2 Zora jemanra westíora Dan joni, Manoa janeya iká iki. Jawen awinra jawetianbi tooisma ikax bakeaisma iká iki.

3 Ikaxbira ja ainboki pikóxon Ibon ángelnin yoia iki: “Minra jawetianbi bakeati atipanyamaa iki, ikaxbi ramara mia tooya banetai, westíora benbo bakeyara mia inoxiki.

4 Jakopíra, uva itan wetsa pae xeatibobi min xeatima iki, Dios jaki kerásaiboribi min pitima iki,

5 westíora benbo bakeyara mia iki kaai, jara min boo xatenantima iki, ja bake pikotamatianbira Diossen jawen joni iti moa iboa ikax nazareo iti iki, janra Israelbo filisteobaon jato iboa iitainbi, jato pikokin peoti iki”, akin aká iki.

6 Ja ainbaonra jawen bene kaxon keshana iki: “Ea iitainkora westíora Diossen joni pikóke. Jatian en ikonbiresi ratékainxon oinnara ike, Ibon ángel jisábiora. Miaki tsoa iki ixonra en yokáyamake, janbira ea jawebi yoiamake.

7 Jares ea yoiara ike, ea westíora benbo bakeya iki kaai ixon, rama nenonxon peoxoronki en moa uva itan wetsa pae xeatibobi en xeatima iki, kerás jawékiboribi pitima iki, itan ja bakeronki, pikotamatianbi jawen mawá nokotai kaman jawena iti Diossen iboa ikax nazareo iti iki”, akinra ea ake, akin aká iki.

8 Jatian Manoanin orankin Ibo neskáakin yoia iki: “Enra mia yokatai Ibó, jakiribi ja joni noiba raanwe, ja bake pikóketian jaskáakin atibo noa yoinon ixon”, akin.

9 Jaskáakin Manoanin yokatara, Diossen ninkáxona iki, jatian ja ainbo wainko iitaitianra jakiribi ángel pikoribia iki. Ja Manoa jain yamaketianra,

10 ainbaon ishto kaxon keshana iki: —¡Ninkáwe, ja wetsa nete en oinhibata jonira jakiribi pikóke! —akin.

11 Wenítaananra jawen awin betanbi Manoa ja joni ikainko kaa iki, jainxonra yoia iki: —¿Miaki iibata nokon awin betan wetsa nete yoyo iki? —akin. Jatianra ja jonin yoia iki: —Jenjén, eara iibake —akin.

12 Jatian Manoanin neskáa iki: —Ja min noa yoia senenketianki, ¿Jawekeskáaxon ja bake non aniatiki? ¿Jawekeskaboki non jabé ati iki? —akin.

13 Ibon ángelnin yoia iki: Min awinninra, jatíbi ja en jaskáati yoia keskábo ati iki:

14 janra uva xeati xeatima iki, uva aká wetsa jawékiatibora atima iki, itan wetsa pae jawékibira atima iki, itan kerás jawékibira pitima iki. Ja en ati yoiaboresa ati iki.

15 Manoaninra ja jonira Ibon ángel iki ixon onanxomabi neskáa iki: —Jaskara iketian, nobé pii banépariwe, miara cabra bake non pitiaxonai —akin.

16 Ikaxbi ángelnin yoia iki: —Ea banéxonbira, ja ea min pitiaxona en pitima iki. Ikaxbi ja cabra bakera non Ibona imakin keyokin menoa jakon iti iki —akin jato aká iki.

17 Jatian Manoanin ángel yoia iki: —Min janeki jawe iki ixon min noa yoipanankan, jatianra ja min yoiabo senenketian mia non iráke ati iki —akin.

18 Ikaxbi ángelnin yoia iki: —¿Jaweatiki nokon jane min onankasai? Jara westíora joné jawéki ikax ratéti iki —akin aká iki.

19 Jatianra Manoanin cabra bake betan ja meniti piti berobo bia iki, jaskáxonra westíora shankan perakanxon, Ibo menikin keyokin menoxona iki. Jatianra Ibon Manoa betan jawen awin bebon jishtibiresakin, ratéti jawéki imaxona iki:

20 ja makan tsamáinoax chii tiri keyatai meranbi, Ibon ángel naikan kaai keyataitianra, Manoa betanbi jawen awinin oinna iki. Jatianra mai tii anon kaman beokana iki.

21 Jatianparira ja joniki Ibon ángel iwana ixon, Manoanin onanna iki, jainoaxa moa jakiribi jaibabi itan jawen awinbabi moa pikóyamaa iki;

22 jainxon jawen awin neskáakin yoia iki: —Nonra Diosbi oinke, jaskara ikaxa ponté moa noa mawataires iki —akin.

23 Ikaxbi jawen awinin neskáakin yoia iki: —Ibon noa retekaskinra, non menia yoina keyokin non menoxona biamakeana iki, itan non menikin bexonabo noa bixonyamakeana iki, nato jawékibobira noa oinmayamakeana iki. Jainxonribi jatíbi ja atibo noa yoiamakeana iki —akin aká iki.

24 Ja moa jaskara iti senenketianra, ainbo benbo bakena iki, jara Sansón akin janekana iki. Ja bake aniaitianra, Ibon jakonhakin shinanxona iki.

25 Jainoax wetsa nete Danhin iká carpa peotainko, Zora jema betan Estaol jema naxaran Sansón iitaitianra, Ibon Shinan Sansónki onantii peokoota iki.