2 Ikaxbira jan jato yoia iki: —¿Matonki shinanyamai, en aká bebonbires maton aka? Ja ichama maton aká riki, ja non icha aká bebonbires.

3 Ja Diossenra madianitabaon joni koshi Oreb betan Zeeb; matoki menikamaa iki. ¿En akáki jawe iki, ja maton akátii betan senenti? —akin jato aká iki. Ja Gedeón jaskati yoyo iká ninkatax, Efraín jonibo moa jaki sináti jenekana iki.

4 Gedeónra jawen kimisha pacha jonia, jaton rawíbo chibanboi boax, ikonbiresi paxkinabo ikaxbi, Jordánhin nokotax shitákana iki.

5 Jatian Sucothain nokóxonra, Gedeónman jain jabo jato yokata iki: —Akinkanwe nato ebé beabo, ja jawékiati menikanwe ikonbiresi paxkinabora ikanai; madianitabaon apobo Zeba itan Zalmuna chibani noa niabo riki —akin.

6 Ikaxbira ja Sucothainoa koshibaon neskáakin yoikana iki: —¿Ja min jonibo non mia pimaxonon ixonkayaki, Zeba betan Zalmuna moa min yatana iki? —akin.

7 Jatianra Gedeónman jato kopikin yoia iki: —¡Moa Ibon Zeba betan Salmuna, ea yatanmaa baneta pekáo joxonra, kopikaakin tsoa jonibi jain jaama mananmamea jiwi moxaya itan maxkobo bixon, non mato rishkiti iki! —akin jato aká iki.

8 Jainoax Penuelhain kaxonra, Sucothain jato yokata keskáshamanribiakin aká iki. Ikaxbira ja Penuelhainxon, Sucothainxon akana keskáribiakin yoikana iki,

9 jainxon Gedeónman jato yoia iki: —¡Enharestaanan banéxonra, nato torre en mato poxanaanoxiki! —akin.

10 Zeba betan Zalmunara, chonka pichika waranka joniboya Carcorhain iká iki, jabora iká iki ja bari pikotaiorikea sontárobo jati texea, jatian pacha rabé chonka waranka jonira iká iki jabo jato retekana.

11 Jainoax tsoa jonibi jain jaama mananhori Noba betan Jogbeha iká bari pikotaiori kakin, benxokaatamabo ikanaitian, jaton carpa peotainoabo Gedeónman jato reteboa iki.

12 Jaskáa Zeba betan Zalmuna jabati kaitianra, chibanxon Gedeónman jato yatana iki, jatianra jatíbi sontárobo ratékana iki.

13 Jatian moa reteananax baneti jokinra, Gedeónman Heres ipaketinko winókin,

14 westíora bake ranon Sucothainoa yatanxon, yokata iki; jatianra ja bakeranoman kanchis chonka kanchis koshibaon janeyabi ja Sucothainoa yosibaon janebo wishaxon menia iki.

15 Jatianra Gedeónman Sucothain kaxon, ja jemameabo neskáakin yoia iki: —¿Matonki shinanai Zeba betan Zalmuna kopí eki shirokani? ¿Matonki shinanai nokon jonibo ikonbiresi paxkinabo ikenbi, natobaonra jato yatannamapari iki ixon, noa pimakashamakani? ¡Nato riki ja jonibo! —akin jato aká iki.

16 Jatianra Gedeónman, tsoa jonibi jain jaama mananmamea maxko jiwibo moxaya bixon, ja Sucothainoa yosibo jan jato rishkiona iki.

17 Jainxonribira, Penuelhainoa Torre poxakana iki, itan ja jemamea joniboribi retekana iki.

18 Jatianbira Zeba betan Zalmuna jato yokata iki: —¿Ja maton Taborhainoa jonibo reteaboki jawekeska ikana iki? —akin. Jatian jabaon yoikana iki: —Mia jisábira ikana iki. Jainoax ja westíorabora joni koshi keskáboribi ikana iki —akin akana iki.

19 Jatianra Gedeón saí ika iki: —¡Jabora nokon wetsabo iká iki! ¡Kikin nokon wetsabora maton retea iki! Ibonbira onanke, maton jabo reteyamaketianra, enribi mato rama reteyamakeanke —iki.

20 Jatianbira jawen reken bake Jeter, neskáa iki: —¡Wenítaanan, natobo retewe! —akin. Ikaxbi Jeter bakeranonhira ikax, retemistin rakékin jawen espada tsekayamaa iki.

21 Jatian Zeba betan Zalmunanin, Gedeón neskáa iki: —¡Koshi shinanya jonira onantibires ikai iki! ¡Minbikaya noa retewe! —akin. Jatianra Gedeónman weníxon jato retea iki, jainxon ja Zeba betan Zalmunanin camello jan raoti teoa bia iki.

22 Jatian israelitabaon yoia iki: —Noa madianitabaon iboa íitainbi, min noa xabáa kopíra noa keenai, min itan min chiní bakeboyaxonbi koshi jikixon, noa ikintinin —akin.

23 Ikaxbi Gedeónman jato kopikin yoia iki: —Nin enbi itan nin nokon bakenbira koshi jikixon mato ikintima iki. Ibonbira koshi ixon mato ikinti iki.

24 Ja mato yokátinin ea keenai riki, jato yatanxon maton meosoti biabo, ea menikantin. Ja oro meosotibora, ja non rawí sontárobaon jawebioma mananman jaa jonibo ixon sawekanai iká iki —akin jato aká iki.

25 Israelitabaonra westíora perakooti kakaaxon, ja bikana meosotibo jain tipinkana iki, jainxonra Gedeón yoikana iki: —Natobo riki —akin.

26 Jatíbi ja oro meosotibaon iwera chonka iskon kilo iká iki, ikaxbi toponamara iká iki, jan raoti jawéki, kopí jawéki, jainoax madián apobaon boai yankon chopa, itan jaton camellonin teotibo,

27 ja oroyara Gedeónman taria iki, jaskáaxonra jawen jemanbi Ofráin benxoa iki, jakopira jatíbi Israelbo Ibo bebon senenmabo ikana iki, jara iká iki ja Gedeón jatíbi jawen rareboyabi jan masáti.

28 Jaskáaxonra Israelbaon, madianitabo jatoareskana iki, jainoaxa jawetianbi moa ikátiai keská iamakana iki. Ja Gedeón janontianra, chosko chonka baritia ja main jakon jakana iki.

29 Ja Jerobaal, jaribi iki Gedeón, jara jawen xobonkobiribi jaai kaa iki,

30 jainxonra icha awinya ixon, icharibi bakeaa kanchis chonka bake iká iki.

31 Jatian Siquemhain iká jawen awinkoma betanra, westíora benbo bakeaa iki, jara Abimelec akin janea iki.

32 Gedeónra, jawen yosinbiribi mawata iki, jainxonra Ofráin jawen papa Joássen mai kininkobiribi miinkana iki, jara Abiezernin rarebobaon jema iká iki.

33 Ja Gedeón mawata pekáora, israelitabaon jakiribi Dios jeneribikana iki, ja Baalnin meskó diosbo rabikin, jainxonra jaton diosbiribi iti Baal-berit katókana iki.

34 Ja jatíbi jaton rawibaon jato kateaketana ikenbi, jato xabaabira jaton Ibo Diossen shinanbenokana iki.

35 Jerobaal jaribi iki Gedeón, jan jato jatíbinin jakonha ikenbira, jawen kaibobobiribi noibaxonyamakana iki.