamaa iki.

21 Jatianra filisteobaon Sansón yatanxon, jawen bero tsekanankana iki, jaskáaxonra Gaza jemanko Sansón bokana iki, jainxonra bronce cadenanin nexaxon cárcel meran axon, jawéki renetiain teemakana iki.

22 Ikaxbi jainoax, jawen boo nenketi peokooribia iki.

23 Filisteo joni koshibora, moa kananax raroanan jaton dios dagón, jawéki menoxoni tsinkikana iki. Jaskatira neskati bewakana iki: “Non rawí Sansónra non diosen noa menike”, iki.

24 Jaskákanai ointaananra, wetsa joniboribi bewananbi jaton dios rabii neskákana iki: “Non rawí Sansónra non diossen noa menike, jan non waibo noa keyonana iketian jainxon non kaiboboribi ichabires noa retenana iketian”, iki ikana iki.

25 Ikonbiresira rarokana iki, jaskákinra jaki shironoxon Sansón jatoiba bokanti yokákana iki. Cárcel meranoa pikoaxa jaon shirokana iki, jainxora rabé witá xaran nichínkana iki.

26 Jatianra Sansonman jan metsonxon boai bake neskáakin yoia iki: —Ea boxon nato xobo jan koshia witábo ikainko ea nichinwe, jabo tii akax jaki koshitininra ea keenai —akin.

27 Jaton dios rabiti xobonkora, jatíbi filisteo joni koshiboyabi, ainbobo itan benbobo ikonbiresi weikana iká iki. Sansónki shirokanaitianra kimisha waranka jonibaon bochikixon oinkana iki.

28 Jatianra Sansonman orankin Ibo yoia iki: “Enra mia yokatai Ibó, jakiribi ea min shinanon ixon, ea koshi meniwe, enra filisteo jonibo jawetianbi awetsayamanoxon nokon rabé bero kopí en jato kopíkasai”, akin.

29 Jaskátaananra, naponbekonshaman kikinhakin jan xobo koshia rabé witá, jawen mekenman benaa iki, jatian jawen rabé mekemanbi jaki koshikainaxa,

30 saí ika iki: “¡Nenoaxa filisteobo ebé mawákanai!” iki. Jatianra jatíbi jawen koshiaxon Sansonman werana iki, filisteo joni koshiboki, itan jatíbi jain iká jonibokira ja xobo poxókin jato keyoa iki, ja jiriatian jato keyoni winobainbiresa, Sansonman mawákin jato keyobaina iki.

31 Japekáora Sansonman wetsabo jaton jatíbi rarebo betan bexon, jawen yora bikana iki, jainxonra, Zora betan Estaol jema naxaran jawen papa Manoanin mai kininko Sansón miinkana iki. Rabé chonka baritia senenra, Sansón israelitabaon joni koshi iká iki.