2 jatian jawen xobonko baneti joxonra, jawen anibo yoia iki: —Eapari akinkanta, ea keenai riki Timnáhinoa westíora filisteo xontako betan wanotinin, jakopíra jatíbi maton ea senenhaxonti iki —akin.

3 Ikaxbi jawen anibaon yoia iki: —¿Jawekopíki ja filisteo jonibo ikon Dios ikonhaismabo ikenbi, jain wanokaskin benai mia kati iki? ¿Moakayaki non kaibobo xaran itan jatíbi israelitabo xaran ainbobo yamaa? —akin. Jatian Sansonman jato yoia iki: —Ja xontakora nokon keenbiribi iki, jainoax ea keenai riki, nokon awin maton ja imatinin —akin.

4 Ikaxbira jawen anibaon onanyamaa iki, Ibonbi imaaki jaskarabo iki iitai ixon, jara filisteobo betan jaskáaxon reteanankin peokoomanoxon benakin imaa iká iki, ja netebaonra Israelbo jatoarestaanan iboakana iká iki.

5 Jaskatax Sansón, betan jawen anibo, Timnathain bokana iki. Jatianra ja Sansón jeman uva wainkobo nokóketian, ja bikasi westíora león bakeranon keota iki.

6 Jatianra Ibon shinanman iboa ixon Sansonman, ja león cabra bake akáakin, jawen mekemanbi jaxkayona iki; ixonbira ja winota jawéki jawen anibo yoiamaa iki.

7 Jatian moa kaxa jawen keen xontako iketian jabé yoyo ika iki.

8 Jaweti nete pekáora, ja ainbo moa bii joi, Sansón león mawá oinnipari wetsa bain jikia iki, kaxon oinnara ja leónman yoranko kokoti bonabaon naaxon moa mishkinhakana iká iki.

9 Ja mishkin binonxonra, bonan chomashokobo mekemanbi pakexa iki, ja kokobainira kaa iki. Jatian jawen anibo betan nokoananxon, ja mishkin meniara petsokana iki, ixonbira león mawainoa en bia riki akin, jato yoiamaa iki.

10 Sansonman papara ja xontako oinni kaa iki; jatianra Sansonman jain westíora fiesta aká iki, ja bake ranonbo jaskáai axea keskáakinra aká iki.

11 Ikaxbira filisteobo jaki raketai ixon, kimisha chonka joni jato betan raenanaibo jaboribi jabé jain ikanon ixon iokana iki.

12 Ja kimisha chonka jonira Sansonman jato yoia iki: —Maton shinanmanres onanti westíora jawéki mato yoibanon. Nato fiesta neteyanixbi ja kanchis netera, jawe yoii ikárin ixon maton ea pontéshaman yoiti iki, jatianra westíorabo en mato meniti iki, westíora kikin chopa lino tariakana, jainoax fiestatian saweti choparibi en mato meniti iki.

13 Ikaxbi yoiamaxonra, mato westíoraxonbo, ea westíora kikin chopa lino tariakana maton ea meniti iki, jainxonra westíora fiestatian saweti choparibi maton ea meniti iki —akin. Jatian jabaon yoia iki: —Moa noa yoikayawe, ja min noa shinanmanres onanmakasai. Noara ninkákasai —akin.

14 Jatianra Sansonman moa shinanmanres onanti, jato yoia iki: “Ja piainoaxa piti jokona iki; jainoax ja koshiibakeaxa bata jokona iki”, akin. Kimisha nete pekáobira jabaon jaweraki ikárin ixon ja shinanmanres onanti atipanyamakana iki,

15 jaskákinra jawen chosko iti neten Sansonman awin neskáakin yoikana iki: —Min benepari noa oinxonwepanon, ja shinanmanres onanti iká noa yoinon, ikaxbi noa yoiamaketianra, miayabi min papan rarebobo non menoai. ¡Non jisára maton noa kenaa iki, noa jayata jawéki bichínnoxonres! —akin akana iki.

16 Jatian ja ainbo Sansón oinni kaxon, winiananbi neskáakin yoia iki: —¡Miara eon keenyamai! ¡Miinra ea omisai! Nokon kaibobora westíora jaweki shinanmanres onanti min jato yoia iki, ikaxbi jawe yoii ikarin ixon min ea yoiamaa iki —akin. Jatian Sansonman yoia iki: —Nin nokon papa betan titara, en yoiamabobi iki, jaskara ixonra en mia yoitimabobi iki —akin.

17 Ikaxbira ja ainbo kanchis nete senen, fiesta keyotai kaman, ja pataxbi ikax wini jenéyamaa iki, jainxonra kikinhakin tearesa iki, jaskáaboxonra kanchis nete senenshaman, ja yoii iká keshamaa iki. Jatianra ja ainbaon jawen kaibobobiribi kaxon keshana iki.

18 Ja kanchis nete bari jikiamabira, boxon filisteobaon Sansón yoiikana iki: “Ja mishkin winoa batara jawebi yamake, ja león winoa koshira jawebi yamake”, akin. Jatianra Sansonman jato yoia iki: “Nokon biti ainbaon mato keshanara, jaskara yoii iká, maton onanke”, akin jato aká iki.

19 Jatianbira Ibon shinanman Sansón iboaa iki, jatianra Sansón Ascalónhain kaa iki, jainoara kimisha chonka joni retea iki, jaton chopabo jato bichinxonra, jaskati yoii iká onanabo jan jato kopía iki. Japekáora jawen papan xobonko kaai, sináyabi kaa iki,

20 jatianra Sansón betan raenanai joni, jawen awin menikana iki.